Në Shqipëri nuk e njeh, Edi Rama në Athinë: Dialogu, i vetmi instrument!
Instrumenti vetëm për të ecur Ballkani përpara, Kryeministri Edi Rama thotë në Athinë se është dialogu. Madje në Konferencën “Ballkani Perëndimor përtej 2020-s” i cili po zhvillohet në Athinë ai sjell shembullin e Maqedonisë së Veriut dhe Greqisë, konflikt i cili u mbyllë përmes një Marrëveshje dhe Maqedonia vazhdoi rrugën e integrimit, shembull të cilin nuk e aplikoi në rastin e Shqipërisë për të ulur gjakërat.
“Në Ballkanin Perëndimor prej kohësh jemi përfshirë në një bashkëpunim, në paqëtim. Mendoj se edhe pse ka çështje të tilla, si çështja e Kosovës, mosnjohja nga Serbia, ne kemi qenë në gjendje të ulemi dhe të diskutojmë të ardhmen tonë bashkë. Këto janë kohë të veçanta, pasi jemi goditur si të gjithë nga kjo pandemi. Dhe sipas parashikimeve të Organizatave ndërkombëtare, rajoni ynë do të jetë më i godituri fort. Besoj se ka potencial për të çliruar dhe për të ecur përpara, për të mbyllur hendeqet e së shkuarës,” theksoi Edi Rama në fjalën e tij duke e vlerësuar si lajm të mirë faktin se mosmarrëveshjet mund të zgjidhjen së bashku.
“Dialogu është i vetmi instrument për ta përmbyllur këtë hyrje mund të përmend një nga shembujt më të jashtëzakonshëm të kësaj kohe që është zgjidhja e dialogut midis Maqedonisë së Veriut dhe Greqisë. Kjo lidhet me diçka, një situatë ku ti lufton dhe sfidon çdo lloj mundësi, shkon kundër tabuve. Në përpjekje për të kënaqur dhe duke mos pasur kurajë për të thyer tabutë, duket se rrezikon karrierën apo ndikimin,” tha Rama duke marrë shembullin e Zaevit ndërsa shpreson që të gjithë të kenë mësuar nga ky rast ndonëse në Ballkan vetëm Shqipëria po e shpërfill.
Dhe, ndonëse e shpërfill dialogun me opozitën rreth Kodit Zgjedhor dhe me këtë edhe integrimin e vendit, Edi Rama tha në Athinë se tani që Shqipëria është në formë të mirë, BE është në formë të keqe.
“Mendoj që Shqipëria dhe të gjitha vendet e rajonit të Ballkanit Perëndimor janë në një moment të rëndësishëm historik, mes një të shkuare që duan ta lënë pas krahëve dhe një të ardhme që nuk ka ardhur. Pra për të qenë tërësisht të integruar në BE. Kjo është diçka e dukshme dhe duket sikur ka një lloj mallkimi, se kur ne ishim në formë jo të mirë ata nuk uleshin në tryezë, tani që jemi në formë të mirë ne janë ata në formë të keqe. Por ne nuk kemi alternativë tjetër, e vetmja është të jemi pjesë e BE. Jo sepse na e kërkojnë miqtë më të fuqishëm, por sepse kjo është një kërkesë e fëmijëve tanë, e brezit të ardhshëm, është ëndrra e përhershme e etërve tanë.”
Ndryshe, Konferenca “Ballkani Perëndimor përtej 2020-s” u organizua nga “The Economist” në Athinë.
