Në SHSKUK, Kurti: Raportet e sakta të auditimit i kanë shqetësuar të korruptuarit!
Raportet e sakta të auditimit i kanë shqetësuar të korruptuarit, tha Kryeministri Albin Kurti, pas vizitës në Shërbimin Spitalor dhe Klinik Universitar të Kosovës, SHSKUK, ku përveç drejtuesve të këtij institucioni takoi dhe falënderoi Drejtorin e njësisë së auditimit të brendshëm, Musa Vitia, i cili kishte dalë në punë edhe pasi iu djeg vetura për herë të dytë, nga persona “të panjohur”.
“Sot vizitova Shërbimin Spitalor Universitar të Kosovës, i cili ofron shërbime për qytetarë dhe pacientët anembanë Kosovës, pa diskriminim në mënyrë të rregullt vazhdojnë ttrajtimin 16 e 500 pacientë më sëmundje kronike, t’i furnizojnë me barna dhe gjithashtu 15 mijë e 231 pacientë me tri lloje të insulinave… Vizita ime është për të shprehur mbështetje për ushtruesen e detyrës së re të SHSKUK-së, dr. Pranvera Zejnullahu-Raqi,” tha Kurti duke folur dhe për incidentin me kreun e Auditit të këtij institucioni.
“Musa Vitisë iu dogj vetura për herë të dytë në oborrin e ndërtesës, herën e parë më 19 gusht iu është djegur vetura të njëjtit zyrtar dhe tash prapë po iu djeget vetura këtij drejtor, i cili me raportet e sakta të auditimit, ka gjetur shkelje duke i shqetësuar të korruptuarit të cilët janë fortë të brengosur se si do të vijohet më tej me procedimin e këtyre shkeljeve,” tha Kurti duke sqaruar se Vitia është në këtë post që nga viti 2007, derisa ka ftuar organet përgjegjëse të Republikës që të ndjek dhe t’i dënojnë keqbërësit.
Me këtë rast, Albin Kurti i ka dhënë mbështetje të plotë drejtorit Musa Vitia dhe është zotuar që rastet të mos përsëriten e kriminelët të shkojnë në burg.
“Unë po shpreh indinjatën me dy kompanitë të cilat duhet të hulumtohen, se pse nuk ishin në nivel të detyrës. Bëhet fjalë për kompaninë e sigurimit fizik këtu ‘Security Code’, quhet kompania dhe një kompani tjetër “Quantic”,e cila ka për detyrë të bëj mbikëqyrjen vizive nëpërmjet kamerave që janë të drejtuara nëpër oborre të ndërtesave këtu në QKUK e SHKSUK në përgjithësi,” tha Kryeministri i Kosovës i prerë se duhet të hetohen sepse këto dy kompani nuk ishin në nivel të detyrës, dhe se nuk është e mundshme që kamerat nuk kanë qenë duke punuar.
“Besojmë se është koha e fundit që organet e shtetit të veprojnë më shpejtësi!”
Kurti me përfundimine vizitës vlerësoi se në ShSKUK është rritur disiplina dhe puna.
“Dua të falënderoj kryeministrin për mbështetjen,” tha Zejnullahu Raçi, e cila bëri me dije se e ka njoftuar Kurtin për shërbimet shëndetësore që janë në QKUK dhe në nivelin që duan ta arrijnë.
Edhe Zejnullahu Raçi, tha se kompani e sigurimit fizik ka dështuar të sigurojë me sigurinë dhe vrojtimin që duhet të ketë ShSUK-ja.
“Brenda javës kam kërkuar të merren masa urgjente. Sigurimi nuk është vetëm për stafin, por edhe për pacientët. Në rend të parë ata duhet të jenë të sigurt.”
Ndryshe, gjatë vizitës në këtë institucion, Kryeministri i Kosovës, Albin Kurti, zhvilloi një takim ku ishin të pranishëm, U.D drejtori i SHSKUK-së, Pranvera Zejnullahu Raçi, U.D. ministre e Shëndetësisë, Dafina Gexha Bunjaku, Zv/Ministri i Shëndetësisë, Arsim Berisha, kryetarja e bordit të SHSKUK-së, Aida Rexhepi, dhe drejtori i njësisë së auditimit të brendshëm të SHSKUK-së, Musa Vitia.
