Në Shtëpinë e Bardhë, Ministri serb: Serbisë po i kërkohet ta njoh Kosovën!

Ishte paralajmëruar si një takim me temë bashkëpunimin ekonomik dhe ndërlidhjen me projekte të përbashkëta, por pas interesit të madh publik dhe rrjedhjes së disa prej 16 Pikave të Marrëveshjes Kosovë-Serbi në Shtëpinë e Bardhë, Ministri i Financave i Serbisë, Sinisha Mali sqaroi për Televizionin publik të Serbisë, RTS, se 10 Pika kanë të bëjnë me njohje të ndërsjelltë.

“Ne në fillim morëm një letër që kurrë më të keqe nuk e kishim marrë më parë, qysh se kanë filluar negociatat me shqiptarët e Kosovës. 16 Pika janë në tavolinë, 10 prej të cilave nënkuptojnë njohje të ndërsjelltë,” tha për RTS, Ministri i Financave, Sinisha Mali duke sqaruar se ka shumë pak tema ekonomike dhe ato kanë të bëjnë me ndërtimin e infrastrukturës, autostradat, hekurudhat etj.

Ndonëse ministri serb e tha me zë dhe figurë I dërguari i Posaçëm i Presidenti të SHBA, Donald Trump, në dialogun Kosovë-Serbi, Richard Grenell, e mohoi të jetë shtruar në tryezën e bisedimeve çështja e njohjes së ndërsjellë.

Ndërkohë, Këshilli për Siguri Kombëtare bëri të ditur se liderët e Serbisë dhe Kosovës tashmë po shënojnë përparim.

“Bisedat tona këtë mëngjes u përqendruan në forcimin e lidhjeve ekonomike dhe normalizimin ekonomik. Presim të diskutojmë më tej këtë pasdite”.

Pas takimit Presidenti i Serbisë, Aleksandar Vuçiç tha se njohja e Kosovës është hequr nga dokumentat pasi shërbimi jonë sekret kishte të dhëna të sakta ndërsa shteti serb po lufton që në Marrëveshje të figuroj që Fondi amerikan i Zhvillimit të hap zyrën në Beograd dhe Kosova ta pranoj “Shengenin Ballkanik”.