Në shtetin e Edi Ramës, avokati goditet për vdekje edhe kur fiton çështjen!

Fati i zi i Sokol Mëngjesit ishte se u godit për vdekje me levë nga tre kriminelë sepse ishte avokat i liderit të opozitës Sali Berisha, por, nga ana tjetër fat i mirë ishte sepse për arsye që ishte avokat i Berishës, shteti u çu në këmbë për të kapur keqbërësit vetëm për të treguar se rasti nuk kishte lidhje me Sali Berishën!

Dhe, pas dhjetë orësh kur impianti mediatik i Edi Ramës nuk arriti të bind opinionin se thjeshtë kemi të bëjmë me një çështje pronësie, kur rasti filloi të gjykohet edhe nga mënyra se si u zhvillua në sy të fëmijëve që po shkonin në kopsht, doli Drejtori i Policisë së Tiranës për të dhënë versionin zyrtar të ngjarjes, shumë më makabër se sa ai që ishte dhënë nga mediat në shërbim të Kryeministrit.

“Nga tërësia e veprimeve gjurmuese dhe procedurale, nën drejtimin e Prokurorisë së Tiranës, është bërë e mundur identifikimi i autorëve të dyshuar të ngjarjes kriminale. Dorian Beqir Alia, 32 vjeç banues në Tiranë, Drivald Sokol Alia 21 vjeç, banues në Tiranë; Elton Ndue Kasaj 33 vjeç banues në Tiranë, Romario Roberto Tabaku, 26 vjeç banues në Tiranë. Ky i fundit ka larguar autorët nga vendi i ngjarjes me makinën tip Audi me targat AB 696 JT. Nga veprimet hetimore rezulton se avokati Sokol Mëngjesi është goditur për shkak të detyrës.

Rezulton se Mëngjesi ka përfaqësuar ligjërisht në një proces civil në Shkallë të Parë dhe në Gjykatën e Apelit një familje, që kishte të trashëguar një pronë në Tiranë. Ky proces është fituar nga pala e përfaqësuar nga avokati. Disa nga trashëgimtarët nuk kanë pranuar të plotësojnë kushtet ligjore të kontratës të nënshkruar me studion ligjore “Alderum Shpk”. Është shoqëruar edhe shtetasi Dritan Jani Nano, i dyshuar si organizator i ngjarjes kriminale.

Materialet do kalojnë në Prokurori për veprën penale “Vrasja e funksionarëve publikë mbetur në tentativë”, parashikuar nga neni 77/a dhe 22 të Kodit Penal. Operacioni vazhdon për kërkimin, lokalizimin dhe kapjen e 4 personave të shpallur në kërkim. Policia vë në dispozicion 20 mijë euro për çdo informacion të saktë, kushdo që ka informacione për autorët të telefonojë në numrin 112,″ tha Drejtori i Policisë Tiranës, Tonin Vocaj.

Kështu, duke hequr “fajin” e goditjes për vdekje të avokatit Sokol Mëngjesi sepse ishte avokat i Sali Berishës, shteti i Edi Ramës na thotë se profesori i nderuar i Drejtësisë u godit sepse fitoi çështjen e një kontesti gjyqësor për pronën, dhe ai u godit sepse ai që e fitoi gjyqin pas një kalvari shumëvjeçar zgjedh të vuaj dënimin 30 vjeçar dhe jo të zbatoj kontratën me avokatin!

Por, pamjet filmike që vërshuan rrjetet sociale tregojnë se nuk kemi të bëjmë thjeshtë me tre kriminelë që sulmojnë një avokat, por një qetësi absolute për të vrarë në qendër të qytetit edhe aty ku kalojnë fëmijë me prindërit e tyre.

Nëse Policia e Shtetit mendon se ka mbaruar misionin duke bërë të ditur se ishin Dorian Beqir Alia, Drivald Sokol Alia, Elton Ndue Kasaj dhe Romario Roberto Tabaku, që goditën për vdekje avokatin Sokol Mëngjesin pasi ishin porositur nga përfituesi i çështjes Dritan Nano, janë shumë gabim sepse tek qytetari vetëm sa u shtuan pikëpyetjet!

Avokati Sokol Mëngjesi në konfliktin për një pronë në zonën e Liqenit të Tiranës në mes dy familjeve, Brari dhe Sheqeri, arriti të fitoi çështjen për familjen Sheqeri që përfaqësonte.

Çfarë do ti ndodhte avokatit Sokol Mëngjesi nëse do të humbaste çështjen dhe do të fitonte familja Brari?!

Ose, çfarë do të ishte në gjendje të bënte Dritan Nano me avokat Sokol Mëngjesin sikur ai të dështonte në këtë proces gjyqësor, gjë që në shtetin e Edi Ramës nuk është e pamundur dhe shumë njerëz kanë humbur pronat e tyre legjitime, kur kemi një polici të këtij lloji që vë gjoba nëpër makina edhe për 3 minuta kur shoferët dalin të marrin tek blloku para në bankomat, dhe i duhen 10 orë për të dhënë një version për një rast ku dhunuesit as nuk kanë marrë mundimin të maskohen kur kryejnë krimin, ndërsa njeriu i sulmuar po lufton me jetën!

Ndryshe, sot rreth orës 08:50, në zonën e ish-Bllokut në Tiranë, tre persona i zunë pritë dhe e sulmuan me grushte dhe sende të forta profesorin e njohur të Fakultetit të Drejtësisë dhe avokatin e Kryetarit të PD, Sali Berisha, ku për pasojë Sokol Mëngjesi pësoi frakturë në kokë dhe dëmtime te zona e ballit dhe pas kokës. Nga këto goditje avokati Sokol Mëngjesi ka pësuar dëmtime në pjesën e trurit dhe hemorragji dhe sipas informacioneve të fundit nga Spitali i Traumës, gjendja shëndetsore e avokatit të Sali Berishës, Sokol Mëngjesi është përkeqësuar dhe profesori i njohur i Fakultetit Drejtësisë është futur në intubim.