Në shtetin e Edi Ramës, koncesionari i Aeroportit të Kukësit kërkon licencë tregtimi të energjisë

Kompania që zotëron 100 për qind të kuotave në koncesionin e Aeroportit të Kukësit Global Technical Mechanics duket se kërkon të zgjerojë aktivitetin e tij në sektorin e energjisë.

Bordi i Entit Rregullator në mbledhjen e fundit të datës 4 korrik njoftoi se do të fillojë “procedurën për licencimin e shoqërisë “GLOBAL TECHNICAL MECHANICS” shpk, në veprimtarinë e tregtimit të energjisë elektrike”.

Duke ndjekur procedurën standarde Enti njoftoi se do të priste opinione dhe komente nga palë të interesuara deri në datë 14 korrik.

Pas kësaj procedohet me vlerësimin e dokumenteve dhe kushteve që plotësohen nga pala që ka kërkuar licencimin deri në finalizimin për dhënien apo refuzimin e saj.

Kompania Global Technical Mechanics ka bërë ndryshimet pranë Qendrës Kombëtare të Bindësit sa i takon specifikave të aktivitetit duke nënvizuar edhe energjinë në maj të këtij viti.

Sipas përshkrimit kompania do të mund të kryejë ndër të tjera studim, projektim, zbatim, prodhim dhe tregtim i energjisë elektrike nga burime alternative si sistemet fotovoltaike, parqet e eres, termocentralet, biomasa etj.

Implementimi dhe menaxhimi i projekteve gjeneruese (fotovoltaike, eolike, hidrike) te energjisë elektrike, te cilat shfrytëzojnë burimet e rinovueshme te energjisë elektrike si dielli, era, uji si dhe i veprave te tyre ndihmese.

Po kështu pjesë e përshkrimit të aktivitetit është edhe shitja me shumice dhe pakice e energjisë elektrike tek operatoret, furnizuesit, tregtaret, konsumatorët e energjisë elektrike (vendas apo te huaj), si dhe ne Bursën Shqiptare te Energjisë Elektrike (ALPEX), apo Bursa te tjera te energjisë jashtë vendit. Përveç sa me sipër, Shoqëria mund te kryeje çdo aktivitet qe lidhet direkt ose indirekt, që është rezultat ose lidhet me objektin e mësipërm.

Sektori i energjisë ka një rritje të vëmendjes sidomos gjatë dy viteve të fundit për shkak të krizës e cila ka nxitur investime në funksion të diversifikimit por edhe për shkak të fitimit. Kompanitë që kishin tregim energjie apo prodhim në fokus të tyre gjatë vitit 2022 ishin në krye të listës së kompanive me fitim më të lartë në vend sipas të dhënave zyrtare të Tatimeve.

Ndërkohë nisja dhe funksionimi i bursës ALPEX ka bërë që një pjesë e mirë e këtyre kompanive tashmë të nisin të regjistrohen pranë saj edhe pse volumet që tregtohen mbeten ende të vogla./Monitor/