“Zhvillimi i biznesit”, shtohen ndërmarrjet, rritet xhiroja vjetore dhe tkurret numri i punonjësve

Sektori i biznesit shfaqi zhvillime kontradiktore në vitin 2024, ku pavarësisht shtimit të numrit të ndërmarrjeve aktive dhe rritjes së xhiros vjetore, tregu i punës ka pësuar një tkurrje të ndjeshme.

Sipas të dhënave finale të Anketës Strukturore të Ndërmarrjeve të publikuara nga INSTAT sot , numri i bizneseve aktive në 2024 u zgjerua me 2.2 për qind, teksa numri i të punësuarve në total zbriti në 551.189 persona, duke shënuar një rënie prej 1.6 për qind krahasuar me vitin paraprak 2023. Kjo rënie ka qenë më e theksuar te prodhuesit e të mirave, sidomos sektori i industrisë ku numri i krahut të punës u reduktua me 2.8 për qind, ndërsa prodhuesit e shërbimeve pësuan një tkurrje më të lehtë prej 0.9 për qind.

Kriza, industria më rënien më të fortë të punësimit

Analiza sipas aktiviteteve ekonomike dëshmon se industria përpunuese dhe sektori i energjisë, gazit e ujit ishin kontribuuesit kryesorë në këtë trend negativ të punësimit.

Industria përpunuese, e cila mbetet një nga punëdhënësit më të mëdhenj me mbi 95 mijë të punësuar, me rënie -3 për qind në krahasim me 2023. ndërsa numri i personave që punojnë në sektorin e energjisë dhe trajtimit të mbetjeve u reflektua ra m e-1 për qind.

Në krahun tjetër, megjithëse numri i të punësuarve ra, shitjet neto të ndërmarrjeve pësuan  rritje prej 4.5 për qind kjo e nxitur kryesisht nga sektori i tregtisë dhe ndërtimit.

Shërbimet,  bie numri i të punësuarve rritet vlera e shtuar

Sektori i shërbimeve vazhdon të dominojë ekonominë shqiptare duke punësuar 65.6 për qind të forcës totale të punës, ndonëse edhe brenda këtij grupi vihet re një riorganizim i burimeve njerëzore përballë sfidave të reja ekonomike.

Të dhënat tregojnë se ndërmarrjet po tentojnë të rrisin produktivitetin dhe xhiron e tyre me një numër më të kufizuar punonjësish, duke reflektuar mundësisht vështirësitë në gjetjen e krahut të punës ose automatizimin e proceseve në degë të caktuara të industrisë.

Numri i të punësuarve në sektorin e shërbimeve pësoi rënie vjetore me -1 për qind në 2024, teksa vlera e shtuar u rrit me 7.9 për qind.

Sektori i tregtisë vijon të mbetet shtylla kryesore e ekonomisë shqiptare, duke dominuar si në numrin e ndërmarrjeve, ashtu edhe në qarkullimin financiar. Me mbi 42 mijë ndërmarrje aktive, ky sektor përfaqëson 35.1 për qind të totalit të bizneseve në vend dhe realizon pothuajse gjysmën e shitjeve neto të të gjithë ekonomisë, konkretisht 46.1 për qind. Krahasuar me shërbimet e tjera, tregtia ka pasur ndikimin më të lartë pozitiv në rritjen e shitjeve neto me 2.7 pikë përqindje, duke lënë pas sektorët si ndërtimi apo akomodimi.

Në raport me forcën e punës, tregtia punëson 24.7 për qind të të gjithë të punësuarve në shkallë vendi, një shifër kjo që tejkalon çdo nënndarje tjetër të shërbimeve apo industrisë.

Megjithatë, pesha e shërbimeve të tjera po ashtu mbetet e konsiderueshme, ku grupi i aktiviteteve që përfshin transportin, informacionin dhe komunikimin zë 9.0 për qind të punësimit.

Ndërsa sektori i akomodimit dhe shërbimit ushqimor kontribuon me 10.2 për qind. Edhe pse prodhuesit e shërbimeve në tërësi pësuan një rënie të lehtë të punësimit prej 0.9 për qind, ata arritën të shënojnë rritjen më të lartë të shitjeve neto me 5.8 për qind, duke dëshmuar një efikasitet më të lartë ekonomik krahasuar me prodhuesit e të mirave./Monitor/