Në SPAK mesazh Dumanit, Berisha: Amnistimi i krimit elektoral, atentati më i rëndë ndaj zgjedhjeve të lira

Pasi zbatoi detyrimin ligjor të detyrimit të paraqitjes në SPAK, Kryetari i Partisë Demokratike, Sali Berisha, përveç mesazhit që la për kreun e Prokurorisë së Posaçme, Altin Dumani, ai zbardhi skenarin e përgjimit të Kryetarit të arrestuar të Bashkisë Tiranë, Erion Veliaj, në qeli si dhe përgjimet e Taulant Ballës ku zbullohen pazaret e Suel Çelës me dosjet e kësaj prokurorie që e detyron të paraqitet.

Si zakonisht, Kryetari i Partisë Demokratike iu drejtua mediave me mesazhin që i la Altin Dumanit:

“Amnistimi i krimit elektoral nga Dumani dhe Skapi i partisë është krimi antikushtetues dhe antidemokratik më i madh në historinë e pluralizmit politik. Është atentati më i rëndë ndaj zgjedhjeve të lira,” bëri të ditur mesazhin Sali Berisha që kishte lënë për kreun e Prokurorisë Posaçme ndërsa vazhdoi me përgjimet e Veliajt ku foli për Redaktorin, Edi Ramën, i cili natën i ndërsen kundër SPAK-ut dhe ditën i mbron.

“Tani, siç e don dhe transparenca, me të drejtë prisni t’u rrëfej se çfarë gjeta aty brenda, çfarë kishte në sallat dhe korridoret e Skapit të partisë.
Sot, aty takova Redaktorin. Redaktori është një person, të cilin mediat e censuruan.
Mediat dëshmuan se Erion Veliaj, Lal Vjedhësi, në telefonatat e tij të panumërta, i jepte të vëllait porosi për Mjero Bazen, për Bolinon, për Yzeirin e të tjerë. Por atë që u fshehën mediat ju, ua them unë.
Në urdhëresat dhe udhëzimet e tij ishte një shumë e veçantë. Për këtë çështje, thoshte, do pyetet Redaktori. Kjo çështje nuk do dalë pa u pyetur Redaktori,” tha lideri i opozitës para Prokurorisë Posaçm duke bërë të ditur se cili është dhe Redaktori.
“Redaktori ishte Edi Rama. Dëgjojeni miq se çfarë Jagoje i paskrupullt është.
Natën i ndërsente kundër Skapit, ditën sulmonte Etjenin se guxove të sulmonte Skapin.
Ndërkohë, statuset e para janë të gjitha të redaktuara nga Redaktori.
Po çfarë po bënte Redaktori këtu?
Redaktori këtu kishte vënë përpara një telajo dhe qejf e qejf po pikturonte mustaqet e Kujtim Gjuzit.
Po, i them unë, çfarë ke ti me këto mustaqe? Ti i ke tuat.
Epo këto të miat nuk më mbushin. E vërteta është kjo. Prandaj është i fiksuar.
Dhe çdo fjalë e tij çdo mëngjes fillon me mustaqet dhe mbaron pastaj e dini vetë me çfarë. Në fakt në burg e ka vendin. Një audit i gjithanshëm e pret,” tha Berisha duke vazhduar me publikimin e përgjimeve skandaloze të Ballës, ku zbulohen pazaret e Suel Çelës me dosjet e SPAK-ut.

“Tani vazhdojmë përsëri me personazhin më të inkriminuar pas Edi Ramës në Shqipëri dhe ky është Taulant Bego Yaris.
Taulanti është një personazh unik. A e dini ju të nderuar gazetarë që ai është edhe hajdut xhepash në kuptimin që nuk ngurron t’u kërkojë mbushmani kartën e telefonit, hidh ca mbushje në kartën time të telefonit.

Pra, ky është njeriu që përfaqëson Edi Ramën në Tiranë.
Në janar të vitit 2021, Sueli, kapoja i bandës së Elbasanit është në diskutim me pinin D787BO, e gjeni vetë ju ku është, por edhe unë do përpiqem, në lidhje me një çështje kundër tij, të nisur nga OFL. Dosja ndodhet në SPAK.
Pini D787BO thotë se ‘do ta kthej dosjen nga Spaku në OFL’.
E shihni pra se si bëhen pazaret dhe pastaj më thonë pse thua ti organizatë kriminale. Po çfarë është kjo apo jo? A nuk është pazar që më hiqni dosjen dhe çojani edhe njëherë policisë.
Pini D787BO thotë se do ta kthejmë dosjen nga SPAK në OFL dhe shpresoj te kushtet.
E kuptoni pra se si shpëtohen kriminelët duke bërë dosjet top futbolli nga Spaku tek OFL dhe duke i nxjerrë jashtë afateve ligjore të gjykimit.
Tani në fund thuhet se ‘Tao është plotësisht i vetëdijshëm për këtë’.
Domethënë do ta bëj se nuk ka ku të shkojë. Pra, kjo ishte sot për Taon dhe për Redaktorin.”

Me këtë rast, kreu i PD zbuloi se ishte Ministri i Drejtësisë ai i cili urdhëroi vendosjen e çimkave për Lali Vjedhësin.

“Po a mund t’u pyes ju se si ia keni fshehur popullit Redaktorin?
Ju i keni thënë të gjitha, por kur fshihni Redaktorin që dihet se është Edi Rama.
Megjithatë edhe Uluziu ka luajtur rolin e tij. Njeri më të pabesë, më të zi në shpirt, më të pakarakter se atë nuk ka. I ka shkuar natën si mik, duke i lëpirë dhe stërlëpirë Erion Veliajt dhe ka urdhëruar vendosjen e çimkave në të gjitha mjediset.
Uluziu pra është pjesë e këtij kurthi.
Në fakt, ta dini mirë, po edhe këtë nuk e thanë gazetarët, kur u ul Erioni në bankën e gjykatës dhe prokurori tha se kemi një dosje shtesë, atij pothuajse i ra të fikët, as gëk as mëk nuk bëri.
Unë ua them këtu me përgjegjësi, atij desh i ra tavani se nuk e priste të ishte i regjistruar pasi Uluziu i kishte dhënë çdo garanci se ai është njeriu i partisë siç ka qenë. Në asnjë rast pabesia nuk shpërblehet.
Në qoftë se donin të vinin çimka, të mos i aktivizonin ministra dhe zyrtarë më të lartë, por të shkonin në gjykatë, të merrnin leje në gjykatë siç është rregulli. Se ata edhe në qeli, në birucë kanë disa garanci.
Të mos bëj unë avokatin. T’ia lëmë Maks Haxhisë t’ia çojë ato cigare, të mos zë vendin e tij,” tha Kryetari i Partisë Demokratike, Sali Berisha, duke konsideruar se vendosja e çimkave kudo, kalon çdo lloj përmase ndërsa përfundoi:

“Erion Veliaj është regjistruar edhe duke folur në telefon fiks, edhe duke fjetur në shtratin e tij, edhe duke u ulur në tavolinë. Atë e kishin mbushur me sa duket me çimka në të gjitha anët.
Po, çdo i burgosur apo i paraburgosur ka të drejtat e tij.
Dhe përdorimi i kurtheve të vjetra, t’i çosh Uluziun për t’i dhënë siguri dhe më pas të kryesh këto veprime, do të thotë se kalon çdo lloj përmase, është si në tragjeditë e vjetra.”