Në takim me Abdixhikun, Osmani: Vlerësimin e Draftstatutit e bënë Kushtetuesja
Presidentja e Kosovës, Vjosa Osmani, në takim me kryetarin e Lidhjes Demokratike të Kosovës, LDK, Lumir Abdixhikun, e ka njoftuar për Draftin e Statutit të Asociacionit ndërsa ka ritheksuar se Gjykata Kushtetuese është institucioni që duhet ta bëjë vlerësimin e kushtetutshmërisë, duke u udhëhequr nga parimi i pavarësisë dhe profesionalizmit.
Në këtë takim, Vjosa Osmani e ka informuar Lumir Abdixhikun për zhvillimet në fushën e sigurisë dhe të politikës së jashtme, e në këtë kontekst, ka falënderuar të gjitha subjektet opozitare, për mbështetjen ndaj institucioneve të sigurisë në përballje me agresionin e Serbisë.
Sipas njoftimit të Presidencës, Abdixhiku e ka njoftuar Presidenten Osmani lidhur me shqetësimet e LDK-së sa i përket përmbajtjes së Draftit të Statutit të Asociacionit ndërsa kanë diskutuar mundësitë për trajtimin e këtyre shqetësimeve në mënyrë që mos të lejohen dykuptimësi që mund ta dëmtojnë funksionimin e brendshëm të Republikës së Kosovës.
Ftesa për takim u janë dërguar edhe subjekteve të tjera opozitare.
“Institucioni i Presidencës është vazhdimisht i hapur për koordinim me parti dhe institucione për çështje të rëndësisë nacionale,” thuhet në njoftimin e Presidencës.
Në kuadër të konsultimeve të fundvitit, krahas takimeve me krerë të institucioneve dhe të partive politike, Presidentja e Kosovës, Vjosa Osmani, do të mbajë takime edhe me përfaqësues të komuniteteve joshumicë në Parlament, me shoqërinë civile dhe me mediet.
