Në takim me Ambasadorët, Presidentja Osmani kërkon heqjen e masave të BE-së

Presidentja e Kosovës, Vjosa Osmani, në takim shefin e Zyrës së BE-së në Kosovë, Tomas Szunyog, Ambasadorin e Francës, Olivier Guerot, Ambasadorin e Italisë, Antonello De Riu, dhe Zv/Ambasadorin e Gjermanisë, Mathias Conrad, theksoi nevojën për heqjen e menjëhershme të masave të BE-së ndaj Kosovës sepse përveç se janë të padrejta, krijojnë dhe mungesë ekuilibri në dialog.

“Kosova ka ndërmarr hapa konkret në përputhje me planin e dakorduar për këtë çështje. Heqja e masave, theksoi ajo, do të krijonte atmosferë shumë më pozitive për vazhdimin e dialogut parimor ku të dyja palët do të trajtoheshin të barabarta,” tha Vjosa Osmani duke shtuar se Serbia nuk po përballet me përgjegjësi për nxitjen e sulmit ndaj ushtarëve të KFOR-it në maj e as për sulmin e agresionit kundër Kosovës në shtator të vitit të kaluar, thuhet në njoftimin e Presidencës së Kosovës .

Kjo situatë, Vjosa Osmanit, mund ta nxisë Serbinë që t`i shtojë veprimet destabilizuese në rajon.

Sipas njoftimit në këtë takim u diskutua edhe lidhur me përgatitjet që po bëhen për mbajtjen e zgjedhjeve në katër komunat në veri të vendit, në përputhje me legjislacionin në fuqi.

Presidentja Osmani ka ritheksuar se e drejta për të kërkuar largimin e kryetarëve nëpërmjet nënshkrimeve është e drejtë që u takon qytetarëve dhe se tani pret që në KQZ të kryhen të gjitha procedurat e nevojshme në përputhje me ligjin dhe udhëzimin administrativ në fuqi.

Po ashtu në takim është diskutuar edhe për zbatimin e rregullores së BQK-së.

“Presidentja ritheksoi se është me rëndësi që nuk po kërkohet që kjo rregullore të shfuqizohet, por thjesht që të punohet në një plan tranzicioni për zbatim të saj, e cila merr parasysh edhe shqetësimet e të gjithë qytetarëve që mund të afektohen nga një vendim i tillë. Duke ritheksuar rëndësinë e zbatimit të Kushtetutës në çdo cep të Kosovës, Presidentja ka shtuar se suksesi në këtë drejtim është i lidhur edhe me nivelin e bashkëpunimit me aleatët tanë të cilët kanë qenë gjithnjë mbështetësit më të fuqishëm të pavarësisë, sovranitetit dhe sigurisë së shtetit tonë.”