Në takim me Lajçakun, Kurti: Masat e padrejta, e bëjnë dialogun asimetrik

Në takim me të dërguarin e Bashkimit Evropian për dialogun Kosovë-Serbi, Miroslav Lajçak, Kryeministri Albin Kurti tha sot se masat ndëshkuese të BE-së ndaj Kosovës janë të padrejta dhe si të tilla e bëjnë dialogun asimetrik.

“Në vijim, Kurti shprehu përkushtimin dhe angazhimin e tij për de-eskalim dhe normalizim. Theksoi që Qeveria e Kosovës nuk kontribuon assesi në eskalim dhe se Policia e Kosovës vetëm zbaton ligjin e kujdeset për sigurinë publike. Po ashtu, Kryeministri Kurti konfirmoi që Policia e Kosovës e vendosur nëpër ndërtesat komunale nuk ka ndërmarrë operacione në rrethinën e atyre objekteve,” thekson Qeveria përmes një komunikate

Në lidhje me rrugën përpara, Kryeministri Kurti tha që Neni 72 i Ligjit për Vetëqeverisje Lokale e tregon qartë rrugën për zgjedhje të parakohshme nëpër komuna dhe se Qeveria në përpikëri mbështetë procedurat ligjore. Ndërkaq, sa i përket normalizimit të marrëdhënieve me Serbinë, garanci është zbatimi i plotë dhe pa kushte i Marrëveshjes Bazike e cila sjellë marrëdhënie të mira fqinjësore dhe evropiane për dy shtetet, citohet kryeministri Kurti në komunikatën e ekzekutivit.

Ndryshe, në takim me të ngarkuarin e BE-së për dialogun Kosovë-Serbi, ishin prezent edhe ambasadori i Kosovës në Bruksel, Agron Bajrami, Këshilltari i politik i kryeministrit, Jeton Zulfaj, Shefi i Zyrës së BE-së në Kosovë, ambasadori Tomas Szunyog dhe bashkëpunëtorët e tij Christian Ramet e Mikko Väyrynen.