Në Uzinën e Armëve në Gramsh, kapen dy rusë dhe një ukrainas
Një ngjarje e rëndë është shënuar në Uzinën e Përpunimit të Armëve në Gramsh. ku dy shtetas rus kanë debatuar dhe më pas kanë sulmuar me lëndë kimike ushtarakët që ruajnë perimetrin e godinës.
Incidenti i rëndë është konfirmuar nga autoritetet zyrtare, ku një shtetas rus, M. Z., 24 vjeç, një shtetase ruse S.T. 33 vjeçe dhe një shtetas ukrainas F. A., 25 vjec, kanë tentuar të hyjnë me aparate fotografike dhe harta në duar, brenda perimetrit të godinës së Uzinës së Armëve në Gramsh, ku nuk mund të hysh pa leje të posaçme nga autoritetet meqë ndodhen objekte dhe armë të rëndësisë të veçantë që ruhen nga Forcat e Armatosura të Shqipërisë.
Pasi shtetasit rusë janë pikasur nga rojet të cilët kanë kërkuar që të identifikohen, mes tyre ka patur një përplasje fizike dhe në këtë moment rusë i kanë sulmuar ushtarët shqiptarë me lëndë kimike.
Shërbimet e Policisë me të marrë njoftim kanë shkuar menjëherë në vendngjarje dhe kanë bërë shoqërimin e shtetasit rus, M. Z., 24 vjeç, në ambientet e Komisiaratit të Policisë Gramsh, për veprime të mëtejshme.
Gjithashtu, shërbimet e Policisë nga veprimet paraprake hetimore kanë marrë informacion se ky shtetas ishte shoqëruar edhe nga dy shtetas të tjerë dhe menjëherë kanë ngritur pika kontrolli dhe kanë kontrolluar zonën.
Shërbimet e Policisë bënë të mundur që në afërsi të kësaj zone të konstatojnë dhe të bllokojnë automjetin tip “Chevrolet”, me të cilin udhëtonin shtetasja ruse S.T. 33 vjeçe dhe shtetasi ukrainas F. A., 25 vjec, të cilët janë shoqëruar për veprime të mëtejshme.
Gjatë kontrollit që ju është bërë personave të huaj u janë gjetur dhe sekuestruar mjete fotografike, ku në mikroçipe janë kapur foto të Uzinës së Armëve Gramsh.
Ndërkohë, ushtarakët e plagosur shqiptarë që janë gjetur nga kolegët, në tokë pa ndjenja, janë shtruar në spitalin e Traumës.
Në hetimet për ngjarjen është përfshirë Ministria e Mbrojtjes dhe Shërbimi Informativ Shtetëror, pasi dyshohet se këta shtetas të huaj kanë ardhur me mision në Shqipëri.
