Në veri të Mitrovicës shënohet dyvjetori i vrasjes së Ivanoviçit

Në veri të Mitrovicës sot u shënua dyvjetori i vrasjes së politikanit serb, Oliver Ivanoviç, i cili ka udhëhequr Nismën Qytetare “Liria, demokracia, drejtësia”.

Në vendin e vrasjes u mbajtën dy ngjarje përkujtimore – njëra e organizuar nga Nisma e tij qytetare, tjetra nga familja, raporton RFE. Ksenija Bozhoviç, nënkryetae e Nismës “Liria, demokracia, drejtësia”, tha se ende nuk dihet se kush e ka porositur vrasjen e Ivanoviçit.

“Do të punojmë të gjithë së bashku që kjo vrasje të ndriçohet dhe që urdhëruesit e saj dhe kryesit e saj të dalin para drejtësisë”, u tha Bozhoviç.

Edhe kryetari i komunës Mitrovicë Veri, Goran Rakiç, u bëri thirrje institucioneve përgjegjëse, para së gjithash prokurorisë dhe gjyqësorit, që sa më parë të gjejnë urdhëruesit e vrasjes.

Oliver Ivanoviç është vrarë më 16 janar të vitit 2018, para zyrës së partisë së tij në veri të Mitrovicës.

Më 2 dhjetor të vitit të kaluar, Prokuroria Speciale e Kosovës ka ngritur aktakuzë kundër gjashtë personave, në lidhje me këtë vrasje.