Në Wilson Center, Kurti: Dialogu Kosovë-Serbi, jo me harta dhe presidentë rrotull!
Dialogu Kosovë-Serbi nuk duhet të ndërtohet mbi harta dhe mbi harta nuk duhet të ketë presidentë rrotull si në të kaluarën, tha Kryetari i Lëvizjes Vetëvendosje, Albin Kurti, duke sqaruar dhe parakushtet për normalizimin e raporteve mes Kosovës dhe Serbisë, në diskutimin e organizuar nga Instituti i njohur ndërkombëtar Wilson Center në SHBA ku u trajtuan temat aktuale politike të Kosovës ndërsa e bëri të qartë se synim përfundimtar i këtij procesi do të duhej të ishte përmirësimi i jetës së qytetarëve dhe jo kompensimi i Serbisë për humbjet që i pësoi regjimi gjenocidal i Milosheviçit në vitet ’90
“14 shkurti do të jetë referendum, i cili do t’ua mundësojë qytetarëve të zgjedhin mes koniukturave të vjetra dhe politikanëve të një epoke të re, për t’u përballur me krizat e shumëfishta të cilat po e rëndojnë gjendjen e qytetarëve. Përmirësimi i situatës socio-ekonomike të vendit është i mundur vetëm nëpërmjet zhvillimit ekonomik, që varet edhe nga investimet e jashtme direkte, me theks tek ato nga diaspora e vendit tonë. Në 20 vitet e fundit, këto investime u pamundësuan nga korrupsioni i lartë e krimi i organizuar i elitës së vjetër. Prandaj, reforma në drejtësi dhe sundimi i ligjit janë parakushte për zhvillimin ekonomik,” tha Albin Kurti duke informuar pjesëmarrësit se të gjitha këto hapa janë paraparë në Alternativën Qeverisëse të Lëvizjes Vetëvendosje e cila, sipas tij, ndërtohet rreth dy kërkesave bazë të qytetarëve: Punë dhe Drejtësi.
Me qindra pjesëmarrës të kësaj ngjarjeje, përgjithësisht ekspertë ndërkombëtar, ishin të interesuar të njihen me qendrimet e Vetëvendosjes në lidhje me raportet me vendet e rajonit, në veçanti për dialogun me Serbinë.
“Dialogu duhet të jetë një proces i cili bazohet në përmbajtjen e marrëveshjes, e jo në ngutinë për ta arritur atë. Dialogu nuk duhet të ndërtohet mbi harta dhe mbi harta nuk duhet të ketë presidentë rrotull si në të kaluarën. Parakusht për normalizimin e raporteve mes Republikës së Kosovës dhe Serbisë, duhet të jetë normalizimi i vetë vendeve nëpërmjet këtij procesi,” tha Kurti duke shtuar se Serbia nuk është një vend demokratik, ajo refuzon të ballafaqohet me të kaluarën, prandaj ky proces dialogues i ndërmjetësuar nga BE dhe SHBA, së pari do të duhej ta normalizonte Serbinë.
Synim përfundimtar i këtij procesi do të duhej të ishte përmirësimi i jetës së qytetarëve dhe jo kompensimi i Serbisë për humbjet që i pësoi regjimi gjenocidal i Milosheviçit në vitet ’90, tha Kryetari i Lëvizjes Vetëvendosje duke përfunduar:
“Një marrëveshje mes Republikës së Kosovës dhe Serbisë, e cila bazohet në vlera dhe parime, përveçse në fakte e interesa, do të kishte ndikim pozitiv në tërë rajonin, i cili së bashku duhet të përparojë drejt integrimeve evropiane dhe euro-atlantike. Procesi i integrimit mund të përshpejtohet me një bashkëpunim më intensiv të vendeve të rajonit në kuadër të Procesit të Berlinit që duhet avancuar nga një “Plan Marshal” për Ballkanin Perëndimor, që do të ndihmonte në demokratizimin e vendeve, zhvillimin e ekonomive të tyre dhe bashkimin e qyteteve të ndara, të cilat mbesin si plagë të hapura në disa vende të Ballkanit.”
Ndryshe, ky diskutim u moderua nga ekspert i marrëdhënieve ndërkombëtare dhe Drejtori i programit të Evropës në kuadër të Wilson Center, Daniel Hamilton.
