Në Zagreb, Presidentja Osmani: Serbia është autore e krimit terrorist të 24 shtatorit!

Financimi, trajnimi i grupeve terroriste, armët dhe videoinçizimet nga dronët janë prova të identifikuara që dëshmojnë autorësinë e shtetit serb në sulmet terroriste të 24 shtatorit në veri të Kosovës, tha Presidentja Vjoa Osmani në Zagreb pas takimit me Presidentin e Kroacisë, Zoran Milanoviç.

“Provat janë të katër natyrave të ndryshme, të parat janë prova të cilat i kemi mbledhur qe disa muaj rresht, që kanë të bëjnë me financimin e drejtpërdrejtë nga shteti serb të çdo anëtari të dy organizatave terroriste. Për këto provat janë mbledhur qe një kohë të gjatë dhe shteti serb as nuk e fsheh një gjë të tillë, pra e bëjnë me vendime zyrtare të nënshkruara nga zyrtarët e lartë shtetëror. Financimi ka ndodhur qe një kohë të gjatë,” tha Vjosa Osmani duke vazhduar me provat e radhës, trajnimin e grupeve terroriste në baza ushtarake si Rashka si dhe video incizimet nga dronat që terroristët i kanë lënë kur ikën nga Kosova:

“Ekzistojnë video incizime të këtyre trajnimeve ku Ministria e Mbrojtjes dhe Ushtria Serbe i kanë trajnuar në vazhdimësi anëtarët e ‘Mbrojtjes Civile’ dhe ‘Brigada Veriore’, si dy organizata terroriste. Shteti serb nuk po e mohon madje në një deklaratë të ministrit të Mbrojtjes e kanë pohuar një gjë të tillë.”

Dhe në fund, si provë e katërt janë armët, të cilat janë kontrabanduar që disa muaj nëpërmjet rrugëve ilegale në veri të Kosovës.

“Nga ajo çka kemi konfiskuar dëshmohet se shumica dërrmuese është prodhuar në industrinë ushtarake serbe dhe bazuar në parimin ku shteti ka kujdestarinë e vetme të armëve. Ato armë mund të merren vetëm e vetëm në ushtrinë serbe dhe industrinë ushtarake serbe, të prodhuara në masë të madhe në vitin 2022”, ka thënë Osmani.

Kroacia garanton përkrahjen

Presidentja e Kosovës, Vjosa Osmani tha se ka marrë përkrahjen e Presidentit kroat, Zoran Milanoviç për situatën e krijuar në Kosovë pas sulmeve terroriste të grupeve serbe në veri.

“Presidenti Milanoviç shumë qartë e dëshmoi, e ritheksoi edhe njëherë përkrahjen e tij si president i Kroacisë edhe në raportet me ngjarjet e fundit dhe sfidat e sigurisë me të cilat po ballafaqohet Kosova pas aktit e agresionit të 24 shtatorit,” tha Presidentja Osmani duke shtuar se Kroacia nëpërmjet përkrahjes së Republikës së Kosovës e përkrah paqen dhe stabilitetin në gjithë rajonin tonë.

“Kroacia punon që rajoni i Ballkanit Perëndimor të ec para, e jo ta kthej rajonin prapa në vitet e 90’ta.”

Frenimi i Serbisë i domosdoshëm, masë parandaluese për të ardhmen

Me këtë rast, Presidentja Vjosa Osmani u ka bërë thirrje aleatëve perëndimor për sanksionimin e Serbisë, duke theksuar se mosveprimi do të sjellë inkurajimin e tyre për sulme ndaj Kosovës.

“Pas aktit të agresionit të 24 shtatorit, fokusi duhet të jetë te vënia e të gjithë autorëve para drejtësisë së Republikës së Kosovës, marrja e garancive të forta të sigurisë sidomos për ta ruajtur kufirin ndërmjet Kosovës e Serbisë si dhe frenimi e sanksionimi i Serbisë për veprimet e saj si masë parandaluese për sulmet e tjera në të ardhmen,” tha Presidentja e Kosovës duke shtuar se sipas të gjitha provave, qëllimi i grupeve terroriste që sulmuan Kosovën më 24 shtator ka qenë aneksimi i veriut.

“Nëse nuk merren masa nga komuniteti euroatlantik, Serbia do të ndihet më e inkurajuar për të vazhduar me akte e sulme tjera me qëllimin përfundimtar, me atë që është dëshmuar nga të gjitha provat, aneksimi i veriut të Kosovës,” tha Osmani duke garantuar se Kosova mbetet e palëkundur në vizionin dhe përpjekjet e saj për të pasur raporte të mira fqinjësore me të gjitha shtetet e Ballkanit Perëndimor, ndërsa pret nga bashkësia ndërkombëtare qartësi strategjike, ndërkaq nga Kroacia vazhdim të bashkëpunimit për këtë sfidë të sigurisë.

“Kosova në periudhën e fundit po përballet me një prej situatave më të rënda në 25 vitet e fundit, shkaku i veprimeve hibride nëpërmjet aktiviteteve terroriste dhe agresionit të sponsorizuara dhe urdhëruar nga Serbia. Shpresoj që partnerët ndërkombëtarë do të dëshmojnë qartësi strategjike dhe veprime të vendosura për ta ndaluar përpjekjen e Serbisë për destabilizim jo vetëm të Kosovës por gjithë rajonit,” tha Presidentja Vjosa Osmani Osmani duke siguruar se Kosova po punon për synimin strategjik për anëtarësim në NATO dhe BE, duke i njohur ato edhe si garanci për paqen dhe stabilitetin e qëndrueshëm në gjithë rajonin.

Milanoviç: Kroacia arriti të luftojë dhe të triumfojë ndaj Serbisë përgjatë historisë

Presidenti i Kroacisë, Zoran Milanoviç tha se Serbia duhet t’i japë disa përgjigje për sulmin e 24 shtatorit në Banjskë të Zveçanit, në veri të Kosovës.

Pas takimit me homologen kosovare Vjosa Osmani, Milanoviç tha se në bazën e ushtrisë serbe ku u dëshmua se është stërvitur grupi terrorist, duhet aprovim për t’u futur aty.

“Për t’u futur aty brenda, duhet të kesh aprovimin e dikujt. Armët, trajnimet, xhirimet që kanë lënë, të gjitha këto gjëra kanë mbetur në dispozicion të Kosovës. Kroacia arriti të luftojë dhe të triumfojë ndaj Serbisë përgjatë historisë, natyrisht me çmim shumë të madh. Janë krijuar shumë vrasje, gjëra të ndryshme, komplote, por, tani nuk jemi në vitin 1014, jemi në vitin 2023,” tha Zoran Milanoviç ndërsa Vjosa Osmani duke fol për ngjashmërinë në mes të Kroacisë e cila është përballur me agresionin serb në vitet e 90’ta dhe Kosovës që po vazhdon të ndjejë këtë agresion edhe sot, përfundoi.

“Ka pak shtete në Evropë që e kuptojnë sfidën me të cilën po përballemi, kush më mirë se Kroacia. Kroacia në fillim të viteve të 90’ta u përball me grupet paramilitare serbe që kishin mbështetjen politike, financiare, organizative dhe ushtarake nga regjimi i atëhershëm në Beograd. Ndaj siç ka qenë deri më tani, presim mbështetjen e Kroacisë në këtë sfidë të rëndë të sigurisë, e cila nuk synon destabilizimin  vetëm të Kosovës por mund të ketë pasoja shumë më të gjera.”