Negociatat/ Hahn: Vettingu i BE për Shqipërinë ka filluar

Komisioneri për zgjerimin e BE, Johannes Hahn tha se procesi i vettingut të gatishmërisë së Shqipërisë dhe Maqedonisë për negociata ka filluar ndërsa shtoi se është “shumë i bindur” që negociatat me këto dy vende mund të fillojnë vitin e ardhshëm..

“Kjo është një punë shumë gjithëpërfshirëse dhe shpresoj se mund ta përfundojmë atë për 14 muaj. Qëllimi është që Shqipëria dhe Maqedonia të marrin dritën jeshile nga të gjitha shtetet anëtare nga mesi i vitit të ardhshëm”

Duke folur në një intervistë për revistën e BE, “Politico”, Komisioneri për zgjerimin, tha se është dakord me Macron se Bashkimi Evropian, para planifikimit të zgjerimit duhet të përqëndrohet tek reformimi i bllokut, por thekson se qytetarët e vendeve të Ballkanit Perëndimor kanë të drejtë të bëhen qytetarë të BE dhe se reformat dhe negociatat mund të zhvillohen në të njejtën kohë.

Hahn me këtë rast e pranoi se Bashkimi Evropian po përballet me zgjedhjen në mes të eksportit të stabilitetit në rajon dhe importit të destabilitetit në BE.

Meqë planet aktuale të Bashkimit Evropian kanë lënë Kosovën dhe Bosnje Hercegovinën edhe pa një afat të përkohshëmpër fillimin e negociatave, pengesa më e madhe për Kosovën thekson ai është marrëdhënia me Serbinë e cila duhet të zgjidhet ndërsa pushteti atje në masën më të madhe mbështetet nga të ardhurat e doganave. Dhe kjo duhet të ndryshoj shumë shpejtë para se të mundësohet anëtarësimi në tregun e përbashkët të BE.

Për Bosnje Hercegovinën, Hahn mendon se struktura politike, si rezultat i Marrëveshjes paqësore të Daytonit nga viti 1995, duhet të ndryshoj.

Shqetësimi për Kinën

Edhe pse vitet e fundit është prezent shqetësimi për rolin e Rusisë në Ballkan, më shumë arsye për shqetësim, sipas Hahn, duhet të ketë për Kinën e cila ka investime të rëndësishme në projektet e infrastrukturës në këtë rajon.

I pyetur nëse Pekini mund të krijoj “Kalin e Trojës”, duke përdor forcën financiare  në mënyrë që të ketë kontroll politik ndaj vendeve që pretendojnë të anëtarësohen në BE, Hahn rikujtoi se autostradën në Mal të Zi e ka ndërtuar dhe financuar pikërisht Kina.

“Ky është rasti me autostradën e famshme në Mal të Zi. Ky është një lloj modeli i biznesit të kinezëve, që të ofrojnë hua pak a shumë joshëse, e më pas, nëse nuk ju shërbeni, ata këtë e shndërrojnë në kapital,” tha Hahn, duke tërhequr vërejtjen se duhet të jemi të ndërgjegjshëm me konceptin strategjik të Kinës për të reaguar në mënyrëne duhur.

Kjo, vlerësoi Komisioneri për zgjerimin e BE, Johannes Hahn, do të jetë njëra ndër sfidat më të mëdha të Evropës.