Negociatat me BE/ 9 kushte për Shqipërinë, Basha: Dështim i Qeverisë!

Pas vendimit të partive qeverisëse në Bundestag, që Shqipërisë ti hapen negociatat për anëtarësim në BE pasi të jenē plotësuar 9 kushte, Kryetari i Partisë Demokratike, Lulzim Basha, duke i shpreh mirënjohjen ligjvënësve gjermanë dhe në veçanti partive simotra CDU-CSU, të cilat rikonfirmuan vullnetin e tyre për të mbështetur Shqipërinë në rrugën e saj drejt anëtarësimit në Bashkimin Europian shpreh shqetësimim për shtimin e kushteve.

“Shtimi i kushteve dhe kërkesa për zgjidhjen e krizës politike shprehin shqetësimin e sinqertë për hapat mbrapa që Shqipëria ka shënuar që nga qershori 2018. Këto kushte dhe kërkesa reflektojnë dështimet e qeverisë dhe jo të popullit shqiptar. Në veçanti kërkesat e reja për arrestimin dhe proçedimin penal të personave të përfshirë në blerjen e votave dhe kërkesa për të vendosur mbi legjitimitetin e proçesit farsë të 30 qershorit reflektojnë qartë se dështimi dhe përgjegjësia për moshapjen e negociatave është e Edi Ramës dhe askujt tjetër.”

Vendimi i CDU/CSU dhe SPD për çeljen me kushte të negociatave, thekson Kryetari i PD, Lulzim Basha, në reagimin e tij përmes rrjetit social Facebook, e ndihmon Shqipërinë për të kapërcyer krizën e rëndë politike, për të zhvilluar zgjedhje të lira e të ndershme dhe për një drejtësi të pavarur që ndëshkon politikanët e korruptuar dhe të lidhur me krimin, ndërsa përfundon:

“Në emër të Partisë Demokratike dhe të Opozitës së Bashkuar, garantoj të gjithë shqiptarët dhe partnerët tanë se do të bëjmë gjithçka që vendit tonë t’i hapen negociatat sa më parë.”