Negociatat me BE/ Holanda: Shqipëria duhet të luftojë krimin dhe korrupsionin

Në prag të mbledhjes së Këshillit të Ministrave të BE që pritet të zhvillohet më 15 Tetor në Luksembrug, e ku pritet të diksutohet edhe për çështjen e zgjerimit, me rekomandimin e Komisionit Evropian për çeljen e negociatave me Shqipërinë dhe Maqedoninë e Veriut, vijnë dhe dy kundërshimet nga Franca dhe Holanda.

Kështu, Franca vazhdon të jetë kundër dhe nëse deri më 15 tetor Parisi është kundë vendimit unanim, atëherë vendimi do të shtyhet për më datë 18 tetor, ditë kur përmbyllet Samiti i BE në Luksemburg.

Ndërkohë Holanda pas diskutimeve që zhvilloi mbrëmë, është shprehur se Shqipëria ka ende shumë punë për të bërë. Duke kërkuar fillimisht që Shqipëria dhe Maqedonia e Veriut të trajtohen të ndara sa i përket hapjes ose jo të negociatave me Bashkimin Evropian, përmes një deklarate të Ministrisë së Jashtme e cila u shpërnda nga Ambasada holandeze në Tiranë, Holanda thekson se po ndjek në mënyrë kritike progresin në të dyja vendet dhe është e mendimit se Këshilli duhet të vlerësojë secilin vend sipas meritave të veta.

“Keshilli ka parashtruar një sërë kriteresh për t’u përmbushur nga Shqipëria përpara hapjes së negociatave. Holanda e mirëpret punën e madhe dhe hapat e ndërmarra në vitin e fundit. Holanda mendon se më shumë punë duhet bërë në luftën kundër korrupsionit dhe krimit të organizuar,” thekson Ministria e Jashtme ndërsa për Maqedoninë e Veriut shton:

“Vendet kandidate duhet të përmbushin kushtet strikte përpara se të bëjnë një hap tjetër në procesin e integrimit. Në Qershor 2018, Këshilli parashtroi një sërë kriteresh për t’u përmbushur nga Maqedonia e Veriut përpara hapjes së negociatave. Progresi i bërë është inkurajues. Gjithashtu, marrëveshja e Prespës është një shembull për rajonin. Vazhdimësia e rasteve të ndërmarra nga Prokuroria Speciale është siguruar me dorëzimin te Prokurori i Përgjithshëm. Një hap i rëndësishem që ende duhet të ndërmerret është miratimi i ligjit që garanton prokurorinë e pavarur në rastet e ardhshme të korrupsionit në nivelet e larta.”