Negociatat me BE/ Macron nuk pranon ”të gabojë” përsëri me Shqipërinë!
Në përpjekje për të bashkërenduar qëndrimet për të ecur përpara me projektet evropiane në politikën e jashtme, mbrojtjen dhe energjinë, në prag të Saimitit të liderëve të BE u zhvilluan bisedime në qytetin francez Toulouse në mes të Presidentit të Francës, Emmanuel Macron dhe Kancelares së Gjermanisë, Angela Merkel, por që ishin fatale për Shqipërinë.
Derisa Kancelarja Merkel tha thjeshtë që ka diferenca, Presidenti Macron u shpreh hapur kundër hapjes së negociatave me Shqipërinë. Liberalizimin e vizave pa çeljen e negociatave, Emanuel Macron e quajti gabim sepse solli në Francë, sipas tij, fluksin e emigrantëve të paligjshëm, mijëra kërkesa për azil dhe kriminalitetin në rritje.
“Kemi disa diferenca sa i përket problematikave që janë shfaqur. Ashtu siç e dini, duhet një vendim unanim për çeljen e negociatave,” tha shkurt Kancelarja Merkel.
Presidenti Macron duke e pranuar se Ballkani Perëndimor është i rëndësishëm për Europën, ai është prerë se duhet gjetur një tjetër mënyrë të zgjerimit sepse heqja e vizave para nisjes së negociatave nuk ka kuptim.
“Dua të them, se ashtu si kancelarja, mendoj se ky rajon është me një rëndësi strategjike për Europën. Mendoj se kemi ende gjëra të tjera për të finalizuar, më pas të hapim negociatat.
Mendoj që duhet ta reformojmë këtë procedurë që është aktualisht e pakthyeshme kemi dhe gjëra të çuditshme në këtë proces. Për shembull kemi lëvizjen e lirë përpara se të hapen negociatat.
Kemi lëvizjen e lirë me Shqipërinë pa hapur negociatat dhe kjo është një lloj marrëdhënie e çuditshme. Në mirëbesim kemi dhënë lëvizjen e lirë dhe kemi mijëra e mijëra persona që kërkojnë azil nga ky vend,” tha Macron duke e vlerësuar gabim liberalizimin e vizave. Dhe jo vetëm kaq!
“Me Shqipërinë i bëmë gjërat mbrapsht, hoqëm vizat dhe u shndërruan në shtetin e dytë për numrin e azilantëve,” tha Emmanuel Macron duke konfirmuar se pse është i prerë kundër çeljes së negociatave me Shqipërinë:
“Shqipëria përfitoi liberalizimin e vizave dhe çfarë bënë shqiptarët? Na dyndën me azilkërkues.”Kështu, nesër më 17 Tetor fillon Samiti dyditor i liderëve të BE në Bruksel pa një Marrëveshje të Këshillit të Ministrave të Bashkimit Evropian për çeljen e negociatave me Shqipërinë dhe Maqedoninë e Veriut, me shumë Drafte që qarkullojnë lidhur me dhuratën të paktën për Shkupin zyrtar për Marrëveshjen e Prespës, dhe së fundi pa një bashkërendim nga Toulouse në mes të Kancelares Merkel dhe Macron ku ky i fundit “nuk pranon të gabojë për herë të dytë”!
