Negociatat për paqe Ukrainë-Rusi vazhdojnë nesër, luftimet nuk ndalojnë
Negociatat në mes të Moskës dhe Kievit pritet të rinisin nesër, tha këshilltari i Presidencës ukrainase, Mikhailo Podolyak ndërkohë Zëdhënësi i Kremlinit, Dmitry Peskov, tha se Moska nuk e përjashton mundësinë e vendosjes nën kontroll të plotë të qendrave të mëdha urbane.
Kështu, pas takimit të katërt që është zhvilluar sot, me qëllim të dhënies fund të pushtimit rus në Ukrainë konstatohet se të gjitha raundet e negociatave kanë përfunduar pa marrëveshje.
“Është marrë vendim për një pauzë në negociata deri nesër,” tha këshilltari i Presidencës ukrainase, Mikhailo Podolyak përmes rrjetit social Twitter, pasi të dyja palët patën rritur shpresat gjatë fundjavës për arritje të një marrëveshjeje.
Ndërkohë Zëdhënësi i Kremlinit, Dmitry Peskov, ndonëse tha se Moska ka planifikuar të shmangë viktimat civile dhe të përmbahet nga sulmet në qendrat kryesore të popullsisë, duke përfshirë Kievin, nuk e përjashtoi mundësinë se do ti vëjë nën kontroll.
Për Televizionin Rossiya 24, Peskov e pranoi se lufta urbane do të çojë në mënyrë të pashmangshme në një numër të madh viktimash midis civilëve.
“Ministria e Mbrojtjes, duke garantuar sigurinë maksimale të popullatës paqësore, nuk e përjashton mundësinë e vendosjes nën kontroll të plotë të qendrave të mëdha të popullsisë, me përjashtim të zonave që përdoren për evakuime humanitare”, tha Peskov duke konstatuar:
“Zyrtarët e SHBA-së dhe BE-së, po e shtyjnë Rusinë drejt sulmeve në qytetet kryesore në Ukrainë, me qëllim që të hedhin përgjegjësinë për vdekjet e civilëve mbi vendin tonë,” tha Peskov duke përfunduar:
“Ne mendojmë se një qëndrim i tillë është provokues”, tha Peskov.
Aktualisht gjendja e avancimit të forcave ruse në Ukrainë është kjo:
Vdiq shtatzëna që Moska e akuzoi si aktore
Gruaja shtatzënë, e plagosur nga bombardimet ruse në një maternitet në qytetin e Mariupolit, të cilën Moska e akuzoi si aktore, raportohet se ka vdekur sot së bashku me foshnjën e saj.
Sulmi mbi maternitetin e qytetit të Mariupolit ndodhi të mërkurën e kaluar, kur u vranë edhe së paku tre persona të tjerë. Pas sulmit, gruaja u dërgua në një spital tjetër. Foshnja e saj lindi me prerje cezariane, por nuk dha shenja jete, thanë mjekët ukrainas për agjencinë e lajmeve Associated Press.
Mjekët thanë se nuk kanë pasur kohë ta merrnin emrin e gruas, përpara se burri dhe babai i saj të vinin për të marrë trupin e saj.
Britania: Po i ndihmojmë Gjykatës Ndërkombëtare Penale të hetojë krimet e luftës
Sekretari britanik i Drejtësisë, Dominic Raab, ka qenë në Gjykatën Ndërkombëtare Penale në Hagë, për të ofruar ndihmë për një rast rreth gjykimit të mundshëm të krimeve të luftës në Ukrainë.
Raab tha se presidenti rus, Vladimir Putin po përgjigjet në mënyrë edhe më barbare në Ukrainë.
“Kushdo që ka kryer krime të luftës në Ukrainë, duhet të mbahet përgjegjës,” tha Raab duke shtuar se Britania është duke ofruar ndihmë teknike dhe financiare./RFE/
