Nën akuzat për abuzim dhe korrupsion, ARRSH rinis pagesat për bizneset

Dhjetori renditet me intensitetin më të lartë të pagesave buxhetore në krahasim me muajt e tjerë të vitit, për shkak se çelen fondet për llogari të bizneseve që kanë kontrata me qeverinë, kryesisht për investime.

Këtë fund-vit, për shkak të problemeve me drejtësinë në kupolën drejtuese të Ministrisë së Infrastrukturës dhe Autoritetit Rrugor Shqiptar, pagesat u limituan vetëm për udhëtime dhe paga, teksa thuajse ishin zero pagesat për bizneset nga mesi i nëntorit deri në fillim të kësaj jave.

Këto ditë Ministria e Infrastrukturës dhe entet e saj, sidomos ARRSH, kanë intensifikuar dhënien e fondeve. Me datë 17 dhjetor u çelën gjithsej 4 miliardë lekë ose 40 milionë euro nga thesari, nga të cilat rreth 1 e treta, mbi 1,1 miliardë, ishin pagesa për llogari të ARRSH-së, sipas të dhënave zyrtare nga Thesari i Ministrisë së Financave. Gati gjysma e pagesave ditore nga ARRSH-ja, një shumë prej rreth 756 milionë lekësh, u paguan për kompaninë Albavia, e cila ndër të tjera ka qenë edhe kontraktore për punimet në Unazën e Madhe, konkretisht në Lotin 2 të saj.

Autoriteti Rrugor Shqiptar është një nga entet më të mëdha shpenzuese publike, me një fond në dispozicion këtë vit rreth 37,6 miliardë lekë, rreth 380 milionë euro. Shumica e tyre alokohen përgjatë muajit dhjetor sipas planifikimeve buxhetore. Këtë dhjetor intensiteti i pagesave është vonuar për shkak të hetimeve dhe akuzave për korrupsion nga SPAK që kanë përfshirë Ministrinë e Infrastrukturës dhe drejtuesit e ARRSH-së. Hetimet kanë zbuluar abuzime të rënda me fondet, shmangie nga projektet, manipulim të garës dhe cilësi të dobët të punimeve.

Përqendrimi i pagesave buxhetore në dhjetor ka marrë kritika nga institucionet financiare ndërkombëtare si FMN, po edhe nga Kontrolli i Lartë i Shtetit.

Në dhjetor të vitit të kaluar shpenzimet buxhetore arritën në 152 miliardë, që përbënin 21% të gjithë shpenzimeve vjetore. Kontrolli i Lartë i Shtetit zbuloi devijim të fortë të fondeve.

Fenomeni i përqendrimit të shpenzimeve në dhjetor ka rritur ndjeshëm riskun fiskal të vendit, duke ekspozuar financat publike ndaj pasigurive të krijuara nga menaxhimi jo i kujdesshëm i likuiditeteve, zgjerimi i angazhimeve kontraktuale përtej hapësirës së miratuar dhe zbatimi jo i rregullt i planifikimit afatmesëm buxhetor.

Në dekadën e fundit qeveria shqiptare ka investuar gati 10 miliardë euro në infrastrukturë, por nga ana tjetër nuk ka një regjistër dhe inventar asetesh publike për të qartësuar publikun se ku janë investuar taksat e tyre./Monitor/