Nenad Rashiç emërohet ministër në Qeverinë e Kosovës

Kryetari i Partisë Demokratike Progresive me seli në Graçanicë, Nenad Rashiç, është emëruar në pozitën e ministrit për Komunitete dhe Kthim në Qeverinë e Kosovës.

Këtë post deri në fillim të muajit nëntorit e mbante Goran Rakiç, i cili ka dhënë dorëheqje pas vendimit të Qeverisë së Kosovës për të riregjistruar targat ilegale serbe në veri të Kosovës.

Për të njëjtën arsye, dorëheqje nga institucionet e Kosovës kanë dhënë edhe zyrtarë tjerë serbë nga veriu.

Vitet e fundit, Nenad Rashiç ka vepruar si politikan opozitar serb në Kosovë. Para formimit të Listës Srpska më 2013, partisë më të madhe të serbëve në Kosovë, ai ka qenë deputet i Parlamentit të Kosovës dhe pjesë e Qeverisë.

Më 2020, kryeministri i Kosovës, Albin Kurti, e emëroi Rashiçin si Drejtor të Zyrës për Komunitete, mirëpo ai dha dorëheqje pas ngritjes së aktakuzës ndaj tij nga Prokuroria Speciale.

Ndërkohë, Gjykata Themelore në Prishtinë e ka liruar atë nga aktakuza për keqpërdorimin e postit dhe autoritetit zyrtar.