Nënkryetari i LDK-së: Nuk i besoj Qeverisë Hoti!

Një ditë para votimit të Qeverisë së re të Kosovës e cila pritet të kryesohet nga kandidati i Lidhjes Demokratike të Kosovës, Avdullah Hoti, Nënkryetari i LDK-së, Lutfi Haziri, tha se nuk i beson kësaj qeverie dhe nuk e fshehu faktin se qeveria që u shkarkua ishte ajo që i kishte besuar.

“Kohëve të fundit jam më pak i angazhuar, sepse po ndërtohet një qeveri të cilës unë nuk i besoj. Një qeverie që i kam besuar më shumë, nuk arriti suksesshëm me e përballu mandatin,” tha Haziri duke sqaruar pse shprehet në këtë mënyrë:

“Kjo është bindja ime dhe ky është guximi im politik që ta them para secilit nivel, para secilit qytetar dhe para secilit lider, sepse besimin tim politik nuk mund të ma ndalojë askush. Unë jam lojal në vendime, respektoj vendimet e shumicës, angazhohem për aq sa më kërkojnë me u angazhu, por kjo është bindja ime dhe natyrisht nuk ka nevojë Gjilani me pas raporte armiqësore me kryeministra dhe as me ministra, sepse ne jemi të varur nga vendimet e tyre.”

Kështu, Lutfi Haziri i bashkohet sot ministrit aktual të Infrastrukturës, Lumir Abdixhikut, i cili nuk pranoi të jetë ministër i qeverisë që do kryesohet nga Avdullah Hoti.