Nënkryetari i LDK-së: Vetëvendosje kërkon pushtet absolut!

Nënkryetari i LDK-së, Agim Veliu, vlerëson se angazhimi dhe veprimet e ditëve të fundit të Lëvizjes Vetëvendosje nuk janë një përpjekje serioze për ndërtimin e institucioneve dhe arritjen e marrëveshjes me Lidhjen Demokratike të Kosovës për të bashkëqeverisë mbi bazën e fuqisë së votës.

“E tërë kjo është një përpjekje e VV-së për pushtet absolut dhe për ta nënshtruar e nënçmuar LDK-në, duke provuar t’ia nëpërkëmbin dinjitetin. Madje, kërkesat e sotme të VV-së shkojnë edhe më larg, në synimin e tyre që LDK të shkëputet nga e kaluara e saj europiane dhe euroatlantike,” thekson Agim Veliu në reagimin e tij përmes rrjetit social Facebook duke konstatuar se Vetëvendosje don që LDK të distancohemi edhe nga rugovizmi ndërsa përfundon:

“Kjo përpjekje e tyre sigurisht që është e dështuar dhe nuk duhet ta ndihmojë askush prej nesh.”

Ndryshe, Kryetari i Lëvizjes Vetëvendosje, Albin Kurti mbrëmë ia ka dërguar ofertën e fundit për bashkëqeverisje LDK-së, duke i propozuar që qeverisja e ardhshme të ketë 14 ministri, nga të cilat LDK do të përfitonte 6 ministri, Vetëvendosje 5 dhe minoritetet 3 ministri.

Ja postimi i plotë:

Angazhimi dhe veprimet e ditëve të fundit të VV-së nuk janë një përpjekje serioze për ndërtimin e institucioneve dhe arritjen e marrëveshjes me LDK-në për të bashkëqeverisë mbi bazën e fuqisë së votës.

E tërë kjo është një përpjekje e VV-së për pushtet absolut dhe për ta nënshtruar e nënçmuar LDK-në, duke provuar t’ia nëpërkëmbin dinjitetin.

Madje, kërkesat e sotme të VV-së shkojnë edhe më larg, në synimin e tyre që LDK të shkëputet nga e kaluara e saj europiane dhe euroatlantike.

Nga cila e kaluar duan ata të shkëputemi? Mbase duan që të distancohemi edhe nga rugovizmi.

Kjo përpjekje e tyre sigurisht që është e dështuar dhe nuk duhet ta ndihmojë askush prej nesh.