Nëse nuk tërhiqen, Erdogan kërcënon: Do të vazhdojmë t’i shtypim terroristët!

Ushtria turke do ta vazhdojë operacionin “Burimi i Paqes” dhe do të shënjestrojë elementet terroriste në veri të Sirisë pas afatit 120-orësh nëse nuk zbatohet marrëveshja e arritur midis Turqisë dhe SHBA-së, tha presidenti Recep Tayyip Erdogan, raporton Anadolu Agency, AA.

“Nëse nuk realizohet, në momentin e përfundimit të afatit 120-orësh ne do ta vazhdojmë operacionin aty ku ka mbetur dhe do të vazhdojmë t’i shtypim terroristët,” tha Erdogan në një ceremoni inaugurimi në Kayseri.

Erdogan tha se qëndrimi i Turqisë në krijimin e zonës së sigurisë në veri të Sirisë ka qenë gjithmonë i njëjtë dhe nuk ka ndryshuar dhe se forcat e regjimit sirian janë të pranishme në disa pjesë të zonës së operacionit turk në Sirinë veriore.

“Këtë çështje do ta diskutoj me Putin,” tha Erdogan ndërsa foli edhe për deklaratat kundër Turqisë pas nisjes së operacionit “Burimi i Paqes”.

“Fatkeqësisht, në nëntë ditët e fundit, është bë çdo lloj shëmtire kundër Turqisë. Pasi ranë maskat nga fytyrat e tyre, ne pamë se kush çfarë është,” tha Erdogan.

Ndryshe, Turqia dhe SHBA të enjten arritën një marrëveshje për armëpushim. Turqia ra dakord të pezullojë operacionin e saj “Burimi i Paqes” për 120 orë në mënyrë që, sipas Ankarasë, të lejojë tërheqjen e terroristëve të YPG/PKK-së nga zona e planifikuar e sigurt.

Në bisedimet e së enjtes, Erdogan dhe nënpresidenti amerikan Mike Pence gjithashtu ranë dakord që Turqia të ketë një zonë prej rreth 30 kilometrash në kufirin sirian.

Më 9 tetor, Turqia nisi operacionin “Burimi i Paqes” në lindje të lumit Eufrat në veri të Sirisë për të siguruar kufijtë e saj duke eleminuar elementet terroriste dhe për të garantuar kthimin e sigurt të refugjatëve sirianë dhe integritetin territorial të Sirisë. Ankaraja tha se ka për synim ta pastrojë rajonin në lindje të lumit Eufrat nga terroristët e PKK-së dhe dega e saj siriane, PYD/YPG.

Në fushatën e saj më shumë se 30-vjeçare kundër Turqisë, PKK, që konsiderohet organizatë terroriste nga Turqia, SHBA dhe Bashkimi Evropian, sipas Ankarasë zyrtare, është përgjegjëse për vdekjen e rreth 40.000 njerëzve, përfshirë shumë gra dhe fëmijë.