Nëse Vetëvendosje nuk është për Marrëveshje, Mustafa: LDK e voton Qeverinë dhe kalojmë në Opozitë!

Pas mbledhjes së Kryesisë së LDK-së, Kryetari Isa Mustafa, tha se kjo parti është dakorduar që qeveria të ndahet proporcionalisht 5 ministri për LDK-në dhe po aq edhe për Lëvizjen Vetëvendosje si partnerë kryesorë qeverisës. Dhe, nëse nuk ka Marrëveshje LDK do të votojë pa asnjë kusht formimin e institucioneve të reja të drejtuar nga Vetëvendosje dhe do të kaloj në opozitë! 

“Patëm mbledhjen e Kryesisë për të trajtuar përgatitjet për konstituimin e Kuvendit, mbesim të interesuar e të përkushtuar që vendit t’i japim zgjidhje në këto momente dhe të vazhdojmë të ofrojmë zgjidhje.  Jemi pajtuar që kryeministri dhe një zëvendëskryeministër t’i takojë LVV-së dhe në asnjë rast nuk e kemi shtruar çështjen e kryeministrit sepse jemi pajtuar, ndërkaq kryetari i Kuvendit t’i takojë LDK-së”, tha ai.

Ndërkohë që Vetëvendosje ka kërkuar një ministri shtesë, atë të Punëve të Brendshme, kryetari Mustafa tha se nëse LDK tërhiqet nga përgjegjësitë, atëherë do të kalojë në opozitë.

“Nëse LVV nuk është gati për marrëveshje dhe e sheh LDK-në pengesë, atëherë unë po deklaroj sot me pëlqimin e kryesisë të heqë dorë nga të gjitha kërkesat për përgjegjësi institucionale duke ia lënë LVV-së. Shprehim gatishmërinë të votojmë kandidatin e LVV për kryetar të Kuvendit. Jemi të interesuar që çështja e qeverisë dhe institucioneve të zgjidhet. Nëse ne tërhiqemi nga përgjegjësitë, jemi në opozitë, votojmë, por qëndrojmë parti opozitare”, tha Mustafa duke përfunduar:

 “LDK do të votojë pa asnjë kusht formimin e institucioneve të reja të drejtuar nga Vetëvendosje!”