Nesër, Berisha: Populli opozitar i bën gjyqin kryehajdutit të këtij kombi!

Nesër në protestën kombëtare në Tiranë me fillim në orën 17:00, Kryetari i Partisë Demokratike, Sali Berisha, tha se populli opozitar do i bëjë gjyqin kryehajdutit të këtij kombi, kryeministrit të lidhur kokë e këmbë me vrasës, banditë, trafikantë.

“Nesër është prova e madhe, është dita e guximit, e revoltës, e zemërimit, e ngadhënjimit qytetar mbi të keqen më të madhe që ka mbërthyer Shqipërinë, që ka pllakosur këtë vend nga ditët e zeza të diktaturës hoxhiste gjer sot.

Nesër qytetarët, populli opozitar i bën gjyqin kryehajdutit të këtij kombi.
I bën gjyqin kryeministrit të lidhur kokë e këmbë me vrasës, banditë, trafikantë.
I bën gjyqin antishqiptarit më të zi të kohërave që ka përzënë nga ky vend në 10 vite 1 milion e 100 mijë shqiptarë vetëm në hapësirën evropiane, pa llogaritur hapësira të tjera.
Nesër i bën gjyqin një armiku të egër të lirive të shqiptarëve, të votës së tyre.

Një njeriu që qëndron në pushtet duke përdorur çdo mjet të paligjshëm, duke shkelmuar Kushtetutën.
Por nesër është dita e gjykimit të popullit shqiptar për një organizatë kriminale që nuk e ka sot asnjë vend tjetër në Europë,” tha Sali Berisha duke akuzuar Edi Ramën, Niko Peleshin dhe Haram Begajn se u vunë në rresht pas Lubisë për të mbrojtur vjedhjet e saj.

“Dita e djeshme do të regjistrohet në muret e kohës si një nga ditët më të zeza të historisë së ligjit, Kushtetutës, drejtësisë në këtë vend.
Dje, para shqiptarëve, seriali i hajdutëve dhe kryehajdutëve, Edi Rama, Niko Peleshi, Haram Begaj, u paraqitën në pafytyrësi të plotë para prokurorëve që zbatonin ligjin në sallat e Gjykatës puçiste Kushtetuese.
U paraqitën për të kompletuar grushtin e tyre të shtetit.
Kurrë në histori të këtij vendi dhe asnjë vendi tjetër, nuk ka ndodhur që tre drejtuesit më kryesorë të rendin në Gjykatë Kushtetuese kundër vendimit të një gjykate dhe një prokurori për pezullimin e zëvendëskryeministres të kapur në flagrancë me një seri aferash korruptive, vjedhjesh monstruoze.
Nuk ka ndodhur.
Nuk ka ditë më të turpshme për atë gjykatë, për këto institucione turpi se dita e djeshme.
Edi Rama, Niko Peleshi dhe Haram Begaj u vunë në rresht pas Lubisë për të mbrojtur vjedhjet e saj, vetëm e vetëm për shkak të vjedhjeve të tyre, të cilat janë në ato proporcione sa i bën ata ta kenë të qartë se do kenë fatin e Lubisë.
Gjykata, në një vendim të turpshëm, të paimagjinueshëm, merr menjëherë në kundërshtim me ligjin, pushtetin e gjykatës së apelit dhe gjykatës së lartë në shqyrtimin e masave të sigurisë, në një kohë kur Kushtetuta, ligji thotë se ajo këtë të drejtë e ushtron pas këtyre gjykatave.
Por Irenat e Gjykatës Kushtetuese, më zi janë burrat aty se sa gratë, janë të afta të shkelin çdo kod, çdo nen të Kushtetutës, të shkruajnë Kushtetutën për urdhër politik.
Çfarë janë këta njerëz, do pyesni ju me të drejtë.
Janë këta njerëz injorantë dhe analfabetë?
Jo, absolutisht. Unë nga afër nuk i njoh, por jam i sigurt se janë njerëz të shkolluar. Mund të jenë shkolluar edhe jashtë.
Por si mundet këta të sillen në këtë mënyrë? Ka vetëm një shkak. Këta njerëz nuk kanë dinjitet njerëzor.
Se në rast se do kishin minimumin e dinjitetit, nuk do i lejonin vetes të shndërroheshin në avokatë të një kriminele, që ka vjedhur bashkë me Edi Rama, qindra, mos miliarda euro. Pa pasur asnjë tagër ligjor, përkundrazi duke shkelur ligjin dhe Kushtetutën,” tha lideri i opozitës duke theksuar zhvillimin e djeshëm në Gjykatën Kushtetuese ku të gjitha institucionet u bënë dje mur për të mbrojtur korrupsionin ndërsa vlerësoi se shpresa e vetme janë qytetarët e këtij vendi.

“Ndaj dhe dita e djeshme faktoi edhe njëherë të dashur qytetarë dhe qytetare se e vetmja shpresë e këtij vendi, e vetmja shpresë e këtij kombi, e vetmja shpresë e të rinjve dhe fëmijëve shqiptarë jeni ju.
Jemi në kilometrin e fundit.
Me guxim dhe besim, të vendosur të bëjmë çdo gjë për përmbysjen e këtij regjimi.
Nuk ka shok në botë, tëra institucionet bëhen mur korrupsioni. Katër, edhe gjykata me ta.
Institucionet më të larta të shtetit. Të turpit. Të kleptokracisë. Të narkoshtetit.
Në të gjithë terminologjinë botërore të formave të shtetit, shtetit aktual të sotëm në Shqipëri i përshtatet më shumë se çdo gjë tjetër, shtet i kakistokracisë.
Nga greqishtja e lashtë, më i keqi. Dhe ky është më i keqi. Ndaj qytetarë, të bashkojmë forcat dhe t’u tregojmë vendin. Bota po u tregon vendin këtyre në mënyrën më të vendosur,” tha Kryetari i Partisë Demokratike në konferencën e përjavshme ndërsa foli dhe për Bordin e Paqes, i cili u themelua dje, ku sipas kryedemokratit, Edi Rama nuk e gëzoi ftesën që i erdhi Shqipërisë dhe mbeti siç është, i padëshiruar në Europë dhe në botë.

“Edi Rama, i cili tundi një ftesë që i erdhi Shqipërisë, nuk e gëzoi dot. Përkundrazi.
Mos guxo, nuk do të shoh surratin, ky ishte mesazhi. Dhe vinte në parlament i shpërfytyruar. E patë vetë ju qytetarë, shiheni prapë se si qëndronte i shpërfytyruar,” tha Kryetari i Partisë Demokratike, Sali Berisha, duke përfunduar:
“Në një kohë kur mblodhi parlamentin ku të firmoste, të thoshte se parlamenti ratifikoi.
Por boja iu tha në penë. Mbeti siç është, i padëshiruar në Europë dhe në botë.”