Nesër fillon muaji i bekuar i Ramazanit, kreu i KMSH: Agjërim të lehtë dhe pranim të lutjeve tuaja!
Me rastin e fillimit të muajit të bekuar të Ramazanit, Kryetari i Komunitetit Mysliman, H.Bujar Spahiu, duke përcjell urimet më të sinqerta që ky Ramazan të jetë muaj i faljes dhe mirëkuptimit, muaj i ngritjes morale dhe shpirtërore, për përballimin me sukses të sfidave në të cilat ndodhemi dhe ato që na presin, shton:
“Ky muaj, është muaji i veprave të bamirësisë që impaktojnë në të gjithë shoqërinë. Të lëmë anash mospajtimet, mëritë e egoizmin. Të synojmë të arrijmë vetëm kënaqësinë e Zotit dhe harmoninë me njerëzit, me të cilët rrethohemi. Uroj që ky të jetë muaji i faljes për ne,” tha Kryetari i Komunitetit Mysliman, H.Bujar Spahiu, në mesazhin e tij duke uruar muajin e Ramazanit me një agjërim të lehtë, pranim të lutjeve, shëndet të mirë, lumturi e prosperitet për familjet shqiptare.
Ndryshe, ky është dhe kalendari i muajit të bekuar të Ramazanit i cili fillon nesër.
Mesazhi
Gëzuar Muajin e Bekuar të Ramazanit të gjithë shqiptarëve kudo që janë!
Të dashur qytetarë, motra dhe vëllezër, nesër është dita e parë e muajit të bekuar të Ramazanit.
Me rastin e fillimit të muajit të Ramazanit, ju përcjell urimet më të sinqerta që ky Ramazan të jetë muaji i faljes, muaji i begatisë, muaji mirëkuptimit të ndërsjelltë me njëri-tjetrin, muaji i ngritjes morale dhe shpirtërore, për përballimin me sukses të çdo vështirësie që kemi.
Gjatë Ramazanit ju ftojmë të jeni më solidarë me familjet në nevojë, t’i shtrijmë dorën njëri-tjetrit në punë të mira.
Të nderuar besimtarë, çdo gjë gjatë këtij muaji ka vlerë shumëfish më të madhe, prandaj njerëzit përmes sakrificave të shumanshme personale, synojnë të lartësohen shpirtërisht dhe të afrohen më shumë me Zotin.
Gjithashtu ky muaj, është muaji i veprave të bamirësisë që impaktojnë në të gjithë shoqërinë.
Të lëmë anash mospajtimet, mëritë e egoizmin.
Të synojmë të arrijmë vetëm kënaqësinë e Zotit dhe harmoninë me njerëzit, me të cilët rrethohemi.
Uroj që ky të jetë muaji i faljes për ne.
Duke ju uruar muajin e Ramazanit më lejoni tju dëshiroj një agjërim të lehtë, pranim të lutjeve tuaja, shëndet të mirë, lumturi e prosperitet për ju dhe familjet tuaja!
