Nesër nis viti i ri shkollor/ Mesazhi, Shahini: Ndiqni protokollet e sigurisë, të izolojmë COVID-19

Ministrja e Arsimit, Besa Shahini, duke uruar nxënësit për nisjen e vitit të ri shkollor nesër më 14 Shtator, shprehet se nxënësit duhet të respektojnë protokollet e sigurisë në mënyrë që të izolohet COVID-19.

“Nesër të dashur nxënës është një ditë e madhe për ju. Kemi marrë masa për të siguruar një fillim sa më të mbarë të vitit të ri shkollor. Duhet të ndiqni protokollet e sigurisë ndaj koronavirusit, që të mund të izolojmë Covidin. I kemi të gjitha planet për këtë vit shkollor, sido të shkojë situata. Ju uroj shumë suksese dhe një vit sa më të mbarë shkollor,” shprehet Shahini përmes një video-mesazhi në rrjetin social Facebook e vetëdijshme që nxënësit do ta kenë shumë të vështirë të ndjekin protokollet e sigurisë së shëndetit që janë vendosur në shkolla, por kjo është e domosdoshme në mënyrë që të minimizohet përhapja e koronavirusit në shkollë.

Në rast se duhet të mbyllet ndonjë klasë apo ndonjë shkollë për shkak të infektimeve, Ministrja Besa Shahini tha se është plani B, që është kanali “RTSH Shkollë”, ku sipas saj, i kanë të xhiruara të gjitha leksionet që do t’i zhvillojnë nxënësit edhe në shkollë, dhe kanë edhe platformën online që do të shërbejë për mësim në kushte shtëpie”.

Në ambientet e brendshme të shkollës janë të afishuara edhe rregullat për t’u ndjekur gjatë mësimit e qëndrimit në shkollë, tha në fund Ministrja e Arsimit, Besa Shahini, duke uruar shumë suksese e mbarësi në vitin e ri shkollor 2020-2021.