Nesër rinisin negociatat, Kievi: Rusia synon të ndajë Ukrainën në dysh!

Shefi i inteligjencës ushtarake të Ukrainës ka paralajmëruar se Rusia po përpiqet të zbatojë atë që ai e quan “skenari korean” në Ukrainë, pasi nuk arriti të marrë kryeqytetin dhe të rrëzojë qeverinë legjitime.

Kyrylo Budanov thotë se prioritetet e presidentit të Rusisë, Vladimir Putin, janë lindja dhe jugu i Ukrainës, pasi ofensiva e tij ka ngecur në masë të madhe.

Nëse ai është në gjendje të lidhë atë territor, ai thotë se Putini më pas do të përpiqet të krijojë një vijë demarkacioni që ndan atë zonë nga pjesa tjetër e Ukrainës, raporton BBC.

Por, Budanov thotë, një nga problemet kryesore të Rusisë është krijimi dhe mirëmbajtja e një korridori tokësor midis lindjes dhe Krimesë. Në rrugën e tij qëndron Mariupoli “i pathyeshëm”.

Në çdo rast, parashikon gjenerali Budanov, ky kuazi-shtet do të ishte i paqëndrueshëm, duke pasur parasysh rezistencën e popullatës vendase.

Lufta në Ukrainë ka nisur me 24 shkurt.

Që nga ajo kohë, në rajone të ndryshme të Ukrainës janë duke u zhvilluar luftime të ashpra.

Rusia ka arritur të marrë kontrollin mbi disa qytete por e pati të pamundur të thyente kryeqytetin, Kivenin.

Rinisin negociatat

Ukraina dhe Rusia do të nisin nesër një raund të ri të bisedimeve në Turqi. Këtë e ka bërë të ditur anëtari i ekipit negociator të Ukrainës, David Arakhamia.

“Raundi tjetër i bisedimeve do të mbahet deri më 30 mars në Turqi”, njoftoi negociatori ukrainas David Arakhamia.

Bisedimet e mëparshme me Rusinë, të nisura pas pushtimit të 24 shkurtit, u përshkruan nga Ukraina si “shumë të vështira”.

Një takim i mëparshëm u zhvillua në Ankara të Turqisë, më 7 mars.

Aty u takuan ministrat e jashtëm të të dyja vendeve, Sergej Lavrov i Rusisë si dhe ai i Ukrainës, Dmytro Kuleba.

Në këto negociata nuk u arrit ndonjë pajtim me palëve.

Takimi ishte zhvilluar me ndërmjetësim të ministrit të Jashtëm të Turqisë, Mevlut Cavusoglu.

Derisa luftimet janë duke vazhduar në Ukrainë, Zyra e Kombeve të Bashkuara për të Drejtat e Njeriut, tha të dielën, më 27 mars, se 1,119 civilë janë vrarë dhe 1,790 janë plagosur që nga fillimi i pushtimit rus të Ukrainës më 24 shkurt.

Midis të vdekurve sipas OKB-së ishin rreth 15 vajza dhe 32 djem, si dhe 52 fëmijë, gjinia e të cilëve nuk dihet ende. Këto shifra të OKB-së përfshinë periudhën nga 24 shkurti deri më 26 mars. Numri aktual i viktimave pritet të jetë dukshëm më i lartë./RFE/