Nesër seanca, Apeli Vjosës: Mos e votoni mocionin! Unë nuk përfshihem në pazaret e partive…
Kryetarja Parlamentit të Kosovë, Vjosa Osmani, pas Kryesisë Parlamentit ku është vendosur që të mbahet nesër në ora 11:00 seanca ku do të votohet për mocionin e mosbesimit ndaj Qeverisë Kurti tha se ajo kishte votuar kundër pasi salla nuk i plotëson kriteret e kërkuar nga Instituti i Shëndetit Publik.
“Shpreh shqetësimin tim të thellë për shëndetin e qytetarëve, i falënderoj të gjithë institucionet e Kosovës, ju bëj thirrje qytetarëve që t’i përmbahen të gjitha rekomandimeve që rrezikun nga pandemia ta kalojnë,” tha Osmani ndërsa sqaroi pse e kishte kontaktuar institutin.
“Unë kam komunikuar me Institutin Kombëtar, jo për të kërkuar leje po për të kërkuar nga ky Institut që të dinim se cilët hapa duhet të merren për të siguruar mbarëvajtjen në kuadër të rregullave. Kemi kërkuar që të dimë se në tubime të tilla cilat janë kushtet të cilat duhet të plotësohen. Instituti ka rekomanduar që të sigurohet dezinfektimi sallës, kontrolli mjekësor dhe mbi të gjitha distanca fizike prej së paku dy metrash. Unë kam kërkuar nga administrata që të përgjigjet nëse salla i plotëson kushtet për një takim të tillë dhe përgjigja e administratës ka qenë që salla nuk i plotëson këto kushte,” tha Vjosa Osmani pas mbledhjes ku grupet parlamentare kanë propozuar që distanca të jetë 1.5 metra në mes të deputetëve.
“Megjithatë, ka pas kërkesë nga disa grupe parlamentare që të sigurohet edhe hapësira përreth, pas matjeve, administrata është përgjigjur që në sallë do të mund të futeshin në maksimum 80 veta. Megjithatë, me shumicë kryesia ka vendosur që seanca të mbahet nesër në ora 11:00.
Unë nuk jam pajtuar me këtë konstatim, megjithatë, kishte insistim që në vend të distancës 2 metra të sigurohet distancë 1.5 metra, pra shumica vendosi që nesër të ketë seancë në ora 11:00, pra është vetëm një pikë e rendit të ditës, mocioni i 44 deputetëve. Kemi kërkesë nga një grup parlamentar që për ta të sigurohet distanca prej 2 metrave, dhe poashtu edhe për qeverinë e Kosovës.”
Kryetarja e Parlamentit të Kosovë, Vjosa Osmani, u shpreh kundër mocionit të mosbesimit ndaj qeverisë Kurti të cilën e ka iniciuar partia e saj ndërsa e bëri të qartë se nuk bëhet pjesë e pazareve politike.
“I bej thirrje gjithë deputetëve mos të përkrahin këta mocion. Kosova s’ka nevojë për një qeveri që s’ka legjitimitet,” tha Osmani duke e bërë të qartë se në rast se bëhet Qeveria e Re teknike nuk do të jetë kryetare e Parlamentit të Kosovës.
“Në një Qeveri të re teknike unë nuk do të jem Kryetare, me Kushtetutë kjo pozitë i takon partisë së parë, fitusve të zgjedhjeve. Unë nuk mund të përfshihem në pazaret e partive për interesat të veta. Kosova nuk ka nevojë për Qeveri Teknike, por të përqëndrohet në luftimin e kësaj pandemie dhe të merret me sfidat e qytetarëve të Kosovës, prandaj mendoj se nuk do të duhej një qeverie e tillë teknike,” ishte e prerë Kryetarja e Parlamentit të Kosovës, Vjosa Osmani duke përfunduar:
Neni 95.pika 5 tregon qartë procedurat se kujt mund t’i jepet e drejta e formimit të Qeverisë, aty flitet për partinë apo koalicionin që ka dalë i pari dhe nëse partia e parë nuk propozon apo nuk arrin të formojë një shumicë të re, atëherë duhet të shkohet në zgjedhje dhe kjo është e qartë.”
Ndryshe, në mbledhjen e mbajtur të Kryesisë së Parlamentit, me 4 vota për dhe 2 kundër u vendos që seanca për Mocionin e mosbesimit ndaj Qeverisë Kurti, të ngritur nga LDK me nënshkrimin e 44 deputetëve, të mbahet nesër në ora 11:00 në Sallën e Parlamentit të Kosovës.
