Nesër skadon traktati New START, Papa Leoni XIV: Të parandalohet gara e armatosjes!

“Paqja”, fjala kyçe e papnisë së Leonit XIV, rrezikon të marrë një goditje të rëndë. Papa Leoni XIV shqetësohet jo vetëm për situatën delikate të botës, me shumë konflikte në zhvillim, por gjithashtu edhe për mundësinë që të mos ketë vazhdimësi për “Traktatin New START të nënshkruar në vitin 2010 nga presidentët e Shteteve të Bashkuara dhe të Federatës Ruse,” thekson Ipeshkvi i Romës, “i cili ka përfaqësuar një hap të rëndësishëm në frenimin e përhapjes së armëve bërthamore”.

Marrëveshja skadon nesër, më 5 shkurt, dhe për këtë arsye, Papa Leoni XIV, në fund të audiencës së sotme të përgjithshme, bëri thirrjen e tij.

Duke rinovuar inkurajimin për çdo përpjekje konstruktive në favor të çarmatosjes dhe besimit të ndërsjellë, drejtoj një thirrje urgjente për të mos lënë pas dore këtë instrument pa u përpjekur t’i sigurohet një vazhdim konkret dhe efikas.

Paqja e rrezikuar

Një hap i nevojshëm për të siguruar që e ardhmja e botës të mos shënohet nga një garë riarmatimi dhe një paqe gjithnjë e më e largët që megjithatë mbetet “pasuri” e të gjithëve.

Është urgjente të bëhet gjithçka e mundshme për të parandaluar një garë të re armatimesh që kërcënon edhe më tej paqen mes kombeve. Është më se e domosdoshme të zëvendësohet logjika e frikës dhe mosbesimit me një etikë të përbashkët që të drejtojë zgjedhjet drejt të mirës së përbashkët dhe të bëjë që paqja të jetë një pasuri e mbrojtur nga të gjithë.

Traktati New START

Pasi u nënshkrua në vitin 2010 nga presidenti amerikan, Barack Obama, dhe ai rus, Dmitri Medvedev, traktati u zgjat për herë të parë në vitin 2016 dhe më pas u rinovua në vitin 2021 për pesë vjet të tjera. Ai vendos një kufi prej 1550 koka bërthamore strategjike të vendosura për çdo palë, si dhe një kufi prej 700 raketash operuese – raketa balistike ndërkontinentale, ICBM, raketa të lëshuara nga nëndetëse, SLBM, dhe bombardues të rëndë – dhe 800 raketa gjithsej, përfshirë të vendosura dhe të pa vendosura./vaticannews/