Nesër voton Kosova!

Nesër voton Kosova për Parlamentin e ri! Këto do të jenë zgjedhjet e para parlamentare në Kosovë ku dihet fituesi edhe pa u zhvilluar zgjedhjet si dhe zgjedhjet e para pa monitorimin e bashkësisë ndërkombëtare.

Përkundër ofertave të shpalosura pë 10 ditë për garën e 14 Shkurtit dhe betejës së ashpër mediatike kundër Lëvizjes Vetëvendosje, për nesër enigmatik ngelet vetëm vendi i dytë ndonëse PDK ishte më e shtruar përballë LDK-së që tashmë simbolizon paligjshmërinë në Kosovë pas vendimit politik të 25 Marsit 2020 për të rrëzuar Qeverinë e Alboin Kurtit duke qenë pjesë e saj, dhe duke i shkaktuar viktima dhe një dëm të madh shëndetësor vendit i cili ishte në kulmin e pandemisë.

Ndërkohë do të jenë edhe 2.000 vëzhgues më pak të angazhuar për monitorim të zgjedhjeve në krahasim me zgjedhjet e vitit 2019, për shkak edhe të pandemisë COVID-19.

Florent Spahija nga koalicioni i organizatave joqeveritare që monitorojnë procesin zgjedhor Demokracia në Veprim thotë se vetëm 500 vëzhgues do të monitorojnë nga afër procesin zgjedhor në qendrat e votimit dhe në vendvotime. Spahija thotë për KosovaPress se kanë reduktuar numrin e vëzhguesve edhe për shkak të pandemisë.

“DnV ka marrë një vendim të tillë (për uljen e numrit të vëzhguesve) për shkak të pandemisë, e dyta, integriteti i zgjedhjeve ka shkuar duke u rritur dhe kjo është një arsye tjetër pse është zvogëluar misioni. Normalisht, do ta bëjmë me sistemin e monitorimit sistematik, normalisht nuk ka me qenë në të gjitha klasat, në të gjitha vendvotimet. Ajo që do të bëhet, do të bëhet përmes një mostre të caktuar”, thotë ai.

Angazhimi i institucioneve përgjegjëse për organizimin dhe mbarëvajtjen e procesit te zgjedhjeve, për një proces të lirë zgjedhor, sipas tij, është arsyeja e ngritjes së integritetit zgjedhor në nivelin që është sot.

Meqë nuk mund të mbulojnë të gjitha qendrat e votimit e rrjedhimisht as të gjitha vendvotimet, Spahija bënë të ditur se do të organizohen në bazë të mostrës, të cilën e kanë përcaktuar bashkë me institucionet e tjera përgjegjëse.

“Ne do të kemi në teren 500 vëzhgues, të cilët do të komunikojnë me ne gjatë tërë ditës. Çdo shkelje që do të ndodhë gjatë ditës në vendvotim, është një pasqyrë reale për atë që ndodh në tërë territorin e Kosovës, por që konsiderojmë që integriteti i zgjedhjeve është në nivelin e tillë meqë është angazhuar Prokuroria, Policia e Kosovës, gjykatat, Këshilli Gjyqësor i Kosovës dhe të gjitha organizatat dhe organizmat shtetëror për të mbrojtur votën. Në një qendër votimi mund të jenë 2-3 veta, por ndonjë qendër mund të mos mbulohet fare. Kjo varësisht nga ajo se qysh është përcaktuar mostra”, thekson Spahija.

Ngritja e vetëdijes kombëtare se vota është e shenjtë, për Spahinë është garantuese për një proces zgjedhor të lirë. Në të kundërtën, ai thekson se kushdo që nuk respekton ligjin mund të shkojë në burg.

“Vazhdimisht kemi punuar si organizatë dhe si grup i organizatës në këtë drejtim, pra që me e rritë vetëdijen që vota është e shenjtë dhe duhet të mbrohet nga komisionerët por edhe nga vet qytetarët. Keqpërdorimi i votës është vepër penale dhe ka me u ndjek (ligjërisht), kurdo që zbulohet. Mos të mendojë dikush që nëse nuk shihet në vendvotim që po e keqpërdor votën, nuk ka me u pa nga dikush që i sheh ato fletëvotime, pra dikush i auditon ato fletëvotime, më pas mund të shkojë dikush në burg vetëm pse ka punuar në kundërshtim me atë që thotë ligji,” shprehet Spahija dhe ndonëse me numër të reduktuar të vëzhguesve, Demokracia në Veprim do të mbledh të gjitha informatat nga tereni në një qendër dhe do të bashkëpunojë ngushtë me Prokurorinë e Shtetit.

Ndryshe, zgjedhjet e parakohshme parlamentare të 14 Shkurtit zhvillohen pas vendimit të Gjykatës Kushtetuese se qeveria e udhëhequr nga Avdullah Hoti është zgjedhur në mënyrë të paligjshme.

Nesër, në zgjedhjet e parakohshme parakohshme të Kosovës janë 1.794.862 qytetarë me të të drejt vote ose 143.006 votues më pak se në zgjedhjet parlamentare të 6 tetorit 2019, pasi nga kjo listë janë larguar 122.421 votues të cilët posedojnë vetëm dokumente të identifikimit të lëshuara nga UNMIK-u, si dhe për shkak të largimit të 11.086 personave që janë konfirmuar se janë larguar nga skema pensionale për shkak të vdekjes.

Komisioni Qendror i Zgjedhjeve bënë të ditur se nesër më 14 Shkurt do të jenë 888 Qendra të Votimit me gjithsej 2.382 vendvotime.