Netanyahu: Vendimi i GJNP, antisemitizëm i pastër
Me tone zemërimi, kryeministri i Izraelit, Benjamin Netanyahu sot kundërshtoi vendimin e Gjykatës Ndërkombëtare Penale, GJNP, i cili hap rrugën për një hetim të krimeve të luftës në territoret palestineze të okupuara nga Izraeli.
Netanyahu tha se vendimi është një antisemitizëm i pastër.
“Si kryeministër i Izraelit, unë mund t’ju siguroj këtë: me të gjitha forcat tona ne do të luftojmë këtë shtrembërim të drejtësisë,” tha Netanyahu në një deklaratë.
Ndryshe, dje GJNP vendosi që ka juridiksion mbi situatën në territoret e okupuara palestineze, duke krijuar rrethanat që kjo gjykatë të hapë një hetim të krimeve të luftës, raporton AFP.
Prokurorja e GJNP-së, Fatou Bensouda i kishte kërkuar gjykatës mendimin e saj ligjor nëse veprimtaria e saj ka juridiksion edhe në zonat e okupuara nga Izraeli. Ajo në muajin dhjetor të vitit 2019 kishte thënë se dëshiron të fillojë një hetim të plotë.
GJNP tha se gjyqtarët e saj kishin vendosur, me shumicë, që juridiksioni territorial i Gjykatës shtrihet në territoret e okupuara nga Izraeli që nga 1967, përkatësisht Gaza dhe Bregun Perëndimor, duke përfshirë Jeruzalemin lindor.
Autoriteti palestinez është një palë në gjykatë, pasi është bërë pjesë e saj më 2015, por Izraeli nuk është anëtar.
Izraeli pushtoi Bregun Perëndimor dhe Rripin e Gazës në Luftën Gjashtë Ditore të vitit 1967 dhe më vonë aneksoi Jeruzalemin lindor.
Kryeministri i autoritetit palestinez, Mohammed Shtayyehm tha se vendimi i GJNP-së është një fitore për drejtësinë dhe njerëzimin, raporton RFE.
“Gjykata, e themeluar për të parandaluar mizoritë si Holokausti kundër popullit Hebre, tani po shënjestron shtetin e popullit hebre,” tha Netanyahu duke shtuar se GJNP duhet të hetojë diktaturat brutale si Irani dhe Siria që kryejnë mizori të tmerrshme pothuajse çdo ditë.
Ndërkohë Departamenti i Shtetit i SHBA-së tha se ekzistojnë shqetësime serioze në lidhje me vendimin e GJNP, duke shtuar se Izraeli nuk duhet të jetë subjekt gjykatës pasi nuk është vend anëtar.
