New York, dialogu për çështjen e emrit të Maqedonisë pa rezultat, zhvendoset në Bruksel

Takimi dy ditor i ministrave të jashtëm të Greqisë dhe Maqedonisë në New Jork për për çështjen e emrit, me ndërmjetësimin e Mathew Nimitz përfundoi pa një rezultat konkret. Pa dhënë detaje nëse në tavolinën mbetet apo është refuzuar tërësisht propozimi “Maqedonia e Ilindenit” dhe nëse janë rikthyer për shqyrtim pesë propozimet fillestare, Nimitz tha se palët janë të vendosur të gjejnë zgjidhje duke i mbrojtur interesat e tyre kombëtare ndërsa dialogu do të zhvendoset në Bruksel.

“Çështjet janë përcaktuar mirë dhe janë përafruar, por nuk kemi akoma një zgjidhje përfundimtare. Të dyja palët janë të vendosura për të arritur një marrëveshje dhe vazhdojnë të punojnë shumë. Dy ministrat do të shkojnë në Bruksel dhe atje do ta vazhdojnë dialogun.”

Gjithsesi  Nimitz  u shpreh optimist në gjetjen e një zgjidhje duke pasur parasysh vullnetin e palëve

“Këto bisedime janë intensifikuar në mënyrë të konsiderueshme dhe të dyja palët kanë pozita të rëndësishme, linja të interesave kombëtare, por e kanë kuptuar rëndësinë e arritjes së marrëveshjes. Palët e njohin njëri-tjetrin shumë mirë. Dy ministrat flasin lirshëm dhe do t’ia dalin të lëvizin para”, tha ndërmjetësi i OKB për emrin, Mathew Nimitz.

Ndërkohë para përfundimit të këtij raundi të dialogut për çështjen e emrit, kryeministri grek, Aleksis Tsipras nga Selaniku tha se Greqia në negociatat për emrin synon të merr diçka që të tjerët e kishin dorëzuar para 70 e më shumë vitesh. Tsipras tha se do të ishte fitore e madhe vendosja e një përcaktuesi para termit “Maqedoni”. Duke iu referuar negociatave që janë në zhvillim e sipër, Tsipras tha se ato “janë të ndjeshme, kritike, por janë bërë hapa përpara”.