New York, Mogherini takim me përfaqësuesit e Ballkanit

Përfaqësuesja e Lartë për Politikë të Jashtmedhe Siguri pranë Bashkimit Evropian, Federica Mogherini, ka zhvilluar një takim me përfaqësuesit e Ballkanit Perëndimor, ku u shpreh mbështetje për vazhdimin e dialogut për normalizimin e marrëdhënieve midis Kosovës dhe Serbisë si dhe u shpreh solidaritet me Shqipërinë, e cila u godit nga një seri tërmetesh në fundjavë.

“Në takim u shpreh mbështetje për vazhdimin e dialogut midis Beogradit dhe Prishtinës dhe për arritjen e shpejtë të një marrëveshjeje ligjërisht të detyrueshme për normalizimin e plotë të marrëdhënieve,” thekson Shërbimi për Punë të Jashtme i Bashkimit Evropian duke njoftuar se takimi u zhvillua me përfaqësuesit e Ballkanit Perëndimor në Asamblenë e Përgjithshme të Kombeve të Bashkuara në New York.

Në takim morën pjesë: presidenti i Kosovës, Hashim Thaçi, ministri i Jashtëm i Serbisë, Ivica Daçiq, kryeministri i Maqedonisë së Veriut, Zoran Zaev, si dhe zyrtarë nga Shqipëria dhe Bosnje e Hercegovina, raporton RFE.

Palët shprehën mbështetje edhe për hapjen e negociatave të anëtarësimit midis Shqipërisë dhe BE-së dhe Maqedonisë së Veriut dhe BE-së.