Nexhmi Rexhepi zgjedhet kryetar i ri i Gjykatës Kushtetuese të Kosovës

Gjyqtarët e Gjykatës Kushtetuese të Kosovës kanë zgjedhur sot kryetarin e ri të kësaj gjykate, Nexhmi Rexhepi.

“Gjyqtarët e Gjykatës Kushtetuese të Republikës së Kosovës, bazuar në paragrafin 5 të nenit 114 të Kushtetutës së Republikës së Kosovës, kanë zgjedhur gjyqtarin,  Nexhmi Rexhepi, Kryetar të Gjykatës Kushtetuese të Republikës së Kosovës,” thekson Gjykata Kushtetuese përmes në njoftimi.

Mandati i kryetarit në ardhje të Gjykatës do të filloj më 31 dhjetor 2024, pasi që kryetarja aktuale, Gresa Caka Nimani, të përfundojë mandatin nëntë vjeçar të paraparë për gjyqtarët e Gjykatës Kushtetuese, sipas përcaktimeve të paragrafit 2 të nenit 114 të Kushtetutës.

Gjithashtu, gjyqtari,  Safet Hoxha, është zgjedhur zëvendëskryetar i Gjykatës Kushtetuese.