Nga busti i Stalinit te 14 Shtatori, Rama: Me Nasipin diskutuam për Reformën në Drejtësi!

Reforma për drejtësi mund të konsdierohet edhe sot histori suksesi nga Ambasada e SHBA por kur dëgjon Kryeministrin Edi Rama ndërsa i atribuon suksesin e kësaj reforme, prokurorëve të njohur me çështjet e tyre të turpshme, jo reforma por i gjithë Sistemi i Drejtësisë denigrohet shumë më shumë se sa ajo drejtësia që shqiptarët e gëzonin me shumë më pak lekë se sot.

Vlerësimi i Departamentit amerikan të Shtetit për ish-kreun e KED, Ardian Dvorani, është një shenjë e mirë që drejtësia po funksionon, tha Edi Rama nga Berati ndonëse kemi të bëjmë me një prokuror i cili prangosi dhe dënoi shkodranët që guxuan ta hedhin në erë bustin e Stalinit. Dhe jo vetëm kaq!

Për të na bindur se sa e suksesshme ishte Reforma në Drejtësi, Kryeministri Rama thotë se e ka diskutua me një prokuror të njohur shqiptar, Nasip Naçon. Po, po, Nasipin e 14 Shtatorit! Se si përfundoi ky proces politik në gjykatën shqiptare e kujtojnë të gjithë, në veçanti beratasit ku po fliste Edi Rama jo rastësisht:

“Po diskutonim me Nasipin për Reformën në Drejtësi. Njerëzit me të drejtë kishin besimin se vettingu u do të pastrojë sistemin. Por vettingu është hedhja e bazave, sepse është pastrimi. Nga pastrimi çlirohet sistemi nga një llum i madh. Dëshiron kohën e vet gjithçka. Duke qenë se vettingu filloi dhe më shkruajnë mua se përse nuk keni arrestuar këtë dhe atë. Nuk jemi në vitin 1945, nuk e bëjmë drejtësinë me urdhër qeverie, aq më pak mund të bëhet kjo duke bërë kryeministri. Është një mesazh shumë i qartë për të gjithë,” tha Edi Rama duke u munduar të bindë edhe komunistët e flaktë të kësaj zone operative se çfarë drejtësie kemi por meqë fol shumë edhe gabon:

“U arrestua një shef mjek që faktikisht kishte rrjepur dynjanë, deri dje kjo nuk ndodhte,” tha Kryeministri duke harruar se ishte ai që para seancën gjyqësore shpalli masën e sigurisë!

Dhe vjen e fundit, që sipas Edi Ramës ka krijuar një turbullirë të madhe në lagjet e tjera të politikës:

“Me vendimin e sekretarit të shtetit vlerësuan me çmimin e veçantë të nderit të SHBA një gjykatës shqiptar, që dihet se me kë është përplasur është domethënëse. Nëse sot themi a e kemi drejtësinë që duhet? Jo, nuk kemi. Por ai i kemi hedhur bazat? Po. A vazhdojmë të ndërtojmë me durim të madh sistemin e ri dhe drejtësinë e re, duke kuptuar se drejtësinë nuk e ndërton qeveria. Por qeveria, forca që qeveris, ka të drejtë të mbështesë ose votojë, sigurisht që po. Kush e mbështet drejtësinë? Kjo është e qartë, po ashtu siç është e qartë kush e pengon. Korrupsioni po luftohet duke reformuar dhe ndryshuar sistemet, brenda sistemit të madh të shtetit,” tha kryeministri Edi Rama duke u mburrur me dy pjesëtarë të sistemit të drejtësisë komuniste dhe ndonëse kanë kaluar 30 vjet nuk ka as edhe një gjytar rilindas që mund ta marrë për shembull ideal.

Pasi u shfry mirë me suksesin e Reformës në Drejtësi, Kryeministri Edi Rama u pyet nëse ka një plan për të luftuar korrupsionin, ndonëse me Nasipin dhe Dvoranin, ai e pranoi që nëse vendi shihet me sy kritik ka një problem të madh me korrupsionin.

“Korrupsioni është një alternativë e një shërbimi të munguar. Aty ku mungon një shërbim, aty ku një shërbim i mohohet apo i bëhet i vështirë qytetarit, aty korrupsioni fiton terren dhe kthehet në një alternativë. Lufta kundër korrupsionit është luftë për të modernizuar sistemet tona dhe të shtetit dhe të shërbimit. Patjetër, nëse e shohim sot me sy kritik vendin, ne kemi një problem të madh me korrupsionin jo të vogël. Por nëse vendosim një perspektivë mes se nga u nisëm, kemi arsye që të besojmë që jemi në drejtimin e duhur dhe që thjesht duhet të vazhdojmë punën,” tha Edi Rama duke shtuar se aksesin online të mbi 900 shërbimeve janë eliminuar miliona mundësi ryshfeti dhe ndaj do të vazhdohet në këtë drejtim.

“Boll t’ju them që me revolucionin dixhital që ne po bëjmmë, duke kaluar një pjesë të shërbimeve online dhe duke e hequr kontaktin fizik mes qytetarit dhe atij tek sporteli, se problemi më i madh në një vend si i yni është ardhja e korrupsionit shumë afër çdo individi në formën e ryshfetit për të marrë një dokument të zakonshëm, një akses më të shpejtë në një radhë dhe kështu me radhë dhe po të shohim që ne e nisëm me 3 shërbime dixhitale në vitin 2013 dhe sot jemi duke finalizuar punën për 900 e kusur shërbime dhe po të shohim që janë miliona shërbime që janë dhënë online, pra faktikisht janë miliona kontakte që janë eliminuar, dhe miliona mundësi ryshfeti që janë eliminuar. Kjo do të thotë që ne do vazhdojmë në këtë drejtim. Patjetër që në çfarë është e mundshme të shërbehet online, kjo çështje është e zgjidhur, mjafton që të realizohet.

Pra, nëse kemi probleme me hipotekat dhe janë probleme në ato zona që ende hartat dhe pronat nuk janë të mirëregjistruara dhe të mirëfiltruara dhe për këtë arsye nuk e merr dot akoma shërbimin online, një pjesë tjetër jo e vogël sot e gjeneron në kompjuter, nuk ka nevojë fare të shkosh në hipotekë,” tha Edi Rama duke përfunduar:

“Por është pjesa tjetër dhe për këtë pjesë tjetër ne jemi të vetëdijshëm që është problem.”

E meqë konstatoi se shqiptarët i kanë të gjitha, nga drejtësia deri te rrogat dhe biznesi pa tatim dhe beratasit po e shikonin me habi, Kryeministri Edi Rama u foli për çeljen e negociatave me BE! Po, po atyre negociatave për të cilat kemi festuar 3 herë për 8 vjet qeverisje dhe Bashkimi Evropian nuk na qas as edhe nën sqetullën e Maedonisë Veriore. Por kjo nuk e bengon Edi Ramën që edhe sot nga Berati të thotë se shteti shqiptar i ka bërë të gjitha detyrat dhe tanimë i ka mbetur vendeve të BE të japin një vendim për çeljen e negociatave.

“Procesi i integrimit ka dy faktorë, Shqipërinë dhe BE. Bashkimi Evropian është një bashkësi shtetet që janë faktorë të rëndësishëm për këtë proces. Duke u nisur nga vendimi i marrë nga Këshilli Evropian, çelja e negociatave është realizuar. Por hapja e negociatave formalisht është aprovimi i të gjitha shteteve. Këtu jemi në një fazë ku e kemi parë faktikisht që dinamikat e brendshme të BE dhe hallet e brendshme të një vendi, zgjedhjet e një vendi ndikojnë. Unë e kam thënë që pa u bërë zgjedhjet në Holandë, do të dëgjojmë shumë, por konferenca nuk do të ndodhi. Ka ndikuar dhe shumë pandemia, ka futur një agjendë në mes.”

E si ditë fushate sot Kryeministrit Edi Rama për dallim nga 3 herët tjera i falet të broçkullis për integrimin, në veçanti atij që varet nga Brukseli dhe jo Ne, sepse ne jemi më të mirët!

“Do të jem në Bruksel për pak ditë, do të kem një bashkëbisedim. Ne i kemi bërë detyrat tona. Pra është shumë e qartë. Nuk është një proces që ecën teknikisht, nuk varet vetëm nga ne, por nga shumë komponentë të tjerë. Ne të bëjmë tonat, për një arsye të thjeshtë. Ne nuk i bëjmë të na vlerësoj Holanda, ne i bëjmë sepse janë gjërat e duhura për shtetin tonë. Reforma në Drejtësi nuk behet se e duan amerikanët apo evropianët. Ata e duan sigurisht, por ne nuk e bëjmë sepse e duan ata, e bëjmë sepse i duhet shqiptarëve, i duhet këtyre të rinjve, atyre që janë fare të vegjël. Kështu në të gjitha drejtimet. Çdo reformë që lidhet me BE është padiskutkim në të mirën e vendit tonë. Puna është të ngremë Evropën këtu dhe a bëjmë Shqipërinë një shtet që vepron si një shtet evropian.”

Kryeministri Edi Rama në bashkëbisedim me qytetarët e Beratit foli edhe shumë çka tjetër, por për të mos kontaminuar Portalin dhe meqë kemi mundësi teknike, të interesuarit mund ta shohin videon e plotë të takimit!