Nga e Hëna, Edi Rama: Pensionistët në shtëpi, ja si aplikohet për leje-dalje

Pasi bëri të ditur regjimin e ri të lëvizjes si masë për parandalimin e përhapjes së koronavirusit, ku nga e hëna do të ketë të drejtën e daljes për të blerë ushqime vetëm një anëtar i familjes, Kryeministri Edi Rama prezantoi sot edhe aplikacionin online që do të mundësojë marrjen e lejes digjitale me e-mail ose telefon në emër të familjes ndërsa për pesnionistët nga e hëna ndalohet të lëvizin nga shtëpia.

“Leja është automatike në rast se bëhet përmes e-albania nëse keni një smartphone apo kompjuter. Në rast se nuk i keni këto, leja do të kërkohet me SMS dhe nuk është automatike, por do të merret pas 24 orësh. Tirana dhe në qendrat urbane do të jetë e vetmja mënyrë për të lëvizur pa marrë gjobë dhe pa humbur edhe makinën në rast se e disponojnë një makinë, se i tillë është dhe ligji. Kush ecën në këmbë jashtë orarit dhe pa leje brenda orarit gjobitet dhe i konfiskohet makina,” u shpreh Edi Rama gjatë një komunikimi online me drejtoren e AKSH-it, Mirlinda Karcanaj, e cila shpjegoi edhe procedurën e marrjes së lejes.

Me këtë rast Kryeministri ishte i prerë dhe sqaroi se pse pensionistët nuk do të pajisen me leje-dalje.

“Pensionistët nuk do të mund të aplikojnë në këtë sistem, sepse përgjigja do të jetë negative. Pensionistët duhet të qëndrojnë në shtëpi dhe për ata pensionistë që janë të vetmuar dhe nuk i kanë fëmijët në të njëjtën qendër banimi urbane apo njësi administrative do të kujdesimi ne, siç po kujdesemi pa pushim. Do të kujdesimi me ekipet tona në territor, të cilët do t’u bëjnë pazaret, do t’u çojnë ilaçet dhe do të bëjnë për ta, atë që kanë nevojë. Pensionistët nuk do të dalin më në rrugë,” tha Edi Rama ndërsa për anëtarin e familjes që vazhdon punë, ai do të lëvizë me autorizimin që aktualisht disponon.

Kryeministri Edi Rama informoi se i ka kërkuar kryetarit të Bashkisë Tiranë që deri nesër të mundësojë ndarjen e të gjitha tezgave në tregjet e lagjeve, në mënyrë që të mos jenë të gjithë të grumbulluar në një pikë. Ky ndryshim, theksoi Kryeministri, nga nesër do të fillojë të jetë i ndjeshëm në tregjet e lagjeve nga dita e hënë, të gjitha tregjet do të jenë të tilla. E njëjta masë u është kërkuar të merret të gjithë kryetarëve të bashkive në territor.