Nga “Foltorja” me gratë demokrate, Berisha: “NENI BASHA” më 11 Dhjetor në Statut!

Lideri historik i Partisë Demokratike Sali Berisha nga “Foltorja” me gratë demokrate e cila u zhvillua në Tiranë tha se më 11 Dhjetor, Kuvendi Kombëtar do ta sanksionoj qartë në Statut se Kryetari që humbet zgjedhjet do ti thotë PD-së lamtumirë, dhe kjo do të quhet “NENI BASHA” në mënyrë që mos ta harrojnë ata që do vinë në PD se ishte një kryetar që vinte nga humbja në humbje dhe thoshte nuk jap dorëheqje se nuk e thotë Statuti.

Gjithashtu, mesazh kishte rezervuar edhe për Ambasadoren e SHBA, Yuri Kim, e cila, tha Berisha, kishte fyer së tepërmi demokratët me deklarata ndërsa u zotua para anëtareve të Lidhjes Demokratike të Gruas së Shqipërisë se për aq kohë sa ai do të jetë Kryeministër i Shqipërisë apo Kryetar i PD, nuk do e pranojë në zyrë nëse nuk i kërkon falje demokratëve.

“Mirënjohja ime është e pa kufijshme prej meje, sepse me përfaqësuesen tuaj të zgjedhur zonjën Vokshi ju ishit ato që mbështetët lëvizjen për një PD më të bashkuar, më të fortë, më të hapur. Mbështetët foltoren. Ato orë fillimi kanë qenë një garanci për mua, për një përpjekje të suksesshme, një revolucion paqësor, që vjen sot në këtë ditë si revolucioni më i rëndësishëm që ka njohur Shqipëria në historinë e saj. Para 2 muajsh ishim në një greminë të vërtetë. Njeriu që premtoi se tani beteja fillon, kreu një akt epik pabesie. Kreu një akt të pa shembullt në historinë e pluralizmit shqiptar dhe i dha një shtytje, rrokullisjes së pa merituar të forcës sonë politike.

Dy muaj më parë, ne po rrokulliseshim qindra mijëra votues tanë shprehnin me vete apo direkt pendesën se përse votuan PD. Nuk meritonin ata votën tonë. Po ku jemi sot? Falë mbështetjes, vendosmërisë krenare që i dhatë PD, këtij revolucioni paqësor. Ne sot po ngjitemi në nivelet e 25 prillit dhe kjo ngjitje është marshim të vërtetë. Janë ritmet më të shpejta të një force politike e kjo është një garanci e madhe që ne së shpejti do të përballemi me këtë qeveri e cila qëndron në themele të votës së grabitur të shqiptarëve,” tha Sali Berisha duke folur për votën e grabitur të sistemit të patronazhistëve.

Pushteti i Edi Ramës, tha Ish-Presidenti Sali Berisha, qëndron mbi drogën ndërsa Refomën në Drejtësi e cilësoi pseudoreformë.

“Në këtë pushtet, nuk ka vend për liritë. Ata hipokritë që flasin për Reformë të Drejtësisë ju mashtrojnë ju. Ajo ishte pseudo reforma më e turpshme në historinë e një vendi. A u ndërtua Gjykata e re Kushtetuese? U ndërtua. Çfarë ndodh me vendimet e saj? Bajlozët e krimit e të drogës në pushtet i shkelmojnë ato sikur nuk janë. Ne shpëtuam opozitën dhe për këtë duhet të ndihen krenarë të gjithë demokratët.

Plani i fundit i Geroge Soros është shkatërrimi i PD dhe konservatorizmit shqiptar. Por ata u ndeshën me një qëndrim të madh, e para ishit ju dhe e dyta Sali Berisha të cilit ju i besoni. Edi Rama dhe Geroge Soros e kishte të qartë që unë nuk do e pranoja kurrë një aleancë me PS, e këtë ia bëra të qartë në mënyrë të kristaltë gjatë fushatës elektorale. Atëherë menduan që të më ndëshkonin, pa asnjë fakt bazë dhe dokument. Çfarë kisha unë me Geroge Soros? Ai është një monstër, një armik i egër i demokracisë në Shqipëri. Ai është arkitekt i reformës. Ai është arkitekt i monizmit të shoqërisë civile në Shqipëri. Ai është projektues apo rigjallërues i projekteve të Millosheviçit në ndarjen e kufijve të Kosovës. E së fundmi i Ballkanit Soros. Unë kam kërkuar publikisht shpalljen e tij non grata, e në emër tuaj do i them atij që kjo forcë konservatore në pushtet një nga aktet e para që do të marrë është shpallja e tij non grata përgjithmonë,” tha Berisha ndërsa kishte një mesazh për Ambasadoren amerikane Yuri Kim:

“Dua t’i them një fjalë ambasadores, që më shumë se interesat e vendit të saj mbron ato të Geroge Soros. E nderuar zonjë, dera e Sali Berishës si kryeministër apo kryetar partie do të jetë e hapur për ambasadorin e SHBA, me të vetmin kusht, në rast se ajo do të quhet Yuri Kim, kurrë nuk do të shkelë në zyrën time pa iu kërkuar ju të falur. Nuk jemi ne gratë dhe burrat e barit, por jemi atë që kemi rrëzuar diktatorin që u ofronte shqiptarëve bar. Këtë fyerje nuk ua ka bërë kush 30 vite dhe garantoj që në zyrën time nuk do të shkelësh kurrë pa kërkuar falje demokratëve shqiptarë.”

E kur foli për Ambasadoren Yuri Kim, duke ju referuar burimeve amerikane, lideri historik i PD tha para grave demokrate se në një takim me Lulzim Bashën, kryetari i Partisë Demokratike i kishte kërkuar rë dalin të bisdeojnë jashtë sepse Sali Berisha i kishte vendosur regjistrues në zyrë.

“Ju garantoj që dora dorës do mësoni gjëra të pabesueshme për pabesitë e tij të turpshme. Por nuk është koha të harxhojmë kohë me të. Ky zotëri deklaronte të gjitha gafat e tij mi ka imponuar Sali Berisha.

Burime tërësisht amerikane dhe zyrtare më informonin mua se ky, i thotë ambasadores: Të dalim nga zyra se kemi regjistrues nga Berisha, më ka futur regjistrues Berisha dhe të bisedojmë jashtë. A mund të imagjinoni një gjë të tillë?

Unë atë nuk e pranoja kurrë për mandat të tretë. Do gjeja 100 mënyra të vija te ju. Nuk do pranoja kurrë bëheshim ministri e Edi Ramës. Atë që nuk mund të pranoj sovranitetin!”

Duke i ftuar gratë e Lidhjes Demkratike të Gruas së Shqipërisë që më 11 dhjetor të bëhen pjesë e Kuvendit Kombëtar të Partisë Demokratike, Berisha tha se Basha ka shkelur çdo statut të PD dhe për këtë arsye ai duhej të japë dorëheqjen.

“Ne jemi përsëri në një betejë. Kemi një peng, një njeri peng, i cili nuk njeh as siç po dëshmon çdo ditë asnjë normë morale e as ligjore. Nuk jap dorëheqjen thotë se nuk parashikon statuti, po dorëheqja është akt normal i njeriut të shoqëruar dhe të flasësh në këtë mënyrë tregon se nuk di se cila është përgjegjësia morale e njeriut. Je autor i 4 disfatave njëra pas tjetrës. Jam i sigurt, se ti je i përgatitur me këtë moral që ke edhe për 18 të tjera po të la njeri, por ne do të shndërrojmë ty në një shoqatë e asgjë tjetër në 11 dhjetor. Sot janë firmosur rreth 5.000 formularë. Theksoj këtu, se në Kuvend janë të mirëpritur e të ftuar çdo delegat e delegate që nuk kanë firmosur formularin. Pse ecëm ne në këtë mënyrë? Ne mund ta deklaronim këtë pasi mblodhëm 2 mijë firma, por ne vendosëm ta deklarojmë pasi të jemi shumica. Kjo shumicë do të jetë tolerante, jo itolerante. Përkundrazi, edhe ata që nuk mendojnë si ne janë të ftuar, edhe ata që mendojnë kundër nesh janë të ftuar. Garantoj pakicën se do të respektohen çdo kërkesë e saj që është në kuadrin statutor.

Mediat verifikuan firmat, e kanë moralin e nuk flasin më për mosqenien e tyre. Ata panë çdo firmë, çdo aspekt, ndaj të ftojmë ne çdo deputet. Për këtë grup të vogël, për peng Bashën nuk ekziston ligji, statuti. Imagjinoni sa i rëndësishëm do të ishte ky njeri nëse do të ishte bërë kryeministër. Një njeri që nuk respekton asnjë ligj është diktator, e nuk meriton të qeverisë një ditë,” tha lideri historik duke iu rikthyer shkeljes që u bë me rastin e zgjedhjes së Sekrtearit të Përgjithshëm dhe Nënkryetarëve të PD:

“Statuti e ka të zezë mbi të bardhë se Sekretari i Përgjithshëm, Nënkryetari, zgjidhen nga Këshilli Kombëtar me votë të fshehtë e dy kandidatura. Këtë e ka të shkruar Statuti. Asnjë njeri që nuk është zgjedhur me votë të fshehtë, me dy kandidatura, nuk është i ligjshëm në atë detyrë. Sot i kërkoj Sekretarit të Përgjithshëm dhe Nënkryetarëve të PD të japin shembullin duke dhënë dorëheqjen e menjëhershme nga një detyrë e paligjshme që kanë marrë,” tha Berisha para grave demokrate demokrate duke përfunduar:

“Është e lehtë të dalësh nga ekrani në ekran në llogari të Edi Ramës dhe peng Bashës, por mos harro se ke një barrë morale, se nuk je i zgjedhur, por i emëruar nga peng Basha. Nëse të ka mbetur një fije respekti për qindra mijëra demokratë e demokrate që kanë derdhur lumenj djerse, sakrificash ndër vite e që ju ndoqën nga disfata në disfatë jepni dorëheqjen.”

Kush do mund të imagjinonte, tha në fund lideri historik i PD, Sali Berisha, se partia që solli votën e lirë ta përjashtonte votën e lirë nga hapësirat tona.

“Unë i dëgjoj ata se në vend që të japin dorëheqjen dhe të thonë se jemi të paligjshëm, si Kryesi jemi të paligjshëm por thonë, po ja ne u miratuam nga Këshilli Kombëtar. Jo jo Këshilli Kombëtar nuk ka autoritet kurrë të dhunojë statutin e miratuar nga Kuvendi. Ky është një dhunim nga peng-kryetari sepse ai i mbodhi shpejt e shpejt lexoi emrat pa asnjë llojë vote. Dhe këto do marin fund,” tha lideri historik i PD, Sali Berisha, duke u zotuar se Kryetari s’do mund të veprojë kurrë në këtë mënyrë dhe ai që do marri një akt të tillë do dënohet me ligj ndërsa përfundoi:

“Kryetari që humbet zgjedhjet do ti thotë PD lamtumirë. Edhe këtë nen në statut do ta quajmë ‘Neni Basha’ që mos ta harrojnë ata që do vinë pas nesh në PD. Që ishte një kryetar që vinte nga humbja në humbje dhe thoshte nuk jap dorëheqje se nuk e thotë Statuti.”