Nga “Foltorja” në Bajram Curr, Berisha: Ju ftoj me 11 Dhjetor, Edvin strehoje pengun!

Lideri historik i Partisë Demokratike Sali Berisha nga “Foltorja” në Bajram Curr kishte sërish mesazhe për Kryeministrin Edi Rama, Kryetarin e PD, Lulzim Basha dhe mbështetësit e “Foltores” por dhe Presidentin e Serbisë, Aleksandar Vuçiç.

Gjithsesi, prezenca e Ish-Presidentit Sali Berisha bëri që ai të preket nga nostalgjia dhe ta filloi “Foltoren” me vendlindjen e tij, fëmijërinë, Malësinë e Gjakovës, për të vazhduar me sebepin e këtij Kuvendi, momentin kritik në të cilin ndodhet Shqipëria.

“Ju përshëndes ju përzemërsisht me mirënjohje më të pakufishme ndaj juve këtu, ndaj të gjithë malësorëve të kësaj treve kudo ku janë sot. Duke ardhur në Tropojë, në Malësinë e Gjakovës, më kishte pushtuar një ndjenjë e veçantë. në mendje më vinin fjalët e një filozofi se njeriu i lirë është fëmija i natyrës. I thash vetes se njeriu i lirë në vendlindjen e tij është dy herë fëmija i natyrës. Kurse sapo mbërrita në hotel, Floriana më pyeti se si ishte udhëtimi për në Tropojë. ‘Gjysmë qiellor dhe gjysmë tokësor’, -iu përgjigja. Me mendjen time vijë më shpesh në Tropojë. Sa i bekuar isha që linda në Malësi të Gjakovës. Sot pas dekadash larg saj, pas dekadash në Tiranë dhe qindra e qindra shëtitjesh nëpër botë, dua t’ju them se në vendlindjen time unë kreva universitetin më të rëndësishëm të jetës time. Unë mora diplomën e të gjitha diplomave të jetës time.

Në fillimet e memories time, në familjen time si në qindra familje të Malësisë së Gjakovës, ekzistonin odat e burrave. nuk kishte radio, televizion. por të dashur të rinj e gjithë jeta jonë kalonte nga shkolla te oda dhe nga oda te shkolla. E vërteta është se në odë unë, bashkëmoshatarët e mi, mëkoheshim me dashur i të pakufishme për vendin, për Kosovën. Kosova për ata burra ishte toka e shenjtë. Shkolla dhe librat e kishin të ndaluar Kosovën. Në ato nuk flitej një fjalë për në qytet të saj apo lum, apo artist. Kosova nuk ekzistonte për diktatorin Enver Hoxha. Shkova në shkollë të mesme nga Viçidoli dhe aty mësuesi i latinishtes na e bënte në kor gjuhën. më vonë zbulova se kombi shqiptar në të vërtetën absolute rilindi nga Lahuta dhe oda dhe jo nga universitetet,” tha Sali Berisha duke vazhduar me arsyen e kësaj mbledhje në Bajram Curr:

“Miqtë e mi, jemi mbledhur sot në një moment kritik për vendin. Jemi mbledhur në një moment kur 8 vite me radhë Shqipëria a kaluar nga një rekord i zi në një rekord tjetër të zi. në 8 vite veriu i Shqipërisë u diskriminua më shumë se në 8 vite të çdo pushtuesi të të gjitha kohërave. Kujtoni pak përveç asfaltimit të 10 km rrugë të cilat kishin dhe stabilizantin në rrugën Bajram Curri Valbonë, pothuajse asnjë investim. Edi Rama një armik i egër i qenies shqiptare iu vuri dhe taksën te Rruga e Kombit. Qarku më i varfër i Europës, i Shqipërisë, 20 vite diferencë me qarkun e Tiranës, paguan taksë. Ua vuri vizën juve. I vuri taksë veriut dhe Kosovës. Në 8 vite, Edi Rama varfëroi në mënyrë të pamëshirshme qytetarët shqiptarë. ‘Ballkani i hapur’ ka rrethuar Kosovën me armiqësi. Në takimet që bënë lëshon rrufe drejt udhëheqjes politike të Kosovës. Në këto 8 vite nuk ka bindur asnjë shtet që të njoh Kosovën,” tha Berisha duke i çuar një mesazh Slobodanit të ri, siç e cilësoi Presidentin e Serbisë, Aleksandar Vuçiç:

“Hiqe nga mendja se do të kaloj Ballkani i Hapur në Shqipëri, me firmën e Edi Ramës. Mendohu mirë. Mendohu shumë herë! Mendohu shumë herë para se të mësysh Tiranën si mik i Edi Ramës, pasi një popull i tërë do të jetë në rrugë kundër teje. Ne jemi dhe do të punojmë për marrëdhënie normale, por jo kurrë në kurriz të Kosovës. Ai kërcënon Kosovën. A e dini ju që ditën që parlamenti i tij duartrokiste Ramen, Vuçiç puthej me Putin. Çdo përpjekje e tij do të marrë dhe do ia kthejë ushtrinë në kocka dhe armët në hekurishte. Harrojë se mund të prekësh Kosovën. Jemi një komb dhe kurrë më s’do të mund të prekësh një pjesë të territorit të saj. në do paqe dhe bashkëpunim, në radhë të parë të njohësh gjenocidit ciklik ndaj shqiptarëve. Po do paqe shko vizito muzeumin pasardhësi i Millosheviçit, për krimet ndaj shqiptarëve, në të cilat je pjesëmarrës edhe ti,” tha lideri historik i PD dhe pas këtij mesazhi të qartë për Edi Ramën dhe Aleksandar Vuçiç tha se detyrë e Partisë Demokratike është të përmbysë narkoshtetin njësoj sikurse rrëzoi diktaturën komuniste, dhe për të realizuar këtë mision, atëherë PD duhet të shndërrohet në një opozitë të vërtetë; Arsyeja është e thjeshtë, kryetari i PD, Lulzim Basha, në këto 8 vite e defaktorizoi Partinë Demokratike dhe sot Basha po përpiqet të mbledhë firma duke ofruar poste drejtorësh apo zëvendësministrash në kabinetin e kryeministrit Edi Rama.

“Detyra jonë është që këtë narkoshtet ta përmbysim njësoj si përmbytëm diktaturën komuniste. Për të realizuar këtë mision ne duhet të shndërrohemi në opozitë të vërtetë. Sepse në 8 vite peng kryetari në çoi nga dështimi në dështim. Me qëndrimet e tij defaktorizoi PD. Dy ditët e fundit peng kryetari me një grusht vasalësh po përpiqet të mbledhë firma duke ofruar poste drejtorash dhe zëvendësministrash në kabinetin e Edi Ramës. Le ti themi futuni në qeveri si tradhtarë , por do ju përmbysim në një kohë të shkurtër. Ne jemi në prag të një ngjarje historike, të rithemelimit të PD sepse udhëheqja është marrë peng. Pa parti Demokratike dhe pa opozitë të fortë nuk ka pluralizëm në Shqipëri. Më lejoni zoti kryetar i dashur deputet të falënderoj të gjithë delegatët e rrethit të Malësisë së Gjakovës për firmat e tyre historike,” tha Berisha duke sqaruar edhe para demokratëve të Tropojës pse u angazhua tani dhe jo më parë:

“Kam kërkuar të falur që kur i kërkova peng kryetarit të japë dorëheqje, dhe më tha jo, unë duhet të hiqja dorë nga vendimi im i largimit pa kthim, por nuk e bëra. A ka lidhje kjo siç duan ta paraqesin me masë që ka marrë Departamenti i Shtetit, ju them që jo. Blinken njoftoi në Twitter se më kishte shpallur NON GRATA dhe unë i thashë që kjo është vepër e lobimit korruptiv i George Soros dhe Edi Ramës,” tha Ish-Presidenti Sali Berisha nga “Foltorja” në Tropojë u bëri edhe njëherë thirrje drejtuesve të Partisë Demokratike që sipas tij nuk janë zgjedhur por emëruar në pozicionet e tyre, të japin dorëheqjen.

“Gjatë gjithë karrierës time politike kam bërë gjithçka për një marrëdhënie të mirë me SHBA-të. Jam krenar për këtë gjë. Por ajo letër erdhi nga armiqësia e Geroge Soros. Unë nuk kam patur asgjë personale me të. Nuk mund të pajtohesha kurrë me veprimet e tij. Ai mori shoqërinë civile dhe ai dha Edi Ramës në dorë. Në statut do të krijojmë një nen të ri që nëse humb zgjedhjet kryetari largohet. Ky nen do të quhet neni Basha. Le të na bëhet mësim që të mos përsëritet historia si kjo. Statuti do të ketë një nen të ri ku Azem Hajdari do të shpallet president i përjetshëm i PD,” tha lideri historik i Partisë Demokratike duke bërë ftesë për 11 Dhjetor dhe duke akuzuar sërish kryetarin aktual të PD, Lulzim Basha:

“Ju ftoj të gjithë të vini me 11 dhjetor edhe ata që s’kanë firmosur, e këtu kanë firmosur 100%. Edvin pengun merre dhe strehoje ku të duash, por para se të vijmë tek zgjedhjet do të votojmë me këmbë dhe duart tona me protesta deri në përmbysjen e narkoshtetit pastaj do të bëhen zgjedhjet. Me 18 dhjetor formohet shoqata Basha-Bardhi. Është vetë Basha që ka rënë brenda me këmbët e tij me dosjet Toyota Yaris dhe Muzin. I ka gënjyer të gjithë demokratët dhe mua për dy dosjet. Drejtuesit e PD nëse kanë sado pak vlerësim për PD-në duhet të japin dorëheqjen. Kuvendi i PD me 11 dhjetor dotë marrë të gjitha masat që ju dëshironi për ta shndërruar PD-në në shtëpinë e lirisë.”