Nga “Foltorja” në Berat, Berisha: Kemi mbi 50% të kuorumit. Javën e ardhshme shpall datën…

Lideri historik i Partisë Demokratike, Sali Berisha, duke paralajmëruar protesta masive me qëllim largimin e Kryeministrit Edi Rama dhe rikthimin e PD në të gjitha parimet e saj demokratike, nga “Foltorja” e Beratit bëri të ditur se janë mbledhur firmat e mbi 50 për qind të kuorumit dhe se javën e ardhshme do të shpallë datën e mbajtjes së Kuvendit të jashtëzakonshëm Kombëtar.

Duke premtuar mbledhjen e Kuvendit sipas të drejtës statutore për t’i dhënë Partisë Demokratike normat më të mira statutore që meriton në mënyrë që përcaktohet me referendum jo vetëm kryetari por edhe kryeministrin, Ish-Presidenti Sali Berisha tha se do bëhen ndryshime thelbësore në statut, do të hapen idetë e fraksioneve dhe do t’iu mundësohet të kthehen të gjithë ata që kanë vendosur një tullë në këtë parti.

“Ne kemi tetë vite në vendnumëro dhe prapa ktheu. Kjo ndodh se Edi Rama për arsye anti-shqiptare, në një kohë që Evropa krijonte nismën e Berlinit, ky bashkohej me Novisadin, që do të thotë hegjemoni serbe në rajon. Ne duhet të bashkohemi me Evropën. Asnjë vend në BE nuk i është dëmtuar prodhimi bujqësor, sepse kanë kuota dhe subvencione të barabarta për të gjitha vendet. Në rrafshin politik, në një rajon që ka dalë nga luftërat, konfliktet, aleancat nuk sjellin asgjë të mirë, përkundrazi nxisin konfliktualitetin, e në fund, po të shihni zhvillimet që patëm këtë vjeshtë në Ballkan përreth Kosovës janë zhvillime që kanë ndodhur 20 vite më parë,” tha Sali Berisha duke renditur bilancin e zi të qeverisjes së Edi Ramës deri në darmën e 25 Prillit:

“Në 5 vitet e fundit janë larguar nga Shqipëria 500 mijë shqiptarë, po ndodh pastrim etnik. Edi Rama me një të rënë të lapsit heq 20 mijë familje nga ndihma ekonomike. Në kohën tonë ishin 140 mijë familje që përfitonin ndihmë ekonomike, e ne menduam të shtonim dhe 40 mijë familje të tjera, Shqipëria nuk e zhduk dot varfërinë, por mjerimin e zhduk në mënyrë përfundimtare. Këto ndodhën sepse kishte një opozitë të paaftë për të ndaluar këto zhvillime. Opozita dështoi në çdo nismë që ndërmori në 8 vite. Ndodhen me një opozitë, që u tha shqiptarëve se do të mbrojë votën dhe s’e mbrojti atë. Dramë e madhe ishte 25 prilli për shqiptarët. Edi Rama përdori metodat kurrë të përdorura më parë për vjedhjen e votës. Edi Rama shpërndau vetëm gjatë muajit prill mln euro për të blerë vota në zonat e tërmetit. Kreu i opozitës, në vend që të dilte në shesh në mbrojtje të votës tuaj, në vend që të mbusht sheshet, u kthye dhe po merret me karrigen dhe zgjedhjet e tij. Na bëri një dëm të jashtëzakonshëm, sepse duhet ta penalizonim Edi Ramën për atë që ndodhi. Kjo përbën tradhti të vërtetë ndaj votës tuaj.”

Edhe përpara demokratëve të Beratit Ish-Preisidenti Sali Berisha kërkoi ndjesë duke theskuar se është në mesin e tyre me qëllimin kryesor që të ringrihet PD, në idealet dhe fuqinë e saj, për ta përgatitur për një betejë dhëmbë për dhëmbë me Edi Ramën.

“Ku qëndron Sali Berisha në këtë çështje? Padiskutim që unë kam përgjegjësi përpara jush ndaj kërkoj ndjesë. Në vitin 2017 kur i thash të jepte dorëheqjen dhe ai rfuzoi, unë duhet të rikthehesha për të vijuar betejën. Një fjalë thotë më mirë vonë se kurrë. Nuk është vonë të mbrosh për atë që beson. Jam midis jush, me qëllimin kryesor që të ringrejmë së bashku PD, në idealet dhe fuqinë e saj. Ti rikthejmë asaj votën, besimin te vetja. Ta përgatisim atë në një betejë dhëmbë për dhëmbë me Edi Ramën. Atyre që i dhunohet vota, ata kanë protestën dhe vetëm protestën, ndaj jam dhe këtu te ju me besim të plotë, te çdo demokrat, që të përgatiten për protesta që Shqipëria kurrë nuk i ka parë. Nuk meritojmë ne të jemi votëshkelur, vullnet vjedhur, ne do të bëhemi qytetar të lirë. Tani për tani, Edi Rama ka marrë peng Bashën, i cili pasi u zgjodh, harroi çdo interes tuaj, e ka kap një frikë dhe tmerr nga ju, nuk takon asnjeri prej jush.

E përkundrazi, paraqet takimet dhe mbledhjet tona si anti-amerikane, ku këto janë pro-amerikane e të tilla do të mbetet. Këto foltore, kanë si qëllim të mbrojnë sovranitetin e forcës sonë politike. Një forcë politike po nuk qe sovrane, nuk vjen kurrë në pushtet, s’ka dinjitet. Ne jemi patriotë dhe kemi interes të parë atë kombëtar. Ndaj dhe ne qëndrojmë plotësisht në këto parime. Foltorja jonë është për bashkimin e demokratëve. Të atyre që gjatë qeverisjes i dhanë Shqipërisë ndryshimin. Të atyre që në këto vite derdhën djersë,” tha Berisha ndërsa kishte një mesazh edhe për ata që janë në këtë.

“Ata që nuk janë sot në këtë sallë dhe e konsiderojnë veten mbështetës së Bashës, që të gjithë janë mbështetës të PD, por një njeri që çon nga humbja në humbje, që regjistron 4 humbje me radhë, ka dorëzuar 4 beteja të pabëra, duhet të hapë rrugën. Ne na kujtohen sekretarët e parë të rretheve i emëronte byroja politike, nëse ne jemi PD dhe i zgjedhim vetë kryetarët e partive.”

Para demokratëve të Beratit, Berisha u shpreh se vettingu në politikë është i nevojshëm por ai duhet të bëhet brenda strukturave të Parlamentit dhe jo nga SPAK, ndërsa për shifrat e përfolura nga rivalët që “Foltorja” ka mbledhur për mbajtjen e Kuvendit Kombëtar, ai u bëri të qart se kuorumi për mbi 50% është mbledhur.

“Vetingu i politikanëve është i domosdoshëm, por jo mbi rregulla policeske, por mbi rregulla transparente. Ne bëmë një ligj, Komisioni i Venecias e përmbysi. Vetingu bëhet dhe bëhet më mënyrën më transparente. Ne kemi hequr imunitetin për korrupsionin. Kemi ligj anti-mafia të shkëlqyer. Se si mundet një forcë politike që e quan veten demokratike, të propozojë që të vendosë SPAK-u për mandatet e deputetëve, që është i Ramës, do të thotë që je skllav i tij. Janë këto rrethana që na ftojnë ne demokratëve të mbledhim Kuvendin, e ju të merrni vendin qendror, të zgjidhni, këshilltarët tuaj, deputetët tuaj, të përcaktoni kufijtë e kryetarit. Për të gjitha këto, mendoj që çdo demokrat dhe demokrate duhet të firmos për kuvendin e ardhshëm,” tha Berisha duke bërë të ditur dhe ditën e shpalljes së Kuvendit:

“Kuorumi mbi 50% është tejkaluar me kohë. Ne do të mbledhim kuvendin. Do të bëjmë ndryshime thelbësore në statut, do të hapim idenë e fraksioneve, do të bëjmë që të kthehen të gjithë ata që kanë vendosur një tullë në këtë parti. Do të bëjmë gjithçka që fëmijët tanë të shohim që po punojmë për ta. Javën që vjen do të shpallim datën për mbledhjen e Kuvendit Kombëtar. Do të mblidhemi sipas të drejtës statutore për t’i dhënë PD-së normat më të mira statutore që ajo meriton. Për të përcaktuar ju me referendum jo vetëm kryetarin, por edhe kryeministrin. Do vijë njëherë tek ju, që të jetë apo jo Kryeministër.”

Në fund, para demokratëve të Beratit lideri historik Sali Berisha e bëri të qartë se Partia Demokratike nuk do ti mbyllë kurrë dyert atyre që sot e kundërshtojnë “Foltoren” përkundër sjelljes së tyre hakmarrëse ndërsa u shpreh i hapur për çdo detyrë në harkun kushtetues, përfshirë edhe atë të kryetarit të PD.

“E gjithë kjo përpjekje është që ju të zgjidhni kryetarin. Natyrisht, Sali Berisha në mënyrë të padiskutueshme është i hapur, siç kam deklaruar në datën 20 maj, për çdo detyrë në harkun kushtetues të këtij vendi, përfshirë edhe kryetar i PD. I përket anëtarësisë të zgjedhë kryetarin e saj.”

Ndryshe, “Foltorja” e radhës me demokratë do të zhvillohet të martën, më 26 Tetor, në Kavajë.