Nga “Foltorja” në Elbasan, Berisha: Kuvend për rithemelimin e PD, Basha të largohet!

Lideri historik Sali Berisha sot nga “Foltorja” e Elbasanit i bëri thirrje demokratëve të firmosin për Kuvendin Kombëtar që do të jetë dhe Kuvend i rithemelimit të Partisë Demokratike, ndërsa Lulzim Basha si shkaktar pse Edi Rama është në pushtet duhet të largohet nga drejtimi i partisë.

Dhe jo vetëm kaq! Lulzim Bashën e akuzoi se me mënyrën e drejtimit të partisë, përzuri votën e lirë nga PD, duke i bërë një dëmtim të jashtëzakonshëm, por u zotua me këtë rast se do ta rikthejë votën në mënyrë që demokratët të përcaktojnë drejtuesit e degëve, deputetët dhe renditjen e tyre.

Nga “Foltorja” e Elbasanit Ish-Presidenti Sali Berisha kishte një mesazh të qartë edhe për Edi Ramën i cili me qeverisje e tij vazhdon rritjen e çmimeve të artikujve themelor.

“Edi Rama, ta dish mirë se kur të ngrihemi në këmbë në protestë, nga rruga nuk shqitemi pa të hedhur ty aty ku e meriton,” tha Berisha para demokratëve elbasanas duke ju bërë thirrje të përgatiten për protestat më të fuqishme që ka njohur vendi.

“Ju i rezervoni kësaj foltoreje që në një kohë të shkurtër, demokratët dhe demokratet e Shqipërisë e shquan në dritë shprese, për PD, për shoqërinë dhe kombin shqiptar. Vij sot, më i motivuar se kurrë. Për t’i dëshmuar shqiptarëve se ne jo vetëm jemi, njerëzit, qytetarët, demokratë dhe demokrate të idealeve fisnike, njerëzore dhe kombëtare, por jemi sot në këmbë më të vendosur se kurrë në mbrojtjen e tyre dhe vendosjen e tyre në piedestalin që meritojnë. Sot është një thirrje e brendshme e ndërgjegjes së çdo demokrati. Edi Rama dhe regjimi i tij ka katandisur Shqipërinë dhe shqiptarët ne delen e zezë të Ballkanit dhe Evropës, në një vend pa shpresë, nga i cili të rinjtë ikin, ikin dhe vetëm ikin. Shqiptarët nisën një rrugë zhvillimi, po ku janë sot shqiptarët pas 8 viteve? Janë 30% më ulët seç ishin në vitin 2013. Nëse ne në atë vit kishim rrogat më të larta në rajon, sot kemi më të ulëtat. Ku jemi sot pas tetë vitesh? Jemi në vendin që janë investuar nga borxhet dhe taksat tuaja, mbi 5 mld euro. Por çfarë janë ndërtuar? 34 km autostradë të lëna në mes në vitin 2013. Ku shkuan këto? Këto shkuan në xhepat e qeveritarëve dhe oligarkëve të qeverisë. Çfarë ndodhi me ne këtë tetë vite? Rreth 3 vite më parë një nga organet më prestigjioze të Evropës, bëri një klasifikim të habitshëm. Klasifikon liderat e Evropës sipas rëndësisë, e më të pa rëndësishmin vlerësonte Edi Ramën. Po pse? Është Shqipëria më e pa rëndësishmja? Jo, s’është,” tha i bindur Ish-Presidenti Sali Berisha duke shtuar se ky vend qeveriset nga njeriu që nuk e meriton sepse opozita kalon nga humbja në humbje.

“Ne kemi një pozicion strategjik, sepse na kanë lakmuar ndër shekuj, për shkak të pozicionit shumë të rëndësishëm që kemi. Njeriu që sillet si ordiner. Diskutohet se vendet e Ballkanit Perëndimor të mos i përfshijnë në integrim, t’i japin fonde e aq. Kur bëhesh kampion në Evropë për kërkesat e azilit politik. Kur kthehesh në qendër kriminaliteti, kush do të bëj me ty? A e dini që kjo situatë dëmton Kosovën për të hapur vizat. Padyshim, e them me bindje. Këtu na ka katandisur Rama. Megjithatë ai kalon nga mandati në mandat. Ky njeri që nuk meriton të qeverisë një orë merr mandatin e tretë, sepse opozita kalon nga humbja në humbje. Kreu i opozitës nuk përmban rregullin fillestar, kur humb të japësh dorëheqjen. Basha kalon nga humbja në humbje dhe nuk kujton që duhet t’i hapë rrugën të tjerëve për të shkuar në fitore. Humbëm zgjedhjet, dhe Basha shpalli masakrën në vend që të mbronte votën tuaj, ta denonconte me dosje dhe dokumente, por ai u mor me karrigen e tij. Në vitin 2021, diferenca mjerisht, midis demokratëve dhe PS është në favor të PS, më e madhe seç ishte diferenca në vitin 1997. Në 97’ ishte diferenca 90 e ca mijë vota, tani ka shkuar në mbi 100 mijë. Megjithatë ai injoroi batërdinë zgjedhore dhe u mor me zgjedhjen e tij.

Në këto kushte, janë demokratët që jemi para një misioni të ri, ky mision është shpëtimi i pluralizmit. Nuk ekziston pluralizmi nëse ne nuk ngrihemi fuqishëm për të hedhur këtë regjim, më i keqi që kanë pasur shqiptarët që nga koha e Enver Hoxhës e deri më sot. Cfarë synojmë ne me këtë foltore? Para së gjithash ne synojmë të rivendosim sovranitetin tonë. Sovraniteti nuk është robëri, por sovraniteti është që ne si njerëz të qytetëruar të mbrojmë lirshëm detyrimet, idealet, idetë që kemi, të vendosim, të votojmë të lirë për këto, e jo pse thotë kryetari. Sovraniteti do të thotë të ecësh me dinjitet. Sovraniteti dhe dinjiteti janë jetik për të mos qenë një forcë fasadë, por për të qenë një forcë e vërtetë për të ardhur në pushtet,” tha lideri historik i PD duke e bërë të qartë se kjo nismë është për të ringrtur edhe njëherë Partinë Demokratike, ashtu siç e themeluan.

“Ku e gjejmë ne forcën për një PD të fuqishme, të bashkuar. E gjejmë para se gjithash te vota e lirë. Cilido që është në këtë sallë, ju garantoj që kurrë para vitit 2013, probleme në zgjedhjet e brendshme të PD s’ka pasur. Sepse ka pasur votim të hapur. Partia është rrudhur në një mënyrë të pamerituar. Kam një kërkesë për delegatët, që të firmosin për mbledhjen e kuvendit të Partisë Demokratike. Mund ta quani edhe Kuvendin e rithemelimit të PD,” tha Berisha duke premtuar rikthimin e votës në PD dhe kompetencat e drejtuesve të saj ndërsa përfundoi:

“Ata që përzunë votën e lirë nga PD, i bënë asaj, një dëmtim të jashtëzakonshëm. Ne do të rikthejmë votën. Me votën tuaj të lirë, ju do përcaktoni drejtuesit e degëve, deputetët dhe renditjen e tyre. Do përcaktoni qeveritarët vendorë dhe këshilltarët e tuaj. Po çfarë bën kryetari që vendos në statut, që kryetari i Elbasanit do i miratojë kryetari i partisë. Ne do ju japim ju të gjitha kompetencat që meritoni.”

Sot Ish-Presidenti Sali Berisha shkoi një hap më tutje në aksionin politik me “Foltoren”. Para demokratëve të Elbasanit ai paralajmëroi protesta masive deri në rrëzimin qeverisë.

“Prandaj ne duhet të përgatitemi për protestat më të fuqishme që ka njohur vendi. Protestë, protestë dhe vetëm protestë. Edi Rama, ta dish mirë se kur të ngrihemi në këmbë në protestë, nga rruga nuk shqitemi pa të hedhur ty aty ku e meriton.

Mos luaj me çmimet, mos luaj me kafshatën, se shqiptarët paguajnë kafshatën 80 herë më shtrenjtë se qytetarët e vendeve të BE. Sepse ata e paguajnë naftën njësoj si qytetarët e Zvicrës, që kanë një rrogë mesatare prej 6 mijë eurosh kundrejt 400 eurove që marrin qytetarët shqiptarë. Ne do ngrihemi në këmbë, si opozitë e vërtetë, si opozitë që beson te liria. Ndaj ftoj demokratët të përgatitemi për një betejë deri në fitoren e plotë!”

Edhe para demokratëve të Elbasanit, lideri historik i Partisë Demokratike kërkoi ndjesë pse ka mbështetur Lulzim Bashën ndërsa është e bindur se sikur këtë aksion politik që po ndërmerr tani, do ta zhvillonte në vitin 2017, PD do të ishte në pushtet.

“Në këto tetë vite kam mbështetur një njeri, që nuk po e marr në rrafshin njerëzor, se po ta marrësh në rrafshin njerëzor, si ai thuhet se as nuk duhet të vijë, besëprerë. E marr në një qëndrim jashtëzakonisht të paimagjinueshëm ndaj vlerave që ne sollëm në Shqipëri. Çfarë kemi sjellë në Shqipëri? Votën e vërtetë, votën e lirë. Se votë kishte, por ishte e kapur. Sollëm edhe liritë e të drejtat njerëzore dhe interesin kombëtar. Po nuk ishte pak se po të shkosh në vitin 1990, ku ishte çështja kombëtare dhe ku jemi sot, ne duhet të jemi të lumtur.

Por partia filloi të bjerë shumë në këto dy shtylla kryesore të saj. Unë e kam mbështetur në mënyrë absolute duke i thënë atij privatisht gjithçka dhe i kam të dokumentuara se nuk jam njeri spontan. Por publikisht e kam mbështetur fuqimisht me shpresën se do ecim drejt fitores. Por ai kishte axhendë tjetër, që të lartësonte veten. Por nuk mund të lartësohesh me atë që bëri në vitin 2017, kur doli në pusi dhe vrau bashkëpunëtorët e tij. Gabimi im i madh është se në vitin 2017 nuk e ndërmora aksionin që mora tani, dhe ju siguroj se do ishim në pushtet tani. Do kishim hapur negociatat,” tha lideri historik i PD, Sali Berisha, duke përfunduar:

Ju garantoj se do bëj gjithçka që të rikthej vlerat!