Nga “Foltorja” në Fushë Krujë, Berisha: Kuvendi i 11 Dhjetorit do të hap PD-në!

Lideri historik i Partisë Demokratike, Sali Berisha, nga “Foltorja” dha shumë mesazhe lidhur me pritshmëritë e demokratëve, iu përgjigj kryetarit aktual të PD, Lulzim Basha, për fitoren e vetme që foli ndërkohë ku sqaroi se kishte fituar në Tiranë vetëm pse kishte spostuar Ish-Kryeministrin në Berisha, ndërsa këtij njeriu që shpiku 18 Dhjetorin si ditë e mbajtjes së Kuvendit Kombëtar i bëri të qartë se ai do të mbahet ashtu siç kishin kërkuar 4.200 delegatët, më 11 Dhjetor.

Ndonëse Lulzim Basha nuk e kupton se çfarë do të thotë hapja e Partisë Demokratike, lideri historik u zotua se Kuvendi i 11 Dhjetorit, do të jetë Kuvend që do të ndajë PD nga një e shkuar e hidhur dhe do të hapet ndaj vlerave.

Edhe në Fushë Krujë, Ish-Presidenti Berisha, Foltoren e cilësoi si revolucion paqësor i cili ndezi shpresat në zemrat e demokratëve, të cilët pas humbjes së 25 Prillit mbeten të vetmuar sepse Kryetari i PD në vend që të thërriste protesta masive nuk ndërmori asnjë hap.

“Ju siguroj, se Foltorja apo revolucioni ynë paqësor, ka bërë miq në mbarë Evropën dhe Botën. Ata shohin këtë zhvillim si tepër pozitiv, apo thënë më tepër si të vetmin zhvillim pozitiv të 8 viteve të fundit në Shqipëri. Foltorja e cila së pari ndezi shpresat në zemrat e demokratëve e demokrateve është shtruar sot në dritë shprese në tunelin e zi në të cilin kishin ngujuar narkoshtetin shqiptar, qytetarët e këtij vendi. Foltorja u thërrit nga ndërgjegjja, nga idealet e demokratëve e demokrateve shqiptarë në një moment kritik për vendin e kombin. Në vitin 2013 në Shqipëri u ndërrua pushteti, me votën e qytetarëve shqiptarë u zgjodh një kryeministër tjetër. Ish-kryeministri Sali Berisha njohu zgjedhjet dhe hapi krahun për një gjeneratë të re me besimin e madh se kjo gjeneratë mund të çonte në horizonte të reja opozitën dhe Shqipërinë.

Por këto vite ishin vitet si asnjëherë tjetër të Evropës u regjistruan rekordet më të zeza. Në këto vite shqiptarët, në vend që t’u rritej mirëqenia, por këto vite ndodhi e kundërta. Ekonomia shqiptare u la në një borxh 62.6% sot ekonomia shqiptare rrok një borxh rreth 100%. 8 vite ishin 8 vite rrokullisje, ku rrogat u ulën për shkak të inflacionit, e Shqipëria ra në vendin e fundit në Rajon. Shqiptarët kanë braktisur vendin e tyre po aq sa sirianët që ishin në luftë. Në këto 8 vite, shërbimet ndaj tyre degraduan. Epidemia e COVID-it rendoi më shumë se çdo qytetar tjetër të Evropës. Ligjin këto vite e ka marrë në dorë krimi, edhe brenda në Parlament. Me dhjetëra ligje janë votuar, për krimin në parlament që ata të merrnin tendera dhe koncesione. 15 herë, u rritën tenderat sekrete. Përfitues kryesor ishin klanet qeveritare, në kundërshtim me çdo ligj, baxhanaku i kreut të meduzës bënte kërdinë me tendera. Shqipëria u rendit e dyta për korrupsion në botë,” tha lideri historik i PD duke shtuar se Edi Rama shkelmonte në zgjedhje në zgjedhje votën tuaj.

“Opozita dështoi. Ju keni kontribuar e sakrifikuar për të ardhur në pushtet, por sakrifikuat për një kryetar që mendon për vete dhe mendonte se si të shkonte në bashkëqeverisje me Edi Ramën. Nëse ka një vendim që e kam penguar, ju garantoj që është vetëm ky vendim. E kam bërë këtë, me ndërgjegjen e thellë se një aleancë me krimin, korrupsionin, do të ishte dita më e zezë për Shqipërinë e shqiptarët. Vota u vodh si asnjëherë tjetër në 2021 dhe kryetari vec që të na thoshte të dilnim në sheshe e të bënim protestat më të rëndësishme, në vend se të nxirrte demokratët në rrugë. Nëse dëgjoni se si është bërë numërimi i votave në pallatin e sportit të Elbasanit, do të ndieni një dhimbje të madhe. Në kohën kur numëruesja jonë fliste emrin e PD, kur dilte votë e saj. Një kriminel në sallë i drejtohet të shkurtoj gjuhën nëse përmend emrin e kësaj partie, e ajo nënshtrohet. Po pse kjo? Sepse ishte bërë kompromis me krimin. Forcat politike nuk bëjnë kurrë kompromis me krimin. Ne do të qëndrojmë fuqishëm, si forcë e ligjit.”

Sot nga Fushë Kruja Ish-Presidenti Sali Berisha iu përgjigj Lulzim Bashës pasi deklaroi se ka fituar zgjedhjet e vitit 2011 për Bashkinë Tiranë, pasi nuk kishte në krah Sali Berishën. 

“Nuk po merrem me faktin se absolutisht çdo natë, dhe janë të gjitha kronikat, por përveç mundimit që bënim në fushatë, çdo natë kthehesha me ish-kryetarin e partisë për fushatë. U mbyllën numërimet, Edi Rama doli me 10 vota para. Më njoftojnë zyrtarët tanë se në kutitë e votimit janë vota të keqvendosura. Këto quhen në Kodin Zgjedhor të Venecias si vota të vlefshme. Vota e hedhur gabim në një kuti quhet e vlefshme. Unë kërkoj që ato të numërohen. Fillon numërimi i tyre. Tani vjen pjesa interesante. Të nesërmen kishim një këshilltar amerikan në fushatë, shumë i mirë, më troket dhe më thotë se te Rruga e Elbasanit ka një shqetësim për këtë që po bëjmë. Druhem shumë se do bëjnë deklaratë, më thotë. Miku im, i them unë, po numërohet çdo votë në përputhje me dy kodet më të rëndësishme zgjedhore në botë. Këto janë legjitime, por nëse duan ata të ambasadës, janë të ftuar të prekin dhe të shohin çdo votë. Votë kujt nuk i marr, por votë nuk i fal njeriu.

Unë po të flas në emër të zotit Basha, më thotë ai. “I them thuaj zotit Basha se nuk po e bëj për të, por po e bëj për demokratët shqiptarë,” i them. Kjo bisedë është bërë me dëshmitarë. Kjo është historia e fitores me 80 vota, i cili nuk mori dot as votat e koalicionit ç’është e vërteta. Pas asaj fitoreje ai nuk pa më asnjë fitore elektorale dhe vetëm humbje,” tha Berisha para demokratëve të Fushë Krujës duke shtuar se këtu nuk jemi për histori të shkuara, por për histori të ardhme, për të shkruar një kapitull të ri.

“Jemi për t’i thënë Edi Ramës, e ti japim ultimatum se mund të konfiskosh shtëpinë e demokratëve në Tiranë, kujtohu mirë se ke zyrë dhe seli partie, i bindur të jesh që s’mund të mbash peng selinë e PD me peng kryetarin. Ndaj dhe të heqë dorë nga lojërat e turpshme, lojërat primitive, me pluralizmin shqiptar. Miqtë e mi, 4.200 firma u mblodhën.”

Edhe në Fushë Krujë lideri historik i PD e konfirmoi se më 11 Dhjetor do të mbahet Kuvendi, ku do të synohet një parti më e hapur dhe jo siç ndodh tani, që anëtarët e kryesisë dhe Sekretari i Përgjithshëm, zgjidhen pa vota.

“Kurrë në PD nuk ka ekzistuar diskutimi për manipulimin e votës. A do të qëndrojmë në nivelin e para 2013 apo do të kapim nivele të tjera, unë jam me idenë që duhet të vijojmë përpara. Do të rikthejmë primaren për t’i dhënë fund kohës kur i zgjedhuri thotë se unë jam i kryetarit. Ata janë të të gjithë të anëtarëve, edhe unë. Jam deputet i anëtarëve të PD dhe të gjithë qytetarëve që na kanë votuar. Kjo ndodh kur kryesia e anëtarët të zgjidhen me votën tuaj, kur këshilltarët të zgjidhen me votën e anëtarëve. Atëherë vendosim paqe të brendshme, forcë në parti, vendosim besim. Kanë nisur të huajt të thonë që ky njeri s’ka asnjë të drejtë të flasë për votën. Në statut ka shkruar që Sekretari i Përgjithshëm zgjidhet me votë të fshehtë. Sekretari i Përgjithshëm është zgjedhur pa asnjë votë. Nga anëtarët e kryesisë 15 janë votuar me votë, të tjerët jo siç duhet. Ky e ka shndërruar votën në minorancë në PD.”

Shtetet e Bashkuara janë vendi më i fuqishëm i botës për liritë që i garantojnë qytetarëve, tha lideri historik i Partisë Demokratike, Sali Berisha, e PD është në fillim të shpalosjes.

“Kuvendi i 11 Dhjetorit, do të jetë Kuvend që do të ndajë PD nga një e shkuar e hidhur. Ne do të hapemi, do të hapemi ndaj vlerave. Do të riformulojmë programin tonë. Ne i kemi mbijetuar rebelimit komunist. Ne jemi parti që do të rikthejmë vlerat në program, dinjitetin njerëzor, interesin kombëtar. Ju e shihni e jeni dëshmitarë se ç’po ndodh me interesin e qytetarëve në këto kohë. Prej 1 jave fermerët e Lushnjës janë në protestë, sepse Ballkani i Hapur ia hoqi TVSH-në. Çfarë interesi kombëtar ke të rrethosh Kosovën me armiqësi, të Beogradit, Shkupit dhe Tiranës.”