Nga “Foltorja” në Kamëz, Berisha: PD do të rikthehet si forcë konservatore!

Misioni i “Foltores” është i madh, është rikthimi i Partisë Demokratike në vlerat e partisë konservatore, në vlerat e saj, tha lideri historik i PD para demokratëve të Kamzës duke e pranuar se në këto 8 vite ajo shkau majtas dhe drejt greminës pas angazhimit të George Soros me bilionat e tij që të shkatërrojë vlerat e konservatorizmit duke përfshirë këtu dhe Shqipërinë.

Por Berisha është i sigurt se PD do të ngrihet si forcë konservatore dhe më e fuqishme se kurrë dhe do të qëndrojë si partnerë të SHBA dhe BE-së ndërsa kishte dy fjalë për për ata që hezitojnë të bashkohen me “Foltoren”:

“Jemi një me ta, ata janë demokratë si ne por një opozitë e vërtetë është jetike për demokracinë!”

“Keni ndërtuar këtu ëndrrat më të bukura tuajat dhe fëmijëve tuaj. Cilido që do të prekë sakrificën njerëzore e këshilloj të vijë në Kamëz dhe Paskuqan, të rishohë pamjet e 30 viteve më parë dhe t’i krahasojë me pamjet e sotme, janë dy botë. Foltorja është misioni i madhi i dytë në 30 vitet e fundit, kurse ju demokratët dhe demokratet e Kamzës dhe mbarë Shqipërisë jeni misionarët e saj të sigurt në fitoren e ardhshme të PD-së. Ne qëndrojmë fuqishëm pas një kauze, e cila është kauza themelore e lirisë. Është kauza e lirisë, e qytetarit që do të jetojë me nder e dinjitet. Është kauza e qytetarëve që e kuptojnë dhe besojnë se pa pluralizëm të vërtetë politik nuk ka liri. Liria është shkretëtirë e vdekur. Është kauza e burrave dhe grave që jetojnë me djersën e ballit të tyre, që jetojnë të lirë dhe që besojnë që Shqipërinë mund ta ngrenë në lartësinë e ëndrrave të tyre, por si njerëz të lirë, me dinjitet, si shoqëri sovrane, e cila lufton për liritë e individit, për familjen, shenjtërinë e saj, për vendin dhe interesin kombëtar, për pronën dhe të gjitha të drejtat e njeriut. Misioni juaj është i madh. Është rikthimi i PD-së në vlerat e partisë konservatore, në vlerat e saj.

Pyeteni veten pse 30-40% e vëllezërve e motrave tanë nuk dalin në votime. Pse ata nuk votojnë PD-në? Se PD këto 8 vite i braktisi ata. I braktisi vlerat që ata besojnë, shkau majtas dhe drejt greminës. Ata presin ju, presin ne t’i rikthejmë vlerat partisë sonë, ta shndërrojmë atë në lokomotivë të zhvillimit të Shqipërisë. Ju jeni misionarë të një misioni të madh. PD ndodhet në këtë periudhë në ditë kritike, mafia më e rrezikshme e planetit e kryesuar nga multimiliarderi George Soros u vërsul me tërbim mbi të djathtën shqiptare. Soros nuk është Amerika, është një armik i egër i aleatëve tanë të vërtetë, republikanëve amerikanë. Ai me bilionat e tij punon ditë e natë të shkatërrojë vlerat e konservatorizmit. Të njëjtën gjë bëri në Shqipëri. Jemi këtu për t’u zotuar se në Shqipëri do ngrihet një forcë konservatore, PD më e fuqishme se kurrë në 30 vite,” tha Sali Berisha duke lëshuar alarmin se vlerat që ne besojmë janë më të rrezikuara se kurrë.

“Ne i besojmë familjes, si themeli i shoqërisë, Rama futi në shkollë numërtimin e prindërve. Tani ka çuar në parlament ligjin për t’i hapur rrugë trafikimit të fëmijëve, nëpërmjet adaptimit. Nuk kam asgjë kundër adaptimit, por t’i besosh fëmijën atij që është krejt i vetëm, në kushtet kur je shtet narkotrafiqesh e bën objekt trafikimi.

Save the Children ka publikuar studimin e tij, ku thotë se fëmijët në Shqipëri janë 2 herë më të rrezikuar se në Kosovë, nuk flas për vendet e tjera. Ku tregon se fëmijët e Shqipërisë zënë vendin e parë në rrugët e Europës si fëmijë të trafikuar. Dhe ky tani që vetëm shqiptar nuk është do ta miratojë ligjin të trafikimit të fëmijëve. Misioni juaj është i madh dhe është në kohë kritike,” tha ai para demokratëve të Kamzës ndërsa e cilësoi zhvillim pozitiv rezultatin në zgjedhjet në Maqedoninë e Veriut duke theksuar se aty ku u pagëzua me emrin e George Soros “Ballkani i Hapur” aty dhe vdiq.

“Si fantazmë në Ballkanin e pasluftërave shëtit aleanca trilaterale Beograd-Tiranë-Shkup, kryekëput kundër Kosovës dhe kombit shqiptar. Unë e përshëndes qeverinë e Kosovës që qëndroi e palëkundur kundër kësaj nisme që sjell konfliktualitet, që rikthen hegjemoninë e Beogradit në rajon që shndërron Shqipërinë dhe Maqedoninë në vasal të Beogradit. E rrethon Kosovën. Ka nevojë për bashkëpunim mes vendeve të barabarta, jo për hegjemonizma.
Një përshëndetje zgjedhësve të Maqedonisë së Veriut që ia prenë biletën një aventurieri i cili me aventurën e tij, e shndërroi Maqedoninë e Veriut në mollë sherri midis Serbisë dhe Bullgarisë. Ky politikan i verbër harroi se për Beogradin nuk ka qenë gjë tjetër vetëm juzna Serbia. Ky vrapoi drejt Beogradit njëlloj sikur të ishte i biri i Pashiqit. Zhvillimi i madh pozitiv në Maqedoninë e Veriut ishte se aty ku u pagëzua me emrin e George Soros Ballkani i Hapur aty dhe vdiq 2 ditë më parë nga vota e qytetarëve të Maqedonisë.”

Lideri historik i Partisë Demokratike tha se takimet e tij kanë rikthyer shpresën tek shqiptarët ndërsa dha mesazhin e qartë nga “Foltorja” në Kamëz se PD është historia e lirisë dhe se gjithmonë do të jetë partnere e SHBA.

“Shqipëria sot qeveriset nga një grup i cili nga mëngjesi në darkë vetëm vjedh qytetarët shqiptarë. Edi Rama ka grupuar në qeverinë e mandatit të tretë hajdutet me profesioniste. Merrni pak ministren e Jashtme që ka dalë nga piramidat. Sa ishte ministre 460 hektarë tokë bregdeti ia mori ushtrisë për t’ia dhënë të afërmve të saj. Edi Rama nuk i nxjerr kurrë në TV ata sepse në çdo fjalë u vjen era vjedhje. Po ministrja e Kulturës u shiti lahutën Serbisë. Sot është koha e hajnave, e hajdutëve. Kohat janë kritike. Kjo qeveri është qeveri e cila gjithçka bën për varfërimin e shqiptarëve,” tha Berisha duke ritheksuar se “Foltorja” ka rikthyer shpresën dhe të gjithë po i bashkohen për të përmbysur regjimin.

“Edi Rama njoftoi sot një taksë tjetër mbi karburantin. Në vitin 2013 çmimi në pompa ishte dyfishi i çmimit të bursës ndërsa sot çmimi në pompa është trefishi dhe ai do ta bëjë katërfishin. Ju e blini litrin e naftës me të njëjtin çmim siç e blejnë qytetarët në Zvicër. Ju qytetarë shqiptarë paguani energjinë elektrike me një nga çmimet më të lartë në Europë. Shqipëria 98% të energjisë e ka vetëm ujore. Është koha t’ia presim ne faturën e të gjithave Edi Ramës dhe klikës së tij,” tha Berisha duke shtuar se këto 8 vite Edi Rama e shndërroi  Shqipërinë në delen e zezë të Europës.

“Asnjë biznesmen i huaj nuk vjen këtu sepse këtu sundon krimi. Shqipëria është bërë frikë dhe tmerr për vendet e tjera. Ky regjim na i mbylli dyert e Europës. Ne ecëm të pandalshëm nga etapa në etapë në integrimin e këtij vendi, por prej 8 vitesh Shqipëria është në vendnumëro. Një njeri i papërgjegjshëm vjedh votat, përdor paratë e drogës, ngre sistemin e patronazhistëve. Edi Rama dije mirë se do ta paguhesh për atë që u ke bërë shqiptarëve. Foltorja jonë është kthyer në një burim shprese, por ka tmerruar narkoshtetin, i ka lemeritur ata,” tha Ish-Presidenti Sali Berisha ndërkohë i pyetur për qëndrimet e Ambasadores amerikane në Tiranë, Yuri Kim, Berisha nuk pranoi të komentonte apo të fliste me emra, ndërsa foli për qllimet e, siç tha, mafies Sorosiane.

“Cili është qëllimi i mafies Sorosiane është ta paraqesë PD si forcë anti-amerikane në një kohë kur kemi qenë lokomotivë e bashkëpunimit. Nesër në pushtet Sali Berisha dhe ju do të vendosin marrëdhëniet më të mira. Ne nuk duhet të ndikohemi, ju përmendët emra por unë dua të them se një nga shkaqet themelore të shpalljes NON GRATA ka qenë qëndrimi im ndaj ndryshimit të kufijve të Kosovës. Nuk mund të pranoja kurrë të jepnin territore sepse nuk i kemi borxh kujt. Ne jemi në tokat tona, pro të shkojmë duke dorëzuar territore kjo nuk mund ë ndodhë. Ky projekt i pastër i Millosheviçit i cili pas lufte u paraqet si projekt i George Soros për ti dhënë pasqyrim të ri. E kundërshtova dhe do ta kundërshtoj. Për këtë Edi Rama më tha në 2019 se nuk kalon dot Atlantikun, e drejta vonon, por del. Ai që ishte promotor kryesor nuk është më në administratën amerikane dhe sot Biden e ka ndaluar me ligj tregtimin e territoreve. Ne do të qëndrojmë në të drejta të plota tek Amerika e vlerave që ka dhënë kontribut në Kosovë,” tha Sali Berisha duke garantuar:

“Ne do të qëndrojmë si partnerë të SHBA-ve, të BE-së. Ne jemi historia e Shqipërisë së lirë.  Ndaj edhe po rikthehemi fuqishëm në misionin tonë.”

Dy fjalë i kishte për për ata që hezitojnë të bashkohen me “Foltoren”:

“Jemi një me ta, ata janë demokratë si ne por një opozitë e vërtetë është jetike për demokracinë. Një opozitë vendimet që ia marrin të tjerët nuk vjen kurrë në pushtet. Një opozitë që shkelmon statutin, forumet nuk sjellin kurrë në pushtet. Ndaj edhe ne  kërkojmë të rikthejmë vlerat me të cilat jemi themeluar. Nuk është çështje personash këtu, por parimesh, vlerash, e të ardhmes. Çdo demokrat duhet të bashkohet në përpjekjet tona për të mbledhur Kuvendin. Do të vendos një raport të drejtë me ju.

Garantoj që qëllimi im në këtë nismë është ë PD të shndërrohet në shtëpinë e lirisë, ku ju anëtarët dhe anëtaret e saj të merrni vendime në liri të plotë për drejtuesit, statutin dhe për të gjitha problemet. Nëse nuk i rikthejmë këto norma ne nuk përmbushim dot misionin tonë,” tha lideri historik i Partisë Demokratike Sali Berisha duke garantuar se zgjedhje të tjera pa votën e diasporës nuk do të ketë ndërsa përfundoi:

“Po ashtu garantoj demokratet se kurrë nuk do ti zhgënjej. Rikthimet në histori kanë qenë vetëm suksese. Është e vërtetë që unë rikthehem pas 8 vitesh, por ndryshimi është se fle më pak se në 2013 dhe lexoj më shumë dhe punoj më shumë. Rikthimi i PD-së në shtëpinë e lirisë nënkupton ristrukturimi i saj.”