Nga “Foltorja” në Korçë, Berisha: Edi Rama largohet vetëm me protesta të fuqishme!

LIderi historik i Partisë Demokratike, Sali Berisha, e nisi “Foltoren” në Korçë me një urim të cilin demokratët korçarë i kishin përgatitur për ditëlindjen e tij e tij të 77-të, për të vazhduar me eko që i bëri qeverisjes së Edi Ramës, dështimeve të Lulzim Bashës dhe humbjeve të PD.

Në fund, Ish-Presidenti Sali Berisha para korçarëve ishte më i qartë se kurrë duke theksuar se Edi Rama nuk ikën nga pushteti me votat që kontrollon ai vetë, as me opozitë pupël, ikën vetëm me protesta të fuqishme, prandaj Partia Demokratike duhet të ringrihet.

“Të dashur demokratë, anëtare, anëtarë, drejtues të PD të qytetit dhe të qarkut të Korçës, dëshiroj të përulem para banorëve të kësaj treve, për rolin e tyre. kam ardhur këtu për të diskutuar së bashku për një situatë kritike në të cilët ndodhet sot Shqipëria. Kjo nuk është kritike se e themi ne për propagandë, por e vërteta është se 8 vitet që kaluam, ishin në një formë apo tjetrën vitet më të mbrapshta për këtë vend. Nga kjo qeverisje në Shqipëri u ndërtua sipas analistëve të shquar, dhe institucioneve, narkoshteti i parë në Europë.

Sipas DASH, Shqipëria u shtrua në qendër të organizatave kriminale në Europë. Nga kjo qeverisje, qytetarët shqiptarë sot paguhen së paku 30% më pak se në 2013-ën. Nga kjo qeverisje 520 mijë shqiptarë u larguan nga vendi në 5 vitet e fundit. Ne humbëm yllin tonë polar i cili nuk mund të jetë tjetër, përveç integrimit në BE. Integrimi në BE është interes madhor. Për çdo popull në Europë, por dy herë më shumë për popullin shqiptar, pasi e kemi pasur të vështirë historinë. Kemi jetuar në mjegullnaja të pushtimeve të mëdha. Gangsterët e Ballkanit krijuan projektet e tyre, Mini-shengen. Në një kohë kur ishte procesi i Berlinit. Mini-Shengen e krijoi Vuciç, pasi e di se për të Europa është derë e mbyllur. Ai e di këtë, por përpiqet që të marrë rol lideri në Ballkan. Ai gjen dy vasalë, Edi Ramën dhe Zaev dhe krijojnë një nismë që t’i kundërvihen nismës së Berlinit. Vjen Angela Merkel dhe thotë; asgjë se zhbën Procesin e Berlinit. Nëse nuk ndërgjegjësohemi për këtë, ndoshta ngelemi jashtë rrugës europiane. Ça sjell Ballkani i Hapur? Sjell vendosjen e hegjemonisë së Serbisë në këto zona. 4 liritë askush si zbaton më mirë se sa BE. Asnjë vend i BE nuk i dëmtohet bujqësia, por zhvillon veten dhe të tjerët,” tha Sali Berisha duke shtuar se PD këto vite për fat të keq kontraktoi një borxh të madh ndaj shqiptarëve.

“Në 2021, në 25 prill, diferenca në vota mes PS dhe PD është qartësisht më e madhe se në 1997. Votat që ka marrë PD me koalicionin e vetë janë 71 mijë vota më pak se në 2013-ën. Atëherë pse jo? Ju keni derdhur djersë. Keni shumëfishuar forcat tuaja. Jam i vetëdijshëm për këtë. Keni shpenzuar kohë, mjete të tjera. Rezultati në fund sepse kryetarit aktual si besuan më shumë se 19%. Ai nuk arriti që të ndërtonte një figurë lideri, por as një marrëdhënie të përshtatshme me ju.”

Duke pasqyruar dështimin dhe sjelljen e Kryetarit aktual të PD, Lulzim Basha, lideri historik foli dhe përgjegjësitë e veta:

“Çdo ditë takoj drejtues anëtarë. Ai në një raport gjysmë të akullt me njerëzit. A ka përgjegjësi Sali Berisha për këtë? Më shumë se ju të tjerët këtu. Sepse e njoh më shumë se ju, fushatën elektorale, thelbin e opozitarizmin, mi ka bërë puna të thellohem edhe më shumë. Pse unë kam toleruar, dhe ju kërkoj ndjesë për këtë. Ka pasur vetëm betimin tim që kurrë mos të kthehem. Më 26 u zotova para jush se ‘Largohem pa kthim’. Ne duhet të flasim haptazi me njëri-tjetrin dhe duhet të vendosim raportet më të sinqerta të besimit njëri me tjetrin. Me shumë të drejtë këtu një grup i gjerë drejtuesish i thanë mirupafshim kryetarit të PD pas zgjedhjeve. Pse Sali Berisha nuk foli pas zgjedhjeve? Nuk fola se besova se detyra më imediate ishte që të mbronim votën tuaj. Nëse do të flisja, ndihmoja kundërshtarin. Këtë nuk e bëja. Mbrojtja e votës bëhet në institucionet ndërkombëtare. Kjo ishte tradhëti e hapur e mundit që ju bëtë,” tha Ish-Presidenti Sali Berisha duke e pranuar edhe demokratëve të Korçës se PD nuk fitoi.

“Vetëm 19% e zgjedhësve votuan për kryetarin, ashtu nuk bëhet. Nuk fitohet ashtu. Edi Rama nuk fitoi, si mori kurrë 74 mandate, ja dhuruam ne. U morëm me zgjedhjet në parti. Ky përbën për mua një akt po aq të rëndë, sa mosmbrojtja e votës. Çdo zgjedhje zotohej se do të mbronte votën, dhe vota nuk mbrohej. Këto ndodhën por luftëtarin, njeriun që beson dhe ka ideale është detyrë që kur e sheh shpresën t’ia vrasin para syve, ta krijojë përsëri. Kështu jemi ne! Ne nuk dorëzohemi. Përkundrazi bëjmë një analizë të ndershme, të sinqertë të këtyre zhvillimeve dhe shohim të ringrihemi shumë më fuqishëm,” tha Berisha i bindur që edhe në këtë situatë PD mund të ringrihet.

“A mund të ringrihemi ne?! Po! Jemi ringritur ne në vitin 97 kur u bëmë copë-copë, por u ngritëm fuqishëm. Tani do ngrihemi edhe më shpejt, edhe më fuqishëm. Tani ne i kemi gjërat të qarta se çfarë duhet të bëjmë, jemi më të vetëdijshëm. Kemi eksperiencë. Fituam në 2005 se u bashkuam. Nuk është se nuk kishim sherre, pasi kishim bërë gabime. Kishim përçarje, por u ngritëm mbi të gjitha këto dhe u bashkuam.”

Në fund, lideri historik i Partisë Demokratike, Sali Berisha, duke konstatuar se Lulzim Basha nuk u bë dot lider, për kryeministrin Edi Rama tha se e vetmja mënyrë për ta larguar janë protestat e fuqishme.

Ndërkohë ne përsëri, tha Berisha nga “Foltorja” në Korçë, po bëjmë një figurë jo të mirë sepse ne po tregojmë se nuk kemi tolerancë për fjalën.

“Ish-kryetari përjashton deputetin, shpall takime të tilla si anti-aemrikane. Çmendurira t’i quash është pak. Ish-kryetari nuk vjen dot tek ju sepse ka humbur lidhjen me ju. Çfarë duhet të bëjmë ne? Ne do të kemi një parti sovrane. Në pushtet ne nuk vijmë nëse nuk jemi forcë sovrane. Nëse vendimet për ne i merr dikush tjetër ne ta harrojmë se vijmë në pushtet. Vijmë tek problemi konkret. Unë u deklarova NON GRATA kur kisha 8 vite që isha larguar nga çdo qeverisje, kur ndaj meje nuk ka asnjë fakt dhe 3 javë pas humbjes së zgjedhjeve. Edhe kryetarit i thashë mos u përzini në këtë çështje,” tha Berisha duke i bërë thirrje demokratëve korçarë të firmosin për thirrjen e Kuvendit.

“Ne jemi të vendosur të ruajmë si drejtim më themelor drejtimin tonë perëndimor, miqësinë dhe partneritetin me SHBA-të. Këtë çështje do të marrin zgjidhje shumë shpejt. Ndaj ftoj çdo delegat të firmosë formularin për Kuvendin.  Mbledhja e tij është jetike për të shpëtuar Partinë Demokratike.  Përpjekja ime nuk është personale. Qëllimi madhor është kthimi i votës së lirë tek qytetarët. Ju do të pyesni ku e sheh veten? Unë pyeta veten pse ma bënë këtë? Çfarë kam bërë unë? Unë kisha denoncuar krimin, korrupsionin dhe isha kundër ndryshimit të kufijëve. Një thirrje e brendshme ishte që ti do të rikthehesh. Unë nuk kisha rol drejtues. Tani do të rikthehem i hapur për çdo funksion. Në mënyrë absolute do të mirëpres çdo rival dhe rivalët ne nuk i largojmë. Anëtarsia e PD-së do të përcaktojë pozicionin tim,” tha në fund lideri historik i Partisë Demokratike, Sali Berisha i qartë edhe sot se si mund të largohet Kryeministri Edi Rama nga pushteti:

“Themeli i themeleve janë vlerat demokratike brenda demokracisë. Nëse ne nuk rikthejmë votën, nëse ne mendojmë se vendosim pa u pyetur ju absolutisht krijohet një strukturë moniste që shkon nga disfata në disfatë dhe fitore nuk shikon ndonjëherë. Duhet dhënë fund kësaj situate. Mjafton të heqim unin dhe të vendosim prioritet shërbimin ndaj vendit. Vendimet do të jenë kolegjale. Këtu nuk ekziston kryesia. Kryesia ka përgjegjësi dhe merr vendime dhe kontrollon kryetarin. Partia do të përgatitet për fraksione, ajo do të jetë shtëpia e lirisë. Nuk kemi frikë nga liria ne. Edi Rama nuk ikën nga pushteti me votat që kontrollon ai vetë, as me opozitë pupël, ai ikën me protesta të fuqishme për të zezat që i ka bërë këtij vendi. Prandaj ne duhet të ringrihemi.”