Nga “Foltorja” në Lezhë, Berisha: Më 11 Dhjetor mbahet Kuvendi Kombëtar i PD

“Nga Lezha kam kënaqësinë të informoj demokratët se më 11 Dhjetor do mbahet Kuvendi Kombëtar i PD-së. Rroftë Lezha, rroftë PD!” Ky ishte lajmi shumëpritur për demokratët e “Foltores” të cilën lideri historik Sali Berisha e kishte premtuar fundjavën e kaluar nga Berati duke theksuar sot se po kthehet shpresa dhe besimin sa Shqipëria ka llavë të tillë entuziazmi për të përmbysur pas 30 vitesh narkoshtetin.

Pse Edi Rama është për 3 mandate në pushtet, Ish-Presidenti fajësoi kryetarin e PD, Lulzim Basha, ndërsa për ata që spekulojnë se “Foltorja” është kundër Amerikës, Sali Berisha garantoi se jo vetëm që do ngrenë Partinë Demokratike dhe do e çojnë në fitore, por u tha vajtusëve të mjerimit se PD do vendos marrëdhëniet më të mira me BE-në dhe Shtetet e Bashkuara të Amerikës.

“Të dashur demokratë të qarkut të Lezhës, vëllezër dhe motra, së pari dua të përulem me nderimin më të madh para historisë së këtij qyteti, i cili u bë kryeqyteti i parë i trojeve shqiptare. Qytet i cili ishte apo u bë djepi i besëlidhjes kombëtare të shqiptarëve. Qyteti në të cilin prijësit e kombit shqiptar shpallën Skënderbeun zotin e shqiptarëve, prijësin e tyre të përjetshëm, qyteti që ai zgjodhi për të kaluar në përjetësi. Lezha, qytet që frytëzon virtytin më të arrirë të shqiptarëve; besën për vendin dhe trojet e tyre.

Unë dua t’u falënderoj me mirënjohje të madhe. Për herë të parë pas 30 viteve Shqipëria ka një llavë të tillë entuziazmi, besimi dhe shprese e cila njëlloj si ç përmbysi diktaturën komuniste, do të përmbysë narkoshtetin e Edi Ramës, pas 30 vitesh. 8 vite në pushtet, Rama rikthehu me shëmtinë e tyre mashtrimet e mëdha të diktaturës komuniste. 8 vite në pushtet faktoi para shqiptarëve çdo premtim, një mashtrim, një gënjeshtër e vërtetë. Ai ndërtoi narkoshtetin në Europë me lidhjet e tij kriminale, qeveris me banda dhe krimin. Ka krijuar një gjendje të cilën se ka asnjë shtet në Europë,” tha Sali Berisha duke konstatuar se në këto 8 vite Edi Rama ka mjeruar shqiptarët, si asnjë vend tjetër.

“Demokracia dhe tregu nuk varfërojnë qytetarët, por në ligjin e tyre të natyrshëm i përmirësojnë jetën. Vitet 2005-2013 varfëria ekstreme u ul katër herë, dhe rrogat u rritën. Në 8 vitet e shkuara ndërtuam 11 mijë km rrugë, qindra ujësjellës kanalizime. Në 8 vite Shqipëria u shndërrua në qendër operacionale të organizatave kriminale, të Rajonit, Europë, Të Amerikës së Jugut dhe të Veriut dhe në Lindjen e Mesme. Në 8 vite Shqipëria u ngrit në çatinë e botës për korrupsionin. Emëronte ministër rendi skafo-ministrin, i cili me klanin e tij familjar vinte në kontroll trafiqet e Vlorës dhe jugut. Në kulmin e mbjelljeve të drogës në Shqipëri, e shpallte atë në superminsitër dhe e merrte në vizitë në shtëpinë e bardhë, ku nuk kishte shkelur kurrë më parë ndonjë trafikant veç Saimir Tahirit. Largohej Tahiri dhe sillej Basha, vëllai i të cilit mori nga Habilajt drejtimin e trafikut në Vlorë. Pas tij na erdhi një ministër, skuthin e familjes, Ruçin-Kuçin-Çuçin.

Prandaj edhe ne jemi ‘delja e zezë’ e Europës, vendi më i pasigurt, ku nuk vijnë investitorët. Spastrim etnik. Të gjitha këto miqtë e mi kanë ndodhur edhe për një arsye tjetër të fortë, për shkak se opozita, PD nuk arriti që të jetë në lartësinë e saj për t’i bërë bllok, për të larguar nga pushteti një aventurier, një antishqiptare, kreu i Meduzës. Në 8 vite Rama na i mbylli dyert e Europës dhe integrimit, me muret e krimit, korrupsionit, drogës dhe me politikën me shtrimin e Shqipërisë në vasale të Beogradit,” tha lideri historik i Partisë Demokratike duke shtuar se për të gjitha këto “Foltorja” ka ndezur shpresat e shqiptarëve.

“Zemra te tyre dhe ne do të zotohemi këtu se do të marrim të gjitha fund. Do të garantojmë një zhvillim të pandalshëm, integrim dhe liritë e të drejtave të njeriut, jashtë monopoleve, oligarkëve, jashtë konkurrencës së pandashme. Por në radhë të parë duhet të ngremë shtëpinë tonë të shembur. Të ngrihemi ne si PD, sepse Rama ia doli. E vërteta është siç do më thoshte një kryetar grup-seksioni nga Puka; Ai mori çdo institucion këto 8 vite se ia dha Basha nga paaftësia e tij për ta penguar. Mori së fundi dhe kreun e PD. Dhe kjo është e vërteta. Do të ndalemi pak. Të shtrojë një pyetje; cilët betejë fituam ne demokratët në këto 8 vite? A nuk shpalli kryetari mbrojtjen e votës si zotimin e tij më solemn, po ça mbrojtje iu bëri votës ai në 25 prill.”

Duke e konfirmuar se Edi Rama vodhi dhe plaçkiti vota dy herë m shumë se në vitin 2017, Berisha tha se këtë e bëri sepse e dinte se me kë kishte të bënte.

“Në 27 prill në vend se të ftonte demokratët e Lezhës dhe mbarë Shqipërisë në Tiranë, për t’u përballur, mendonte për karrigen e tij se si të fillonte zgjedhjet në parti nga frika se ikte. Ndaj edhe ne sot jemi jo vetëm të poshtëruar nga humbja në humbje, sepse mos harroni se Rama ka 3 mandate që kalon nga fitorja në fitore dhe Basha nga humbja në humbje. S’di se ça bën. Jo vetëm që nuk ndërmori protestën e përgjithshme, përdhunimin masiv që iu bë votës, u mor me karrigen e tij dhe harroi fjalën masakër.”

Nuk harroi dhe padinë që bëri në Paris ndaj Sekretarit Amerikan të Shtetit, Antony Blinken, ku bëri të ditur para demokratëve lezhjanë se gjykatësi e kishte njoftuar se në dosjen e paraqitur ndaj tij nuk kishte asnjë fakt dhe kishte zero prova.

“Unë u drejtova menjeherë në gjykatë në Paris, ku padita për shpifje zotërinë e tij që firmosi vendimin për shpalljen non-grata. Jo vetëm siç e morët vesh, gjykatësi ka pranuar shqyrtimin e padisë time, por miq të mi më ka njoftuar. Miq të mi më ka njoftuar se ajo dosje ka zero fakte, zero dokumente dhe zero prova, siç ju thash unë juve. Megjithatë unë ftoj sekretarin e shtetit dhe secilindo qytetar, që çdo fakt që të ketë ta çojë në sallën e gjyqit në Paris. Skam asgjë personale dhe dua t’ju them ju se ditën e nesërme të vendimit e kam pyetur veten; Pse e morën këtë vendim? Çfarë kam bërë unë? Unë nuk kisha asnjë fuqi tjetër veç foltores së parlamentit dhe të ‘Facebook’. Me fjalën time kisha prishur plane të mëdha të Soros, për ndarjen e kufijve dhe aleancën mes 3 aleatëve. Kisha kundërshtuar me forcë kapjen e drejtësisë, reformën e Soros për kapjen e drejtësisë në Shqipëri.

A duhen bërë publik data e Vettingut?  Patjetër që po. Shkoni dhe gjeni Vettingun e Ervin Pipës, nuk ka njeri që mund ta gjejë. Kujtojmë që na doli se Sadushi i partisë kishte shitur një apartament në Golem dhe ai që e kishte blerë nuk justifikonte  paratë që kishte blerë. Ç’donjeri ka dalë nga Vettingu, ndërsa Sadushi mbahet. Ky është Sadushi i partisë i cili duhet të ishte bankën e të akuzuarve, por e mbajnë sepse e ka Edi Rama peng. Para dy muajsh i kam thënë Bashës se duhet denoncuar. A është konflikti i interesit një nga mekanizmat kryesor të korrupsionit? Padiskutim që po. Ardjan Dvorani përveçse kishte fshehur 82 mijë euro…i harrova tha ky Dvorani i partisë, i blenë edhe një apartament kur ishte anëtar bordi. Këtë e servirin si kampion të luftës së korrupsionit, por unë u them të studiojnë mirë shëmbëlltyrën psikologjike të shqiptarëve. Shqiptarët nuk ia kanë pranuar barin as Enver Hoxhës dhe nuk ia pranojnë kurrkujt. Mos të mendojnë se gënjeshtrat mund t’i shesin për të vërteta.”

Edhe para demokratëve lezhjanë, Berisha tha se sikur vendimi për përjashtimin e tij do të shpallej nga Këshilli Kombëtar do ta kishte pranuar, por kreu i PD-së Lulzim Basha u tregua besëprerë dhe vendimin e mori pa pyetur asnjë njeri.

“Kur të kujtojë Basha Lezhën, i kujtoj që të rrijë pa gjumë, për besëprerjen e tij. Nëse atë vendim do ta merrte duke mbledhur Këshillin Kombëtar, duke votuar aty, unë do të pranoja çdo vendim të kësaj strukture, por vendimin e mori pa pyetur njeri. Pse e mori? Sepse ata që e mbajnë peng nuk duan që të merret vendimi juaj se e dinë se ju jeni njerëz të lirë. Ju nuk shiteni dhe blini siç ndodhi me të. Ai nuk guxoi që t’ia çoj Këshillit Kombëtar. Foltorja nuk është kundër miqve tanë. Mos dëgjoni ata që janë bërë si…që mos të përdor një epitet.

Berisha bashkë me ju, jo vetëm që do të ngrenë PD dhe do ta çojë në fitore, por u them vajtorëve të mjerimit se Berisha dhe kjo parti do të vendosin marrëdhënie më të mira me BE dhe SHBA. Peng kryetari dhe ndonjë zëdhënës mjeran i tij që duhet të na etiketojë ne si takime antiamerikane, janë qesharak dhe më qesharak se çdo personazh në tërësi. Amerika është e vlerave të mëdha, e votës së lirë, sovranitetit, të kombeve dhe vendeve. Para se të ecim drejt fitores së pari duhet të ngremë nga themelet PD.”

Me këtë rast lideri historik u zotua se Partia Demokratike do të shndërrohet në shtëpinë e lirisë, ku do të ketë ndryshime rrënjësore në statut ndërsa premtoi se në këtë forcë politike do të kthehet edhe referendumi.

“Duhet të bashkohemi më fortë se kurrë, nga themeluesit e PD dhe te anëtarët e rinj, me zotimin solemn se ne që na rrëmbyen votën do të votojmë me këmbët dhe duart tona, do të votojmë me protestat tona. Rroftë protesta! Të ngrihemi ne si viganë duhet të vendosim liri, normat më demokratike, duhet të bëjmë PD, shtëpinë e lirisë.

Pse peng-Basha e mori vendimin për përjashtimin pa pyetur juve, apo siç bëri për Nokën apo Luan Baçin. Sepse ai nuk ka lidhje me statutin më, as me forumet, as me ju. Ai faktikisht ka lidhje vetëm me pengmarrësin e tij. Ju e keni mbështetur dhe unë po ashtu, ju kërkoj një mijë herë të falur për mbështetjen që i kam dhënë.  Pra, ne do bëjmë ndryshime të thella statutore, i cili do të përcaktojë që kryetari i cili dhunon nenet e tij, forumet e partisë dhe vullnetin tuaj, është i shkarkuar me ligj, pa vota, automatikisht,” tha lideri historik i PD, Sali Berisha para demokratëve të Lezhës duke përfunduar:

“Në statutin e PD do të sanksionohet shenjtëria e votës tuaj, ju do të vendosni vetë për deputetët tuaj!”