Nga Gener 2 e tatëpjetë…
Me fillimin solemn të pagesës tek trau ndëshkues i veriorëve në Thumanë-Kashar u pa i shqetësuar deputeti i PD, Agron Shehaj, sot lider i partisë “Mundësia” ndërsa akuzonte Kryeministrin Edi Rama se po na vjedhë me një rrugë prej 20 km, që ai e cilësoi si vjedhjen më të madhe ku shqiptarëve, Kryeministri do u marrë mbi 1.3 miliardë euro.
“Shqiptarët do paguajnë nga sot rreth 5 euro vajtje-ardhje në një rrugë prej vetëm 20 km. Beteja jonë do vijojë derisa ky koncension të anulohet. Duhet një Kryeministër i pakorruptuar, është e mundur, është e vetmja zgjidhje,” thotë ky njeri që veten e quan biznesmen dhe thotë se 500 lekë janë rreth 5 euro kur sipas kursit të Bankës së Shqipërisë në momentin që po fliste Agron Shehaj nuk ishte “rreth” por mbi 5 euro ose me saktë: 5.10 euro që për një koncesion 30 vjeçar është shumë!
Por, kështu janë biznesmenët shqiptarë dhe nuk është vetëm Agron Shehaj, i cili pandehur del kandidat për deputetë ashtu siç doli dhe biznesmen; Dhe, ashtu siç doli pandehur edhe oligarku të cilin e akuzon, Bashkim Ulaj, si në kohën e Qeverisë Berisha dhe vazhdoi me një vrull edhe më të madh revolucionar kur ai që e akuzonte, Edi Rama, e favorizoi edhe më shumë!
Nuk dihet se çfarë ka Agron Shehaj me Bashkim Ulajn, por, sikur ta kishte merakun me traun Thumanë-Kashar dhe paratë e vjedhura të shqiptarëve, do të reagonte për këtë koncesion kriminal që në vitin 2018 kur u dha, po këtë vit kur u kontestua ky koncesion me vlerë 225 milionë euro dhe u bllokua nga gjykata, dhe, vitet në vijim kur u rimor, e Shehaj ishte deputet i PD ashtu siç është sot!
Ndoshta Kryetari i PD në atë kohë mund të ketë ndikuar në heshtjen e deputetit vlonjat që akuzohej se ishte emëruar nga Kunati, gjithsesi, nuk ishte hera e parë që Agron Shehaj po zgjidhte heshtjen! Këtë e kishte bërë edhe në vitin 2009 me hidrocentralin e Gener 2 në Valbonë, me 5 kullat e saj pranë liqenit artificial të Tiranës në vitin 2014, dhe, kompaninë fantazmë DH Albania kur akuzohej Bashkim Ulaj për 30 milionë euro në Unazën e Re; Ose, dhe në rastin më ligjor kur Gjykata e Tiranës dënoi për këtë çështje vetëm 28 vjeçarin Avdjol Dobi me 6 muaj burg si administrator i kompanisë DH Albania, për falsifikim në përfitimin e dy tenderave me vlerë totale 30 milionë euro, ndërkohë Prokuroria pushoi hetimet për zyrtarët e ARRSH, OST dhe Ministrisë së Infrastrukturës dhe Energjisë. As gëk, dhe, as mëk!
Meraku me abuzimin e fondeve publike nga Edi Rama nuk ishte se e la pa gjumë Agron Shehajn ndryshe do të reagonte edhe për Tunelin e Llogarasë, si deputet nga Vlora që është, e meraku i plaçktijes në Thumanë edhe do arsyetonte një njeri që shqetësohet për para publike!
Sikur ta quante absurd Agron Shehaj mirëmbajtjen në vit të Tunelit Llogarasë me 12.7 milionë euro kur për atë të Kardhiq-Delvinë ishte parashikuar 200 mijë euro edhe do të kishte kuptim; Aq më shumë kur Tuneli Kardhiq-Delvinë i shërben njerëzve dhe ai i Llogarasë është hapur për folenë e atyre që vjedhin njerëzit, shqetësimi do të kishte sens!
Gener 2 e tatëpjetë…
Por, edhe sot të thuash që Agron Shehaj sulmon Gener 2 sikur nuk ka kuptim ashtu siç nuk ka kuptim shqetësimi i Agron biznesmenit për Thumanë-Kashar!
Sepse, po ta kishte me Gener 2, Agron Shehaj nëse nuk fliste dot në kohën kur u bë deputet nga Zotni Lafsha dhe zonja e tij gëzonte një Zyrë në kullën e qokave, mund të fliste për keqtrajtimin e ndërtuesëve që u bënte në kohën kur Bashkim Ulaj e vetëquajti veten oligarkë para se të ulej në fron Edi Rama, dhe përcaktonte tenderat që do merrte!
Ose, kur u distancua nga politika e Zotni Lafshës, kur Bashkim Ulaj kishte ble Elrodi TV dhe përkundër faktit ligjor që frekuenca nuk tjetërsohet vendosi ta pagëzoj A2 me një llagap tërheqës, CNN; Këtu, për frikën nga mediat nuk ka vend sepse përkundër investimit kolosaj dhe freskut që i bënë Edi Ramës, kjo medie ishte dhe vazhdon të njihet si një televizion që motin e jep shumë mirë!
Madje, po takishte vërtetë me Gener 2 do të fliste dhe për arsyet që pronari i saj nga orët e mbrëmjes deri në 9:00 të mëngjesit kuvendon në Kullën e Qokave me Edi Ramën; Nëse as këtu nuk gjenë një fije dyshimi, pse fletëpalosjet e Agronit në Thumanë duhet të lexohen!
Dhe, pickimi i Gener 2 nga Agron Shehaj, sikur të ishte dhe pickim gjarpëri humb kuptimin kur ai ngre zërin për 500 lekët e Bashkim Ulajt dhe heshtë për 1.320 lekët e Qet Kastratit! Madje, sikur edhe të respektohet vlerësimi i Arlind Qorrit për Agron Shehajn se është alergjik në libra por politika si dhe alternativat për të cilat flet duan studim, nuk duhet shumë mend për të kuptuar se as 500 lekët e Bashkim Ulajt nuk janë 4.2 euro vajtje-ardhje, siç u tha fillimisht nga Qeveria e Edi Ramës se do të paguhen në Thumanë-Kashar, dhe, as 1.320 lekët e Qet Kastratit nuk janë 10 euro vajtje-ardhje, siç tha i dashuri shtet i Gonit për pagën në Rrugën e Kombit!
Heshtje kjo e përsëritur e Agron Shehajt për Qet Kastratin sikur kur u vu trau në Rrugën e Kombit ashtu dhe kur erdhi urdhri nga Zotni Lafsha se protesta e fuqishme që ishte parashikuar pas goditjes së parë nga PD Dega Kukës, duhet të anulohet. Sot, të gjithë mund ta ndërlidhin heshtjen me mandatin e blerë të Agron Shehajt te Kunati, Goni mund edhe ta kundërshtoj por pak rëndësi ka sepse sot si Ai ashtu dhe të gjithë ata që akuzon në PD, akuzohen për shërbim ndaj Qet Kastratit, njeriut që shkatërroi veriun me dorën e vetë dhe kokën e Edi Ramës.
Në fund, ata që e panë te Fevzo se si u ngrit në oligark me 200 kasetofona, Samir Mane, sot janë kurioz të dinë se si ndryshoi projektin e Autostradës Tiranë-Elbasan te TEG-u, por kjo nuk ndodhi me Agron Shehajn; Ashtu siç nuk ndodhi as me linjën e ujësjellësit që çon në Green Coast të Samir Manes, ujë të cilin edhe për shumë vite Vlora e Gonit mund ta sheh vetëm ëndërr sikur vërtetë të ndodhë Shqipëria turistike e Edi Ramës!
Ndërsa fati i këtij oligarku që dikush e krijoi idenë të shtunën se i ngeli sharra në gozhdë me Thumanë-Kashar, dhe, të gjithë ata që aktualisht u konfirmuan më të fuqishëm me pasuri se ai por që Agron Shehaj nuk i zë në gojë, do të jetë i ngjashëm me atë të Selanikut, sepse populli ishte dhe është i qartë pavarësisht politikës dhe akuzave e kundërakuzave që shohin e dëgjojnë, sikur Edi Rama që sot të largohet në drejtim të paditur:
Gener 2 e tatëpjetë, kështu ka qënë e kështu do mbetë!
