Nga java e ardhshme lehtësime të levizjes me pikatore, Rama: Deri në mes të prillit do të…

Nëse numrat e pacientëve me koronavirus nuk do të rriten, Kryeministri Edi Rama paralajmëron se do të ketë lehtësim të levizjes së qytetarëve.

Qeveria po sheh një plan për lehtësimin e masave pasi javën e kaluar Shqipëria priste një kërcim të numrave por nuk ndodhi, tha Edi Rama, duke shtuar se lufta nuk është fituar ende dhe se në mes të prillit do të shihet se sa është shtrirë koronavirusi në territorin shqiptare.

”Nuk dua t’ju entuziazmoj para kohe por po detajojmë një plan për lehtësimin e masave që do vendoset në zbatim menjëherë sapo kurba të fillojë uljen. Nuk e di dhe nuk na e thotë askush në botë se kur do të ndodhë kjo. Deri në mes të prillit do të kuptojmë se sa thellë është shtrirë armiku mes nesh. Po studiojmë disa lehtësime të lëvizjes duke filluar me pikatore nga java e ardhshme po qe se numrat do na e lejojnë ta marrim në konsideratë pikatoren,” tha Edi Rama duke e pranuar:

“Prisnim një kërcim të numrave javën që lamë pas. Kjo nuk do të thotë asgjë. Vigjilencë dhe rezistencë. Pa u lodhur dhe pa u mërzitur. Fati i kësaj lufte nuk varet vetëm nga armiku por nga rezistenca jonë. Ditë për ditë, pa menduar ç’do ndodhë nesër.”