Nga Kolumbia në Fier, SPAK: 430 kg kokainë, me vlerë 40 mln euro në thasët me pleh kimik!

Kreu i SPAK Arben Kraja së bashku me prokurorin e çështjes Adnan Xholi, sot ka dhënë detaje për operacionin antidrogë, ku u zbuluan 430 kg kokainë në thasët me pleh kimik.

“Kemi bashkëpunuar me policinë malazeze. Për t’u vlerësuar qëndrueshmëria e hetimit për t’i shkuar deri në fund,” tha Kraja ndërsa Prokurori i çështjes dha më tej detaje konkrete duke u ndalur te nisja e hetimit, dyshimet dhe deri të droga dhe armët e sekuestruara.

Ai tha se janë ekzekutuar 10 masa sigurie për 10 shtetas shqiptarë dhe janë kryer kontrolle në 14 objekte.

“Kemi regjistruar që në fund të korriku veprën penale për trafik të lëndëve narkotike. Ky procedim është hetuar në bashkëpunim të ngushtë me policinë e shtetit, BKH dhe disa agjenci të huaja ndërkombëtare dhe në bashkëpunim të ngushtë me autoritetet malazeze të drejtësisë.

Ekzistonin të dhëna se në maj 2022 në portin e Kolumbisë ishte ngarkuar një ngarkesë me pleh kimik, që do të shkonte në Pire Greqi dhe më pas në Mal të Zi i porositur nga një shtetas shqiptar.

Kanë vijuar hetimet dhe nga verifikimi që kanë bërë autoritetet shqiptare rezultoi se porositës i mallit ishte një shtetas shqiptar që kishte hapur një aktivitet tregtar në Shqipëri në 2022.

Pasi sasia me pleh ka mbërritur në Shqipëri janë kryer veprimet doganore.

U pa e udhës që të mos ndaleshin vetëm te porositësi, por dhe të organizatorët, bashkëpunëtorët. Nga ana e GJKKO janë autorizuar dhe janë pranuar kërkesat tona për arrestimin e 4 persona.

14 për kontrolle dhe 10 masa sigurimi janë ekzekutuar. Janë sekuestruar 15 mijë euro, 3 automatik, 3 pistoleta, 108 fishekë, 18 aparate celularë, 5 automjete, 20 paleta me 24 ton pleh artificial, brenda të cilit 430 kg kokainë, me vlerë 40 mln euro,” tha Prokurori i çështjes.

Ndryshe, me ndihmën e DEA-s amerikane dhe oficerëve të policisë malazeze, hetimi për këtë çështjes ka nisur më shumë se 3 muaj më parë, kur u sinjalizua arritja e ngarkesës nga Kolumbia në Tiva dhe më pas dërgimi në Frakull. Kokaina ishte e ndarë në 600 thasë të plehut kimik dhe Nikolin Gjolena është personazhi kryesor i kësaj çështje.

Eplogu i këtij operacioni janë 10 shtetas shqiptar të arrestuar: Zenel Cervanaku, Denilson Cervanaku, Enxhi Ferhati, Nikolin Gjolena, Klajdi Vrioni (Kodra), Julian Malaj, Redion Meshi, Bledar Matoshi dhe Marildo Rona.