Nga Prishtina, Presidenti i Letonisë: Bashkimi Evropian t’i heq masat ndaj Kosovës!
Presidenti i Letonisë, Edgars Rinkēvičs, pas takimit në Prishtinë me Presidenten e Kosovës, Vjosa Osmani, tha se Bashkimi Evropian duhet t’i heq masat kufizuese ndaj Kosovës.
“Duhet të hiqen masat kufizuese, nuk e di nëse do të shënohet përvjetori i dytë i këtyre masave, por qëndrimi i Letonisë është i qartë, masat kufizuese duhet të largohen dhe do ta vazhdojmë të avokojmë për këtë,” tha Edgars Rinkēvičs ndërsa shtoi se mbështet normalizimin e plotë të marrëdhënieve mes Kosovës e Serbisë, si dhe vazhdimin e dialogut si një mënyrë e mirë për ta përmirësuar stabilitetin në rajon.
I pyetur për statusin kandidat të Kosovës në BE, Presidenti i Letonisë tha se nuk mund të përgjigjet në emër të të gjitha shteteve të BE-së, teksa shtoi se ka nevojë për reforma dhe për mbështetje në rajon nga ana e BE-së.
Ndërsa Presidentja e Kosovës, Vjosa Osmani, tha se Letonia është partnere e fuqishme e Kosovës.
“Vizita e juaj sot në Prishtinë, pas një takimi që patëm në Munich është një dëshmi e marrëdhënieve të ngushta e, tashmë, të shkëlqyeshme ndërmjet Kosovës dhe Letonisë, të cilat janë ndërtuar mbi vlertat e përbashkëta demokratike dhe me një përkushtim të përbashkët për paqen dhe sigurinë rajonale dhe atë globale,” tha Vjosa Osmani pas takimit me Presidentin e Letonisë, Edgars Rinkēvičs duke rikujtuar:
“Ju keni përkrahur jo vetëm procesin tonë të shtetndërtimit, por edhe anëtarësimin e Kosovës në organizatat ndërkombëtare!”
Ndryshe, Bashkimi Evropian vendosi masa kufizuese ndaj Kosovës në qershor të vitit 2023, duke i konsideruar autoritetet e Kosovës fajtore për përshkallëzim të situatës në veri të vendit. Ndonëse me aktin terrorist në Banjskë rezultoi se masat e atuoriteteve kosovar ishin të drejta, BE nuk u vetëkorrigjua madje as nuk e qortoi Serbinë për agresion mbi shtetin e Kosovës.
Krerët e shtetit të Kosovës në çdo takim sikur se sot kërkojnë nga krerët e shteteve anëtare të BE të ndikojnë në heqjen e këtyre masave që me padrejtë vazhdojnë ti vuan Kosova, edhe pse i ka plotësuar të gjitha kushtet për heqjen e tyre.
